Ҳарбийларимиз барака топсин

“Сардоба” сув омборидаги ўпирилиш натижасида юзага келган сув тошқини Сардоба, Мирзаобод, Оқолтин туманларидаги 10 та аҳоли пунктидаги турар-жойлар, ички ва ташқи йўллар ҳамда тошқин қаршисида учраган барча мавжуд кўприклар бузилган эди.

Бугунги техника ривожланган вақтда, кичик, ихчам ва чоғроқ автомобиллар ёки пиёдалар ўтиш кўприкларини тиклаш у қадар кўп вақт талаб қилмайди. Аммо йирик ва узун кўприкларни қайта тиклаш анчагина вақт талаб этади.

Тошқин оқибатида Мирзаобод туманидаги Навбаҳор ва Баҳористон маҳаллаларини боғлаб турувчи 50 метрлик кўприк ҳам вайрон бўлган эди. Баҳористон аҳолиси Навбаҳор маҳалласига, навбаҳлорликлар баҳористонлик оғайнилариникига, шундоққина биқинларидаги жойга ўтишлари учун тошқиндан сўнг, оз эмас-кўп эмас 150 километрлик йўл босишларига тўғри келиб анча қийналишаётган эди.

Тикланиш, тозалаш ишларида фаол иштирок этаётган Ўзбекистон Қуролли Кучлари томонидан қисқа фурсатда янги понтон кўприги қуриб битказди ва фойдаланишга топширди.

Ҳар икки маҳалла аҳолиси “Ҳарбийларимиз, барака топишсин!” дея дуо қилмоқда.

А.ҚАЮМОВ, Ф.ТОШМАТОВ (сурат), ЎзА