18 нафар кекса авлод вакилига «Меҳнат фахрийси» кўкрак нишонлари топширилди
@hokimiyatpressВилоят Маҳалла ва оилани қўллаб-қувватлаш бошқамаси мажлислар залида бир гуруҳ нуронийларни Президентимиз томонидан таъсис этилган “Меҳнат фахрийси” кўкрак нишони билан тақдирлаш маросими бўлиб ўтди.
Жорий йилда вилоятимиз бўйича жами 18 нафар (5 нафари 1-даражали, 6 нафари 2-даражали, 7 нафари 3-даражали) кекса авлод вакили кўкрагини ушбу юксак нишон безади. Шунингдек, Низомга кўра 1,2-даражали нишон соҳиблари бир марталик пул мукофоти билан тақдирланадилар.
Уларга кўрсатилаётган бундай эътибордан мамнунлик нуронийларимиз юзидаги самимий табассум, кўзларидаги севинч ёшлари, юракдан айтилган дил сўзларида намоён бўлиб турибди.
— Ҳар ким кексайганда умр бўйи қилган меҳнатлари роҳатини кўрсин экан, — дейди 52 ёшли Меҳнат фахрийси Достон Ўтаганов. — Кишининг кўнгли кўтарилиб, руҳи тетиклашади. Юртимизда биз, нуронийлар мана шундай бахтга муяссар бўлаётганимиздан беҳад мамнунмиз.
Сўзга чиққан нуроний отахонлариимиз давлатимиз раҳбарига чуқур миннатдорчилик билдириб, халқимизнинг хозирги синовли кунларни якдиллик билан, ҳамжихатликда бир-бирларига кўмак бериб енгиб ўтишда барча бирдек ўз ҳиссасини қўшишга чақирди ва ёшларимиз келажаги учун ўз тажриба ва ўгитларини беришда давом этишларини таъкидладилар.