Мен уйда қолдим, тафаккур қилдим...
@SayxunobodXabarlari
Халқ дардига, келажагига бефарқ бўлмаган ҳар бир ватандошимизни ўйлатади, инсоният бошига тушган кичик зарра тўфони. Менинг,Сизнинг кўнглингизни оғритаётган, кўзларингизга уйқу бермаётган дард бугун минглаб иймонли юртдошларимизнингда қалбларига азоб бермоқда. Одамлар, Аллоҳимдан, Она табиатдан кечирим сўраб ибодатдалар, рўзадалар, жойнамоздалар, хайру -эҳсондалар. Кимлардир ўтган умри учун пушаймондалар... Яна кимлардир иши кўплигидан қўнғироқларига жавоб бера олмаган дўсту ёридан, жигарларидан, якшанбани кута -кута соғинчдан юзлари сарғайган ота- онасидан, оиласидан, неча хайиту байрамларда кўзлари тўрт бўлиб кутган опа- синглиси, хола- аммасидан кечирим сўраётгандир. Мана энди соатлаб телефонда суҳбатлашишга вақт бору, афсуски бизни ўша вақти соғинган инсонимиз йўқ. Мана ҳафтанинг душанбасидан жумасигача дам олиш кунига айланган онлар.Вақт бор, пул бор, лекин дийдорлашмоқнинг имкони йўқ.Бизни соғинган, биз энди соғинаётган яқинларимизнинг уволидамиз... Афсуслар бўлсинки орамизда ён қўшнисининг кимлигини билмай, танимай, танишишга имкон ҳам изламаганлар қанча... Ҳайиту, байрамларда, бемор бўлган инсонга зор, оқибатга зор бўлган дамларида бир эшик қоқиб бормаган қўшнисининг эшигини таққиллатиб, бирга бир пиёла чой ичишига зор эмасмикан.Одам тафтини одам олишини англатадиган кунлар бўлмоқда. Айнан бугун дабдабали тўйларимизда эсламаган қўшнию маҳалладошимизга, чин дўстимизга, охирги манзилимизга кузатадиган мана шундай азиз инсонларимизга бугун зормиз, нега? Исрофгарчиликка бисёр, дабдабали тўйларга чек қўя олмаётгандик, мақтанишдан тийилолмаётгандик, эндичи маҳалламизу қариндошларга ихчамгина тўй қилишгада зормиз нега? Ниманики хор қилдик, бугун ўшанга зормиз. Кимларни асролмадик, ардоқламадик бугун зормиз... Кўраяпмизми? сезаяпмизми? зарра кичигу аммо кучли. У жамики онгли мавжудот бўлган инсониятни ҳаракатга келтирди, ҳаракатдан чеклади. Лоқайд бўлишга, фикр этмасликка, хулоса чиқармасликка ҳаққимиз йўқ. Зарра бизни, бутун ихтиролар, ғоялар эгалари, инсонларни Сизлар тилга олган чиллага солди. Зарра кучини ва ўзимизни, бизга эгизак хатоларимизни англаб етсакгина, хулоса чиқара олсакгина чиллани тарк этамиз. Бир-биримизни тинглайлик. Энг қоронғу туннингда -оппоқ тонги бор. Эзгу ният, эзгу амалларимиз билан биргаликда бир куч эканмиз, барчамизга оппоқ орзуларга, яхшиликларга тўла тонгни кутиб олмоқ насиб этади, иншааллоҳ. Барчангизнинг фикрингиз мен учун муҳим, мен учун мактаб... Саломатлик ва дуоларингиз ижобатини тилайман.
Гавҳар Хусанова,
Туман Кенгаши депутати
https://t.me/SayxunobodXabarlari