Савоб сўзин ишрат билан адаштирманг!
@SayxunobodXabarlari
Бир дўконнинг қаршисида уч-тўрт хотин,
Гурунглашиб кутар арзон ёғ навбатин.
Ўша ердан ўтиб қолди битта эркак,
Ҳудди шундан бошланади бизнинг эртак.
У аёллар ичра бири гўзал эди,
Ўзи ёшу, аммо сўзи масал эди.
Ўша эркак қараб секин ўнгу-чапга,
У аёлни қувлик билан солди гапга.
Деди: - Синглим, сизга раҳмим келди жуда,
Ўрнингизга куёв бола келмапти-да.
Аёл деди: - Эрим ўтган, бир болам бор,
Икки йилки бир ўзимга қолган рўзғор.
Eркак деди: - Қийналибсиз ғамлар ютиб,
Ёғ учун ҳам юрасизми навбат кутиб.
Навбат кутиб ёшлигингиз бўлар увол,
Eрга тегишингиз керак гулдай аёл.
Менинг уйим тўла емиш, ёғу унлар,
Омборхонам тўла мева, дону дунлар.
Икки уйда икки дона хотиним бор,
Истасангиз бўлинг менга учунчи ёр.
Аёл деди бир оз ўйлаб бир оз кулиб:
- Кундошларим қўйишсачи сочим юлиб?
Майлику-я икки хотин тинч ётишса,
Не қиламан деразамга тош отишса?
Eркак деди: - хотинларим билишмайди,
Билишмагач, тинч яшайсиз, уришмайди.
Ҳаммангизни тенг кўраман тоқат билан,
Висол туни уч кунда бир навбат билан.
Аёл деди кулгусини ичига ютиб:
- Ўларканман у ердаям навбат кутиб.
Машинага, уйга навбат кутган эдим.
Навбат кутиб кўз дўхтирдан ўтган эдим.
Аммо бундай кўчалардан ўтмаганман,
Ўғриликча эрга навбат кутмаганман.
Рози бўлсам, билмам, недан ютарканман.
У ердаям, бу ердаям кутарканман.
Уч кунда бир ёр кутгандан бўйним эгиб,
Бир ойда бир ёғ кутайин қомат кериб.
Eркак деди: - Тавба, бу не деганингиз?
Ахир кунда ош бўларди еганингиз.
Аёл деди: - Бу деганим берманг озор,
Ошқозоним тепасида Юрагим бор.
Eркак деди: - Мендаям бор ўша юрак,
Ростин айтсам, менга фақат савоб керак.
Ўнгимдаям, тушимдаям савоб дейман,
Уйимдаям, ишимдаям савоб дейман.
Аёл деди: - Кечиринг, эй яхши одам,
Бева экан мен-ла турган аёллар ҳам.
Ёшлари сал каттароғу меҳрга зор,
Керакмасми тўртинчи ё бешинчи ёр?
Шошмай туринг, уларни ҳам чақирайин,
Очилди бахтимиз дея бақирайин.
Суюнгандан ақиллари шошар эди,
Савобингиз беш баробар ошар эди.
Шунда эркак чин ниятин очиб кетди-
Машинасин юргиздию, қочиб кетди.
Муллакалар, ожизгина аёлдирмиз,
Балки калта ўю, калта ҳаёлдирмиз.
Орангизда сахий, ҳотам кишилар кўп,
Олам-олам эҳсон қилиб, олишмас чўп.
Чин саҳийлар муҳтожларга лаган-лаган,
Ош киргизиб, кимданлигин айтишмаган.
Хабар олиб қўшнисининг йўқ-боридан,
Кийим-кечак, нон ташлаган деворидан.
Марҳабо дер: - Бахту омад, қийинчилик,
Ҳамма нарса ўткинчидир, вақтинчалик.
Ўтинч: Бизни нафсингизга талаштирманг,
Савоб сўзин ишрат билан адаштирманг!!
https://t.me/SayxunobodXabarlari