Эшитиш ва нутқида муаммоси бўлган шахсларни ижтимоий қўллаб-қувватлаш диспетчерлик хизмати иш бошлайди
@Sirdaryo
1 июлдан Ўзбекистон Республикаси Фавқулодда вазиятлар вазирлигида эшитиш ва нутқида муаммоси бўлган шахсларни ижтимоий қўллаб-қувватлаш диспетчерлик хизмати ўз фаолиятини бошлайди. Бу ҳақда Ўзбекистон Республикаси Фавқулодда вазиятлар вазирлиги маълумотига таяниб, ЎзА хабар бермоқда.
Мазкур хизмат Ўзбекистон Республикаси Президентининг 2019 йилнинг 19 март кунидаги “Эшитиш ва нутқида муаммоси бўлган шахсларни ижтимоий қўллаб-қувватлашга оид қўшимча чора-тадбирлар тўғрисида”ги қарори асосида ташкил этилди. Янги ташкил этилган хизматга профессионал сурдо таржимонлар ишга қабул қилинди. Агарда эшитиш ва нутқида муаммоси бўлган шахслар кўнгилсиз ҳолат ёки қийин вазиятга тушиб қолиб, ёрдамга муҳтож бўлсалар Фавқулодда вазиятлар вазирлигида барча зарурий алоқа воситалари билан жиҳозланган диспетчерлик хизматига мурожаат қилишлари мумкин.
Диспетчерлик хизматининг асосий вазифаси этиб, эшитиш ва нутқида муаммоси бўлган шахслар, шунингдек, уларнинг вакиллари томонидан техник воситалар (видео қўнғироқлар, матнли хабарлар, махсус дастурий таъминотдан фойдаланган ҳолда қўнғироқлар ва бошқалар) орқали бўладиган мурожаатларга шошилинч тезкор хизматларнинг (101, 102, 103, 104, 1050) кечаю кундуз, жавоб беришларини мувофиқлаштирган ҳолда таъминлаш белгиланган.