Боёвут туманида қишки агротехник тадбирлар қизғин жараёнда

Қиш ҳам иш фасли деганларидек, қишлоқ хўжалиги ходимларининг қиш ойларида ҳам ўзига яраша юмушлари мавжуд. Бунда асосан агромелиоратив тадбирлар ўтказиш жорий йилда олинадиган мўл ҳосилга замин яратади. Кузги-қишки тадбирларини ўзаро уйғунликда олиб бориш, экин ерларининг унумдорлигини оширишга хизмат қилади. Хусусан шўрланган ерларда сифатли шўр ювилиш асосий тадбир ҳисобланади.

Жорий 2020 йил ҳосили учун туманда жами 10500 гектар майдонга чигит экиш режалаштирилган. Ҳозирга қадар ушбу майдонда кузги шудгорлаш ишлари тўлиқ якунланиб, шундан 5220 гектарига пол олинмоқда. Пол олишда юқори унумли К-700 русумли трактор имкониятларидан самарали фойдаланилмоқда. Бу эса ўз навбатида пол олиш сифатига ўзининг ижобий таъсирини кўрсатади. Қолган 5280 гектарда пушта олиш ҳам бошлаб юборилган.

Агротехник тадбирларни пухта тайёргарлик, юқори ташкилотчилик ва уюшқоқлик билан ташкил қилинганлиги натижасида ҳозирга келиб, пол олиш ишлари 80 фоизга яқинлашди.

Шу ўринда таъкидлаш керакки, туманимизда ерни чигит экиш учун тайёлашда бу йилга пушта олиш тадбирлари ҳар йилгидан вақтлироқ бошлаб юборилди. Пушта олишда эса Боёвут туманининг ўзи хос иқлими ҳам инобатга олинган. Бунда боёвутлик бобо деҳонларнинг кўп йиллик бой тажрибаларига таянган ҳолда жорий йил баҳор ойининг ёғингарчиликсиз келиш эҳтимоли ҳамда шамол таъсирида намликни йўқотмаслик мақсадида пушталар нисбатан чуқур қилиб олинишига алоҳида эътибор қаратилмоқда.

Пол олиш ишлари якунланган далаларда пешма-пеш яҳоб суви қуйилмоқда. Шўр ювишга жалб қилинган сувчиларнинг иш ҳақларини ўз вақтида бериш билан бир қаторда уларга махсус кийим-кечаклар ҳам таъминланди. Шунингдек, сувчиларнинг иш самарадорлигини янада ошириш мақсадида даланинг ўзида иссиқ овқат ташкил этилган.

Юқоридаги агротехник табдирлар билан бир қаторда ўтган йилнинг кузида экилган ғаллани парваришлаш билан боғлиқ тадбирлар ҳамоҳанг равишда амалга оширилмоқда.

Туманда 2020 йил ҳосили учун 14 700 гактар майдонга ғалла экилган бўлиб,

ҳозирда экилган ғалла майдонларини озиқлантириш, маҳаллий ўғит чиқариш ҳамда чилла суви бериш тадбирлар амалга оширилмоқда.

Жумладан, "Гулистон парранда" корхонасидан ғалла майдонларига маҳаллий ўғит чиқарилди. Мазкур тадбирларга 75 та тиркама ва 26 та юк машиналари жалб қилиниб, бир кунда ўртача 450-500 тонна ўғит дала майдонларига етказилди. Бундан ташқари кечки ғалла майдонларига олимлар ва соҳа мутахассисларининг тавсияси билан ҳар гектарга 100-150 кг азотли минерал ўғитлари ҳисоб-китоб қилиниб, бир кунда 1500-1600 гектаргача бўлган майдонлар озиқлантирилмоқда.

Кузги буғдой экилган майдонлардаги ғўзапояни йиғиб олиш учун фермер хўжаликларининг ишчиларидан иборат отрядлар ташкил этилиб, уларга дала майдонининг ўзида зарур шарт-шароитлар яратилган, 32 та ғўза ўриш учун мўлжалланган техникалар жалб қилинган.

Туман ҳокимлиги томонидан кузги-қишки агротехник тадбирлар, жумладан шўр ювиш, ғаллани маҳаллий ва азотли ўғит билан озиқлантириш, шунингдек, боғ ораларига ишлов бериш ишларини назорат ва мониторинг қилиш учун ишчи гуруҳ тузулиб, ҳар куни туман ҳокими раҳбарлигида тегишли мутасаддилар иштирокида муҳокама қилинмоқда.

Жорий деҳқончилик йилини ўзгача иштиёқ билан бошлаган боёвутликлар йиллар давомида йиғилган бой тажрибага таянган ҳолда барча агротехник тадбирларни белгиланган муддатларда бажариб, ғалла ва пахтадан мўл ҳосил олишга бел боғлашган.

Боёвут тумани ҳокимлиги Ахборот хизмати