Янгиер шаҳрида бир қатор клуб, ресторан ва интернет кафеларда тунги рейд тадбирлари ўтказилди.
@Sirdaryo
Айни пайтда республикамизнинг барча ҳудудларида “Хавфсиз ҳудуд” концепсияси асосида жамоат тартибини таъминлашга қаратилган салмоқли ишлар олиб борилмоқда.
Ҳусусан, Янгиер шаҳрида жамоат тартиби ва хавфсизлигини таъминлаш, жиноятчилик ва ҳуқуқбузарликларнинг олдини олиш, аҳолининг турмуш тарзи ва ижтимоий муҳофазасини яхшилаш, бу борада тарғибот-ташвиқот ишларини кучайтириш мақсадида шаҳар ҳокимлиги, шаҳар ИИБ ва ёшлар иттифоқи шаҳар кенгаши билан ҳамкорликда бир қатор тунги клуб, ресторан ва интернет-кафеларда рейдлар ўтказилди.
Тунги рейд натижаларига кўра, айрим ёшлар кафе-барларда спиртли ичимлик истеъмол қилаётгани аниқланган. Вояга етмаган ёшлар тунги вақтда нафақат бундай клубларда бўлиши, балки бу муассасаларда меҳнат фаолияти билан шуғулланаётгани ҳам қайд этилган.
Ана шундай ҳолатлар аниқланган бир қатор тунги клуб раҳбарларига огоҳлантириш берилди.
Шунингдек, шаҳарда мавжуд интернет клублар кўздан кечирилганда вояга етмаган ёшларнинг тун ярмида турли ваҳшиёна ўйинлар ўйнаш, беҳаё видео маҳсулотларини томоша қилиш билан оввора эканликлари аниқланди.
Рейд тадбири давомида қўлга тушган вояга етмаган ёшларни ота-оналари чақиртирилиб шу ернинг ўзида уларга нисбатан маъмурий баённомалар расмийлаштирилди.
Бугунги кунда интернет ёш авлод онгу шуурига мафкуравий тазйиқ ўтказадиган ўзига хос “ўчоқ”қа айланиб бораётгани ҳисобга олсак интернет кафеларда ярим тунда ўсмир ёшларнинг нима билан машғуллиги барча ота-оналарни сергаклантириши лозим.
Тилни ножўя ишлатиш ҳалокатга, қўлни ножўя ишлатиш эса жиноятга йўлиқтиради. Биз учун ҳаёт-мaмот масаласи саналган бола тарбиясида сергаклик, оқиллик ва одилоналик муҳим ўрин тутади. Бир қарашда майда-чуйдадек кўринган кичик камчиликлар вақти келиб катта муаммоларни келтириб чиқариши турган гап. Тарбия билан боғлиқ ҳар қандай муаммонинг тубида лоқайдлик, бефарқлик ва масъулиятсизлик ётади.
Ота-оналар вақт бемаҳал бекорчиликдан кўча-кўйда мақсадсиз юрган фарзанди билан қизиқмаса, унга меҳр бермаса, эътибор қаратмаса бундай ёшларнинг тақдири не кечади?
Ахир фарзанд тарбиянинг асосини ота-онасидан олади-ку!
Унинг уйдан чиқиб кетаётганини ота-онаси кўрмадимикан деган савол туғилади беихтиёр.