Тадбиркорга кўмак берилмоқда
@SirdaryoДавлатимиз раҳбарининг шу йилнинг 18 майдаги “Коронавирус пандемияси даврида аҳоли ва тадбиркорлик субъектларини қўллаб-қувватлаш бўйича навбатдаги чора-тадбирлар тўғрисида”ги Фармони ижросини таъминлаш мақсадида жойларда тадбиркорлик субъектлари иштирокида учрашувлар ташкил этилмоқда.
Бугунги кунда Сирдарё вилоятида 12 мингдан ортиқ тадбиркорлик субъектлари рўйхатдан ўтган бўлса, пандемия туфайли эълон қилинган карантин шароитида 4819 та яқин тадбиркорлик субъектлари иш фаолиятларини тўхтатишларига тўғри келди. Олиб борилган ўрганишлар ва кўрилган тезкор чора-тадбирлар натижасида бугунги кунда тўхтаб қолган 2853 та корхона фаолияти қайта тиклади. Шунингдек, ҳозирда 2000 га яқин тадбиркорлик субъектлари ўз ишларини давом эттириш арафасида. Уларга бу борада яқиндан кўмак бериш мақсадида вилоят прокуратураси томонидан ишчи гурух тузилиб, жойларда ўрганиш ишлари олиб борилмоқда.
Жумладан, вилоят прокурори Р.Машарипов Сайҳунобод туманида тадбиркорлар билан бўлиб ўтган учрашувда ҳар бир тадбиркорнинг муаммолари синчиклаб ўрганилди ва уларнинг амалий ечимини топиш чоралари кўрилди.
Коронавирус инфекцияси тарқалишини олдини олиш борасида ўрнатилган карантин чоралари туфайли “Бахт текс фарм” масъулияти чекланган жамияти бир муддат иш фаолиятида сусайиш кузатилди. Лойиҳа қиймати 6 миллион доллар бўлган корхона тўлиқ махаллий хом ашё асосида ишлайди ва 50 турдан ортиқ махсулот тайёрланади. 500 нафарга яқин маҳаллий аҳоли доимий иш билан банд. Вилоят прокуратурасининг амалий кўмаги билан корхона бугунги кунда зарур бўлган целюллоза, тиббий боғлов ва антисептик воситалар, гигиеник ниқобларни ишлаб чиқаришни йўлга қўйди.
Ўрганишлар натижасида корхонада бўш турган бинолар мавжудлиги аниқланди. Зарур ускуналар билан жихозлантирилгач яна қўшимча 50 нафар махаллий ёшлар иш билан таъминланди. Натижада кунига 10 минг дона юз ниқобларини тайёрлаш йўлга қўйилди. Ҳозирги аҳолининг эхтиёжларидан келиб чиқиб корхонада яна 60 иш ўринларини яратиш режалаштирилган. Прокуратура томонидан бу борада ҳам амалий ёрдам кўрсатилади.
Пандемия туфайли иш фаолитини тўхтатаган тадбиркорлик субъектларига амалий ёрдам кўрсатиш мақсадида вилоят прокурори томонидан Сирдарё туманида ҳам учрашув ўтказилди.
Хусусан, ушбу учрашувда тадбиркорлардан 13 та мурожаатлар келиб тушди ва 7 таси жойида ҳал қилинди. Қолган мурожаатларнинг тез кунларда кўриб чиқилиши юзасидан масъул раҳбарларга топшириқлар берилди.
Тадбиркорни қўллаб-қувватлаш бу минглаб янги иш ўринларини яратиш, Ўзбекистоннинг халқаро майдонда нуфузини ва иқтисодиётини кўтариш, муҳими халқимиз дастурхонини тўкин-сочинлигини таъминлаш, одамларнинг турмуш фаровонлигини оширишда муҳим омил бўлиб хизмат қилади.
Сирдарё вилоят прокуратураси