Ўзбекистонда қайси соҳаларнинг вакиллари кўпроқ коронавирусга чалингани айтилди

АОКА ҳузуридаги штабда бўлиб ўтган брифингда Коронавирусга қарши кураш штаб аъзоси Барно Одилова Ўзбекистонда қайси соҳа вакиллари ўртасида коронавирусга чалинганлар кўпроқ эканлигини маълум қилди, дейилади «Дарё» хабарида.

Жумладан, аҳолидан келиб тушган «Ҳозирги кунда COVID-19 билан қайси соҳа вакиллари энг кўп зарарланганини айтсангиз. Шунингдек, қайси соҳа вакиллари касалликнинг оғир кўринишидан азият чекмоқда?», — деган саволга мутахассис қуйидагича жавоб берган:

«Касалликнинг оғир ёки енгил кечиши бирор касбга боғлиқ эмас. Бу одамнинг организмидаги иммунитет ҳолати, сурункали касалликларининг оғир ёки енгил даврилигига жуда ҳам боғлиқ. Бугунги кундаги таҳлиллар шуни кўрсатадики, касалликнинг 30% хориждан келганлар орасида, 17% улар билан мулоқотда бўлганлар, қолаверса, ҳайдовчилар, ишлаб чиқариш, савдо ва хизмат кўрсатиш соҳалари ходимлари ҳамда уй бекалари орасида қайд этилган».

Шунингдек, фуқароларнинг мамлакатдан ташқарига чиқмаган бўлса ҳам, улар билан мулоқотда бўлганлар жуда кўплиги, айнан улар ўзларининг касалликка чалинганини билмаган ҳолда сабабсиз кўчаларга чиқиши, турли оилавий тадбирлар ўтказиши, меҳмонга келиб-кетиш орқали ҳам уй бекалар орасида жуда кўп қайд этилгани таъкидланди.

Эслатиб ўтамиз, Ўзбекистонда коронавирус билан боғлиқ вазиятнинг кескинлашаётгани сабабли 10 июлдан 1 августгача мамлакатда қатъий карантин чоралари жорий қилинган. 10 июлдан тўйлар, оилавий ва оммавий тадбирлар тақиқланди, автотранспорт ҳаракати чекланди, буюм бозорлари ва болалар боғчалари ёпилди, халқаро авиақатновлар икки бараварга қисқартирилди.