Сирдарёда кадрлар билан ишлаш бўлинмалари раҳбарлари малака оширмоқда
@SirdaryoЎзбекистон Республикаси Президенти ҳузуридаги Давлат хизматини ривожлантириш агентлиги ташаббуси билан Давлат бошқаруви академияси билан ҳамкорликда Сирдарё вилоятидаги давлат органлари ва ташкилотларининг кадрлар билан ишлаш бўлинмалари раҳбарлари учун 2022 йил 2-5 март кунлари 40 соатлик махсус малака ошириш курслари ташкил этилди.
Ўқувлар давомида масъулларга 2022-2026 йилларга мўлжалланган Янги Ўзбекистоннинг тараққиёт стратегияси мазмун-моҳияти, республикада кадрлар сиёсати ва давлат фуқаролик хизмати соҳасидаги туб ўзгаришлар, вакант лавозимларга очиқ мустақил танловлар ўтказиш жараёнида юзага келаётган муаммолар ва уларнинг ечимлари, шунингдек, меҳнат муносабатлари ҳақида тушунча берилмоқда.
Машғулотлар Давлат бошқаруви академиясининг профессор-ўқитувчилари, Давлат хизматини ривожлантириш агентлиги ҳамда бошқа ташкилотларнинг масъул мутахассислари томонидан тренинг, маъруза ҳамда вебинар шаклида ташкил этилган.
Ўқув курслари кадрлар билан ишлаш бўлинмалари раҳбарларининг назарий билим ва амалий кўникмаларини ошириш ҳамда салоҳиятини янада ривожлантиришга кўмаклашмоқда.
Ўзбекистон Республикаси Президенти ҳузуридаги Давлат хизматини ривожлантириш агентлиги Сирдарё вилояти филиали