Жиззахда ёнаётган автомобиль ҳайдовчисига ёрдам кўрсатилди

Жорий йилнинг 4 август куни соат эрталабки 6.00 да Жиззах вилояти Ш.Рашидов тумани “Халқобод” МФЙ ҳудудидан ўтувчи А-376 “Жиззах-Қўқон” автомобиль йўлининг 293 километрида Жиззах йўналишида ҳаракатланиб кетаётган, Самарқанд вилояти Тойлоқ туманида яшовчи фуқаро Р.Х.га тегишли ГАЗ-53 русумли юк автомобилида ёнғин келиб чиққан. Бу ҳақда Жиззах вилояти ЁХБ катта муҳандиси, катта лейтенант Фаррух АБДУРАХМАНОВ sangzor.uz'га маълум қилди.

Ёнғин ҳақида ўткинчилардан бири томонидан “101” рақамига хабар қилинган. Дарҳол ёнғин жойига Жиззах шаҳар ЁХБнинг 1 та ёнғин-қутқарув бўлинмаси юборилган. Қутқарувчилар ёнғин жойига етиб борганида, юк автомобилининг мотор ва кузов қисми аланга ичида қолган, агар аланга автомобилнинг бортига ўтса, газ баллонларининг портлаш хавфи мавжуд эди.

Қутқарувчиларнинг тезкор ҳаракатлари туфайли ёнғин қисқа муддатда бартараф этилган. Автомобиль ҳайдовчиси куйиш тан жароҳати билан Жиззах шаҳар тез тиббий ёрдам хизмати жонлантириш бўлимига ётқизилган. Автомобиль газ редукторидаги носозлик ёнғинга сабаб бўлганлиги тахмин қилинмоқда. Суриштирув ишлари олиб борилмоқда.

Жиззах вилояти Ёнғин хавфсизлиги бошқармаси ҳайдовчиларни автомобилларни ўз вақтида техник кўриклардан ўтказган ҳолда фақат соз ҳолатда бошқаришга, транспорт воситаларида ёнғин хавфсизлигини талабларига қатъий риоя қилишга чақиради. Транспорт воситасига носоз, ностандарт, синов сертификатига эга бўлмаган газ баллонларини ўрнатиш мумкин эмас.