“Коррупцияга қарши курашиш бугунги кун талаби”
@hokimiyatpress
Бугунги кунда мамлакатимизда карантин вазиятини инобатга олган ҳолда Марказий банк Сирдарё вилояти Бош бошқармаси томонидан 2020 йил 7 июль куни масофадан "ZOOM" программаси орқали ҳудудий Бош бошқарма ҳамда тижорат банкларининг масъул ходимлари ўртасида “Коррупцияга қарши курашиш бугунги кун талаби” мавзусида семинар ўтказилди.
Ушбу тадбирда вилоятдаги банк тизими ходимларига “Коррупцияга қарши курашиш тўғрисидаги қонун ҳужжатлари, касбий одоб-ахлоқ қоидаларига риоя этиш, манфаатлар тўқнашувини бартараф қилиш ва коррупциянинг олдини олиш бўйича чора-тадбирлар” тўғрисида тегишли тушунтиришлар берилди.
Хусусан, банк тизимида коррупцияга қарши курашиш соҳасида амалга оширилаётган чора-тадбирларнинг самарадорлигини оширилишини таъминлаш ҳамда коррупция кўринишларининг сабаб ва шарт-шароитларини бартараф этиш бўйича тегишли чора-тадбирлар амалга оширилиши кераклиги қайд этилди.
Шу билан бирга, семинар қатнашчиларига ҳозирги кунда банк тизими ходимларининг ҳуқуқий онгини юксалтириш, банклар ва уларнинг мансабдор шахслари ҳамда ходимлари томонидан банк мижозларига, шу жумладан кичик бизнес ва хусусий тадбиркорлик субъектларига хизмат кўрсатишда ишбилармонлик ва касб одоб-ахлоқига риоя этишлари, уларнинг касбий маҳорати, шунингдек улар фаолиятини Конституцияга, қонунларга ва бошқа меъёрий-ҳуқуқий ҳужжатларга қатъий риоя этиш, фуқароларнинг ҳуқуқ ва эркинликларини ҳурмат қилиш руҳида тарбиялаш кераклиги тўғрисида алоҳида таъкидланди.