СЕНАТНИНГ ЯЛПИ МАЖЛИСИДА ЮРТБОШИМИЗ ТОМОНИДАН БЕЛГИЛАБ БЕРИЛГАН УСТУВОР ВАЗИФАЛАР

Жорий йилнинг 29 июнь куни вилоят ҳокимлиги мажлислар залида муҳтарам Президентимиз Шавкат Миромонович Мирзиёевнинг 21 июнь куни Сенатнинг йигирманчи Ялпи Мажлисидаги маърузасида белгилаб берилган устувор вазифалар ва мазкур мажлисда маъқулланган қонунлар ҳамда кўриб чиқилган бошқа масалалар юзасидан қабул қилинган қарорларнинг мазмун-моҳиятини аҳолига етказиш мақсадида йиғилиш бўлиб ўтди.

Йиғилишда вилоят ҳокими Ғ.Мирзаев, Ўзбекистон Республикаси Олий Мажлиси Сенатининг Халқаро муносабатлар, ташқи иқтисодий алоқалар, хорижий инвестициялар ва туризм масалалари қўмитаси раиси сенатор А.Курманов ҳамда вилоят депутатлари, тегишли корхона ва ташкилот раҳбарлари иштирок этди.

Йиғилишда вилоят ҳокими Ғ.Мирзаев сўзга чиқиб, Юртбошимиз томонидан давлат ва жамият қурилиши тизимини такомиллаштириш, қонун устуворлигини таъминлаш, миллий иқтисодиётимизни ривожлантириш ва либераллаштириш, ижтимоий соҳани янада ривожлантириш, хавфсизлик, миллатлараро тотувлик ва диний бағрикенглик муҳитини мустаҳкамлаш, самарали ташқи сиёсат олиб боришдек устувор йўналишлари асосида ишни тизимли ташкил этишга алоҳида эътибор қаратиш кераклигини қайд этиб ўтди.

Шунингдек, сенатор А.Курманов сўзга чиқиб, Сенатнинг Ялпи Мажлисида Президентимизнинг бевосита иштирок этиб нутқ сўзлаб сенаторлар олдига аниқ вазифалар қўйгани, тарихда биринчи маротаба Олий Мажлис юқори палатаси раислигига аёл киши сайлангани ҳақида тўхталиб ўтди.

Йиғилишда вилоятимиз сенаторлари, фаоллари сўзга чиқиб, ўз фикр ва мулоҳазаларини билдиришди.

Вилоят ҳокимлиги ахборот хизмати