Сирдарёлик отахон велосипедда Орол сари йўл олди

Ўзбекистон “Адолат” СДП Сирдарё вилоят Кенгашининг “Адолат” қабулхонасига бир отахон келиб ўзини наридан бери таништирганидан сўнг яқинда Орол денгизига велосипедда йўлга чиқишни ихтиёр этганлигини маълум қилди. Кенгаш раиси Дилшунос Абдуллаева бошчилигида биз билан анчагача суҳбат қилган ёши етмишларни қоралаб қолган отахондан бундай ташаббусдан мақсади нелигини сўраганимизда мисоли жаҳонгашта Дон Кихот каби саргузаштларга иштиёқманд эканлигини, бу билан ўз ҳаётини ёрқин рангларга ҳамоҳанг қила олишини завқ ва шавққа тўлиб ҳикоялади.

Шу билан бирга, Орол денгизига велосипедда етиб бориш орқали дунёга донг таратишни ният қилганлигини айтди. Аммо оилам, фарзандларим бунга тиш-тирноғи билан қарши. Толиқиб қоласиз, велосипедда бориш ҳолдан тойдиради, соғлигингизни йўқотасиз деб рўйхушлик беришмаяпди, деди отахон. - Менинг бўлса қарорим қатьий. Уларга ҳар қанча буни тушунтирсам ҳам, руҳий ҳам жисмонан бунга тайёр эканлигимни билдирсам ҳам унашмаяпди. Лекин мен барибир йўлга чиқмоқчиман, деди яна жиддий оҳангда. Биз ҳам фарзандларингиз тўғри айтибди. Шу ёшда ўзингизни қийнаб нима қиласиз, десак отахон тағин ҳам кўнмади. Уларнинг чақнаб турган нигоҳларида, жарангдор сўзларида биз ҳам бу шунчаки хавас эмас балки, азм-у қарор эканлигини пайқагандек бўлдигу, уларга оқ йўл тиладик.

Ўзини Абдурасул ота деб таништирган киши биздан ушбу саёҳатини ОАВ орқали ёритилишида амалий ёрдам беришимизни сўради. Биз рози бўлдик ҳамда отахоннинг шахсий маълумотларини оқ қоғозга тушириб қолиб, сафарга отланишидан олдин биз билан боғланиши кераклигини уқтирдик.

Орадан уч кун ўтиб Абдурасул ота бизга қўнғироқ қилди. Хабар беришича, аллақачон Орол сари йўл олиб, саргузаштли дамларини бошлаб юборган экан. Айни дамда Жиззах вилоятининг сўлим ҳудудларидан бирига етганлигини айтганида биз бироз ўпкалагандек бўлиб отахондан йўлга чиқишингиздан олдин маълум қилганингизда ўзимиз кузатиб қўяр эдик дедик ва йўлга хозирлиги, ҳол-аҳволидан сўрадик. Улар бардам-бақувват эканликларини маълум қилиб, хавотирга ўрин йўқлигини билдирди. Куни кеча янгидан олган маълумотларимизга қараганда эса, отахон Самарқанд вилоятидан ўтиб Навоий вилояти заминига етган экан. Йўл-йўлакай тушган фотосуратларидан бизга юборди. Биз бўлса, отахонга ўзларини эҳтиёт қилишлари лозимлигини айтиб, омонлик тиладик.

Маълумот ўрнида, Абдурасул ота Алланазаров 1950 йил 7-мартда Сирдарё вилояти Боёвут туманида таваллуд топган. Касби бўйича тиббиёт ходими. Ўз касби бўйича 22 йил Ховос туман ҚВП (қишлоқ врачлик пункт)ларида мехнат қилган. 2 йил давомида бошланғич синф ўқитувчиси бўлиб ҳам ишлаган. Хозирда Янгиер шаҳар “Наврўзобод” маҳалласида истиқомат қилувчи Абдурасул ота 8 фарзанднинг отаси ва 20 га яқин неваранинг жонажон бобоси ҳисобланади.

Узоқ жойларга велосаёхат қилиб чиниққан отахон бундан аввал ҳам яъни, 2017 йилнинг август ойида велосипедда водийга саёҳат қилиб, Андижон, Марғилон, Фарғона, Наманган ва Қўқон шаҳарларини зиёрат қилиб қайтган.  

Ўзбекистон “Адолат”СДП Сирдарё вилоят Кенгаши матбуот хизмати