Ўз боласини сотган аёлни жамоатчиликка олиб чиқиш ва изза қилиш — Танзила Норбоева бунга нима дейди?

Йил бошидан ҳозиргача Ўзбекистонда ўз фарзандини сотган 23 та ҳолат кузатилган. Нега жамиятимизда шундай муаммолар учрамоқда? Мутасаддилар мазкур масалаларга чора кўряптиларми? ЎзА хабар беришича, Олий Мажлис сенати раиси Танзила Норбоева ушбу муаммо юзасидан ўз муносабатини билдирди.

“Ўз боласини сотган аёлни жамоатчиликка олиб чиқиб, изза қилиш тўғри деб ўйламайман. Авваламбор, ўз боласини сотган аёлнинг ижтимоий психологик ҳолати ўрганилиши лозим. У қаттиқ тушкунликка тушганми, шунчалар оғир ижтимоий аҳволда қолганми? Бундай қийин аҳволга тушган аёл билан индивидуал тарзда гаплашилиши, унинг муаммолари ўрганилиши лозим. Ҳатто уруш йилларида ҳам одамлар ўз фарзандларини олиб чиқиб сотишмаган. Менинг назаримда, ишсизлик ва пулсизлик ҳам ўз фарзандини сотишгача олиб бормаслиги керак. Бугунги кунда оғир аҳволда қолган ёки ёлғиз фарзанд катта қилаётган аёлларга ёрдам кўрсатиш ва уларни иш билан таъминлаш учун барча зарур чора тадбирлар кўрилмоқда”.