Ғалаба яқин: Россияда коронавирусга қарши вакцинанинг клиник синови ниҳоясига етмоқда

Бурденко госпиталида COVID-19 га қарши Россия мудофаа вазирлиги иштирокида яратилган вакцинанинг клиник синови якунланмоқда, охирги кўнгиллилар гуруҳи ҳам касалхонадан чиқарилмоқда, деди Россия қуролли кучлари тиббий хизмат полковниги Сергей Борисевич «Красная звезда» газетасига берган интервьюсида. Бу ҳақда ЎзАда хабар берилмоқда.

«Вакцина Россия мудофаа вазирлиги ҳамда академик Гамалеи номидаги эпидемиология ва микробиология миллий тадқиқот маркази ҳамкорлигида яратилмоқда. Бугун ҳарбий госпиталдан 20 кишидан иборат кўнгиллиларнинг сўнгги гуруҳига жавоб берилади», – деди у.

Борисевичнинг таъкидлашича, энди олимлар қаршисида таҳлиллар, якуний ҳисоботлар, натижаларни тақдим этиш ва вакцинани давлат рўйхатидан ўтказиш каби катта ишлар кўндаланг турибди.

Айни пайтда вакцина ишлаб чиқариш билан дунёнинг юзлаб лабораторияси шуғилланишмоқда. Қарийб 140 та вакцина клиник синов босқичида бўлиб, ҳайвонларда синаб кўрилмоқда, тахминан 20 таси одамларда клиник синов босқичига етиб келди. Хитой ва АҚШнинг уч-тўртта гуруҳи клиник синовнинг сўнгги босқичини амалга ошираётгани ҳақида маълум қилмоқда.