Хитойда COVID-19’га қарши вакцинага биринчи патент берилди

Интеллектуал мулк ишлари бўйича Хитой давлат бошқармаси COVID-19 коронавирус инфекциясига қарши вакцинага биринчи патентни берди. Бу ҳақда «Дарё» хабар бермоқда.

Патент Хитой халқ озодлик армиясининг Ҳарбий тиббиёт фанлар академияси ҳамда CanSino Biologics компанияси номига берилган. Улар биргаликда COVID-19’га қарши курашда фойдаланиладиган рекомбинант (Ad5-nCoV аденовирус векторига асосланган) вакцинани яратган. Аввал июнь ойида мазкур вакцинадан ҳарбий мақсадларда фойдаланишга рухсат олинганди. Ундан олдинроқ мартда ушбу вакцинани синаш мақсадида Хитойда клиник тестлар ўтказилишига рухсат этилганди.

Интеллектуал мулк ишлари бўйича Хитой давлат бошқармаси эълон қилган хабарномага кўра, сичқонлар ва денгиз чўчқаларида ўтказилган тадқиқотлар вакцинанинг яхши иммуногенлик хусусиятига эга экани, қисқа вақт ичида интенсив ҳужайра ҳамда организмда гуморал иммун реакцияни чақира олишини кўрсатган.

«Генетик модификациялашган сичқонларда ҳимоя самарасининг тадқиқ қилиниши Ad5-nCoV юборилганидан 14 кун ўтгач ўпка тўқималарида вирус юкламасини камайишини кўрсатган. Вакцина COVID-19’га қарши яхши иммуноҳимоя самарасини беради», – дейилади расмий изоҳда.

Хабар қилинишича, вакцинанинг биринчи ва иккинчи синов босқичлари Хитой ҳудудида ўтказилган. Аввалроқ Хитой давлат мулки бошқаруви ва назорати қўмитаси (SАSАC) 2020 йил охири ёки 2021 йил бошларида COVID-19’га қарши кейинги инактив вакцинанинг бозорга чиқарилиши мумкинлигини маълум қилган. SАSАC’нинг аниқлик киритишича, вакцина клиник тестларнинг учта босқичи муваффақиятли ўтганидан кейин, унинг самарадорлиги ҳамда хавфсизлиги исботланса, савдога чиқарилади.

Хитойда жами 6 та янги вакцина клиник синовлар босқичигача етиб борган. Хитойлик олимлар COVID-19’га қарши турли вакциналарни тадқиқ қилиш ва ишлаб чиқиш устида эпидемия бошланганидан буён фаол иш олиб бормоқда. Бироқ COVID-19’га қарши вакцинани одамларда синаб кўриш фақат рекомбинант вакцина ҳамда инактив вакцинада рухат этилган.

Аввал июль ойида Хитой ва Ўзбекистон коронавирус вакцинасини биргаликда синовдан ўтказиш учун ҳамкорлик қилишни режалаштираётгани ҳақида хабар берилганди.