ХОРАЗМ ВИЛОЯТИДАН КЎНГИЛЛИ ҚУРУВЧИЛАР САРДОБАГА КУЗАТИЛДИ
@SirdaryoСардоба сув омбори ҳудудида юз берган кўнгилсизлик ва юртдошларимиз бошига тушган талафот ҳеч бир соҳа вакилини бефарқ қолдирмади. Инсонийлик тамойиллари асосида халқимиз бир-бирини қўллаб-қувватлаганлиги барчамизга аён. Шу сабаб, Сардобадаги хавф-хатар ортда қолиб, вазият анча барқарорлашган айни пайтда, аҳолининг турмуш шароитини яхшилашга қаратилган саъй-ҳаракатлар жадаллик билан давом этмоқда. Миллий гвардия Хоразм вилояти бўйича бошқармасига бириктирилган 6-сектор ҳудудида жойлашган Урганч туманининг кўнгилли фуқаролари, қарантин талабларига тўлиқ риоя қилинган ҳолда Сардоба туманидаги аҳоли учун фаровон ҳаётни қуришга кўмаклашиш мақсадида кузатилди.
Ушбу хайрли ва эзгу амал доирасида 2 та автобусда йўлга отланган 60 нафар қурувчидан иборат гуруҳ Миллий гвардия ходимлари назорати ҳамда кўмаги остида кузатилди.
Яхши кунларни биргаликда баҳам кўриш, оғир кунларда суянчиқ ва мададкор бўлиш каби қадриятлар бизга ота-боболардан мерос. Бир ёқадан бош чиқариб курашган ҳолда ҳар қандай синовни енгиб ўтишга қодирмиз.
Таъбир жоиз бўлса, айтиш мумкинки, халқимиз бошидан кечираётган айни синовли кунларда ҳамжиҳатлик, меҳр-оқибат, бирдамлик каби эзгу фазилатларнинг қон-қонимизга сингиб кетганлиги, келажакка умид, яшашга бўлган иштиёқни кучайтирса кучайтирадики, фуқароларимизнинг сабр-бардошини енга олмайди.
Ўзбекистон Республикаси Миллий гвардияси