Шаҳрам Ғиёсов собиқ жаҳон чемпионини 28 сонияда мағлуб этди (видео)

Профессионал бокснинг супер енгил (-63,5 кг) вазн тоифасида фаолият олиб бораётган Шаҳрам Ғиёсов (9-0, 7 КО) ўзининг навбатдаги жангини ўтказди.

goSport.uz'нинг хабарига кўра, Мексиканинг Эрмосильо шаҳрида бўлиб ўтган бокс оқшомида Ғиёсов колумбиялик собиқ жаҳон чемпиони Дарлис Пересга (34-5-2, 22 КО) қарши рингга чиқди. WBA International чемпионлик камари учун кечган, 10 раундга мўлжалланган жанг биринчи раунддаёқ якунига етди.

Раунднинг 28 сонияси ортида қолган бир паллада Ғиёсов томонидан чап қўлда берилган кросс зарбадан сўнг рақиб ерга қулади. Рефери саноғи якунланига қадар Перес ўрнидан тура олмади ва 41 сонияда нокаут қайд қилинади.

Ушбу ғалаба Шаҳрамнинг профессионал боксдаги 9-ғалабаси бўлди. Шунингдек, у 7-марта муддатидан олдин ғалабани тантана қилди.