КУН САВОЛИ: COVID-19га қарши вакцина қачон, қаерда ишлаб чиқарилади? Барчани эмлаш имконияти борми?

Марказий Осиё давлатларида коронавирус инфекцияси тарқалиши кескин тус олаётган бир даврда Европа ҳамжамияти дунёни карантинга қамаган вирусга қарши вакцина синовлари якунланаётганини маълум қилмоқда. Evronews ахборот агентлиги мазкур вакцинанинг қанчалик самарадорлиги ва уни қачон ва қанча ишлаб чиқарилиши бўйича тўпалаган тафсилотлари билан бўлишди.

АҚШ ва Буюк Британияда COVID-19 вирусига қарши тайёрланаётган вакцина якунланиш арафасида. Вакцинани тайёрлаш жараёнида Оксфорд мутахассислари билан бирга Италиялик тадқиқотчилар ҳам иштирок этмоқда.

Evronews агентлиги журналисти Жоржия Орланди Аппенин ярим оролига тадқиқотлар қандай кечаётганини кузатиш учун борди. Вакцина ҳақида IRBM тадқиқот маркази раҳбари Лоттер Маттео Лигуори қуйидагиларни маълум қилди.

“Вакцинани сўнгги синов натижалари қониқарли.

Биринчидан, биз вакцина ножўя таъсирларга олиб келмаслигини аниқладик.

Иккинчидан, у COVID-19 вирусига қарши иммун тизимини мустаҳкамлайди. Бу биринчи эмлашда организм 90 фоизга ҳимояланади, иккинчи эмлаш эса 100 фоиз натижа беради деганидир”.

Синовлар натижаси нафақат тасдиқланиши, балки, тегишли ташкилотлар томонидан маъқулланиши ҳам керак. Ҳозирча синовлар кўнгиллиларда ўтказилмоқда.

Инъекция қайсидир шаклда коронавирусни бошдан ўтказган кўнгилли одамларда синалмоқда. Эндиликда тадқиқотчилар олдида вирус билан касалланмаган одамлар вакцинани қандай қабул қилиши муаммоси устида бош қотирмоқдалар.

IRBM илмий тадқиқот маркази раҳбарининг фикрича, энг асосий муаммо қисқа вақт ичида вакцинани керакли ҳажмда ишлаб чиқара олишдадир. “Вирус шиддат билан тарқалмоқда. Касаллик ўчоқлари кўпаймоқда. Ер юзининг 7.5 миллиард аҳолиси ёппасига эмланиши даркор. Бу муаммо бугунги кунда барча тадқиқотчиларни ўйлантирмоқда”.

28 июль куни Франциянинг “SANOFI” ва Британиянинг "Глаксосмитклайн" (GSK) дори ишлаб чиқарувчи компанияси Буюк Британия Бирлашган Қироллик билан шартнома имзолаганини маълум қилди. Шартномада Қиролликка 60 миллион вакцина етказиб берилиши кўзда тутилган.

“SANOFI” компанияси Европани тўлиқ вакцина билан таъминлаш мақсадида Франция давлати ва Европа комиссияси билан музокаралар олиб бораётганини айтмоқда.

Оксфорд тадқиқотчилари билан ишлаётган Astrazeneca компанияси ҳам худди шундай қадамни қўйганини хабарлаган. Гап 60 миллион доза вакцина етказиб бериш ҳақида кетмоқда. Келаётган йил бошига бориб, 400 миллон доза миқдорида вакцина ишлаб чиқарилиши кутилмоқда.

IRBM раҳбари Маттео Лигуорининг айтишича, ҳозирги вазиятда рақобат қоидалари амал қилмаяпти, улар халқаро ҳамкорлардан ўз тажриба ва маълумотларини яшираётганлари йўқ. “Бундай вазият дори-дармон ишлаб чиқариш тарихида деярли кузатилмаган”.

Ҳозирда дунёда 17 миллиондан ортиқ коронавирус инфекциясини юқтирганлар қайд этилган. COVID-19 ва унинг асоратларидан 663 мингдан ортиқ киши ҳаётдан кўз юмган.

ЎзА