Сув тежайдиган суғориш технологияларини амалиётга жорий этиш бугунги кун талаби

Жорий йилнинг 10 январь куни Сирдарё туманида сувни тежайдиган суғориш технологияларини амалиётга янада кенгроқ жорий этиш масалаларига бағишланган кўргазмали амалий семинар бўлиб ўтди.

Тадбирда Сирдарё вилоятидаги қишлоқ хўжалигига ихтисослашган туманларининг қишлоқ ва сув хўжалиги масалалари бўйича ўринбосарлари, фермер хўжаликлари раҳбарлари, қишлоқ хўжалиги экинларини етиштирувчи кластерлар агрономлари ва мутасадди ташкилотларнинг вакиллари иштирок этди.

“PЕNG SHЕNG” Ўзбекистон – Хитой қўшма корхонасида бўлиб ўтган кўргазмали амалий семинарда Сирдарё тумани ҳокими Б.Мирзақулов, вилоят ҳокимининг қишлоқ ва сув хўжалиги масалалари бўйича ўринбосари А.Эргашев ва бошқалар Ўзбекистон Республикаси Президентининг 2020 йил 11 декабрдаги “Қишлоқ хўжалигида сувни тежайдиган технологияларни жорий этишни янада жадал ташкил этиш чора-тадбирлари тўғрисида”ги қарори ижросини таъминлаш мақсадида Сирдарё вилоятида ҳам кейинги йилларда қишлоқ хўжалиги экинларини етиштиришда сувни тежайдиган технологияларни жорий этишга алоҳида эътибор қаратилаётганини, лекин бу сув йилдан-йилга тақчил бўлиб бораётган пайтда етарли эмаслигини, сув ресурсларига бўлган эҳтиёж борган сари кучайиб бораётганини, қишлоқ хўжалигида сувдан фойдаланиш самарадорлигини кескин ошириш бугунги куннинг энг долзарб масалаларидан бири эканини, шу сабабдан ҳам сув манбаларидан оқилона фойдаланиш, суғоришда янги тежамкор технологияларни қўллаш барча турдаги қишлоқ хўжалиги маҳсулотларни етиштиришда муҳим омил бўлиб, хизмат қилишини алоҳида таъкидлади.

Тадбир давомида қурғоқчил туманларда экинларни сувни тежайдиган технологиялар кенг фойдаланган ҳолда суғоришни жорий этиш бўйича амалга оширилаётган агротехник тадбирларнинг бориши ва янги суғориш тизимининг афзалликлари хусусида ҳам атрофлича фикр-мулоҳазалар билдирилди.

Семинар доирасида иштирокчилар – “PЕNG SHЕNG” Ўзбекистон – Хитой қўшма корхонасининг сувни тежаб суғорадиган агрегатлар ҳамда унинг бутловчи технологияларини ишлаб чиқарувчи “AGRO TЕXNOLOGY” компаниясига ташриф буюрди. Бу ерда ушбу соҳанинг етук мутахассислари томонидан тадбир иштирокчиларига корхонада ишлаб чиқарилаётган сув тежайдиган технологияларнинг афзалликлари, агрегатларнинг ишлатиш тартиб-тамоилларини кўргазмали равишда намойиш этилиб, қурилмалар тўғрисида батафсил маълумотлар берилди.

Вилоятида кейинги йилларда томчилатиб суғориш ишларини нафақат пахтачиликда, балки боғдорчилик, сабзавот ва полизчиликда ҳам кенг кўламда амалга ошириш режалаштирилмоқда.

Кўргазмали амалий семинар иштирокчиларининг Сирдарё туманидаги сувни тежайдиган технологиялар орқали суғоришга ихтисослашган боғдорчилик фермер хўжалигига ташрифи ҳам шу ишни амалда кўрсатиш мақсадида уюштирилди. Бу ерда тадбир ташкилотчиларига сувни тежайдиган технологияларни ўрнатувчи – кичик лойиҳа гуруҳи, сув тармоғи ва ҳовуз тиндиргичларни тайёрловчи гуруҳ, насос, трансформатор ва фильтр қурилмаларини ўрнатувчи ҳамда бош қувур ва сув тарқатувчи қувурларни монтаж қилувчи гуруҳлар ишчи-мутахассислари томонидан амалий иш жараёнида кўргазмали равишда намойиш этиб берилди. Шунингдек ушбу сувни тежайдиган технологияларининг қандай ишлатиш ва ишлаши ҳам амалда намойиш этилди.

Тадбир сўнгида семинар иштирокчилари ўзларини қизиқтирган барча саволларга мутахассислар томонидан батафсил жавобларни олдилар.

А.ҚАЮМОВ, ЎзА