Ховосда ташкил этилган ҳашар яшил оламнинг кенгайиши, атроф-муҳит мусаффолигига хизмат қилади
@SirdaryoПрезидентимиз Шавкат Мирзиёев томонидан илгари сурилган “Яшил макон” умуммиллий лойиҳаси юртимиз бўйлаб янги боғ-роғлар барпо этиш ва теварак-атроф мусаффолигини таъминлашда муҳимлиги билан аҳамиятлидир.
Ховосда мазкур лойиҳанинг баҳор мавсуми доирасида 1 миллион 403 минг тупдан зиёд мевали ва манзарали дарахт кўчатлари экиш режалаштирилган.
Бугун Ўзбекистон тўкинчилиги маҳалласида ташкил этилган ҳашар ҳам ушбу лойиҳанинг амалий давоми бўлди.
Туман ҳокими ҳамда унинг ўринбосарлари, давлат ва жамоат ташкилотлари вакиллари, ёшлар, маҳалла аҳолиси ҳамда кенг жамоатчилик иштирок этган ҳашарда йўл ёқасида мўжазгина боғ яратилди. Унда тут, терак каби 1 минг тупдан зиёд мевали ва манзарали дарахт кўчатлари ўтқазилди. Экилган кўчатларга зиён етмаслиги учун оҳак билан ишлов берилди.
Бу хайрли ташаббус қадим анъаналаримиз, қадриятларимизга ҳамоҳанг. Ота-боболаримиз фарзанд тарбиялаётганда “бир дарахт эксанг, унинг меваси, соясидан баҳраманд бўлганлар сени дуо қилади”, деб ўргатган.
Шу боис, бу эзгу амал нафақат яшил оламнинг кенгайиши, атроф-муҳит мусаффолигига хизмат қилади, балки, ёш авлод тарбиясида ҳам муҳим аҳамиятга эга.
Ховос тумани ҳокимлиги Ахборот хизмати