Тезкор: Мактаб ва боғчалар очилишига тайёргарлик кўрилмоқда - штаб аъзоси
@Sirdaryo
Коронавирусга қарши курашиш штаби аъзоси Рустам Икромовнинг айтишича республикада аста-секинлик билан мактаб ва боғчалар очилишига тайёргарлик кўрилмоқда, дейилади «Xabar.uz» хабарида.
«Мактаб ва мактабгача таълим ташкилотларида ўз фарзандларимиз таълим олишади. Бу масалада эътибор бериш керак бўлган жиҳатлар кўп. Ишлаб чиқилаётган тадбирлар шунчаки ҳисобот учун эмас, балки фарзандларимизни ижтимоий ҳаётга тезроқ қайтариш, карантин шароитида уларнинг руҳиятида кузатилган ўзгаришларни бартараф қилиш, улар қатнайдиган муассасаларда коронавирус тарқалишига имкон қадар тўсқинлик қилишга қаратилган чоралар белгиланиши лозим.
Айни кунларда Мактабгача таълим вазирлиги ва Халқ таълими вазирлиги билан ҳамкорликда таълим муассасаларида амал қилувчи санитария меъёрлари ишлаб чиқилмоқда.
Мазкур меъёрлар Адлия вазирлиги томонидан ҳуқуқий экспертизадан ўтказилади ҳамда барча томонидан бажарилиши бирдек мажбурийлиги белгилаб қўйилади.
Шундан кейин мактабгача таълим ташкилотлари ва умумтаълим мактабларига фаолиятини бошлаш учун рухсат берилади».
Аввалроқ, Халқ таълими вазирлиги мактаблар очилишини Махсус комиссия қарори ҳал қилишини маълум қилган.