240 000 дан ортиқ киши “Абитуриент рухсатномаси”ни онлайн юклаб олган
@Sirdaryo
20 июль куни 2019/2020 ўқув йили қабули учун рўйхатдан ўтган ва тест синовларида иштирок этадиган абитуриентларга қулайлик яратиш мақсадида Давлат тест маркази томонидан “Абитуриент рухсатномаси” ва “Абитуриентларга эслатма”ни онлайн олиш имкониятини берувчи ruxsatnoma.dtm.uz сайти яратилиб ишга туширилган эди.
Марказ ахборот хизматининг хабарига таяниб, ЎзАнинг хабар беришича, ҳозирга келиб 240 000 дан ортиқ абитуриентлар мазкур сайт орқали “Абитуриент рухсатномаси”ни онлайн юклаб олди.
Эслатиб ўтамиз, ruxsatnoma.dtm.uz веб-сайтидан рухсатнома чиқариб олиш имкониятига эга бўлмаган абитуриентлар кундузги таълим шакли учун 23-26 июль кунлари, сиртқи ва кечки таълим шакллари учун 27-29 июль кунлари Давлат хизматлари марказлари, Олий таълим муассасалари қабул комиссиялари ёки Бандликка кўмаклашиш марказларига мурожаат этган ҳолда рухсатномаларини олишлари мумкин.
Ушбу муассасалар ходимлари томонидан “Абитуриент рухсатномаси” абитуриентларга бепул чоп этиб берилади.