#Samsung

Ҳамёнбоп Galaxy J6 Prime илк видеода: бармоқ изи сканери ён томонида, олд камера фоточақноқли.

Samsung компанияси модел рақамлари SM-J415F ҳамда SM-J610F бўлган иккита арзон смартфон тайёрлагани ҳақида хабар бергандик. Булар тегишлича Galaxy J4 Prime ва Galaxy J6 Prime тарзида тақдим этилиши кутилмоқда, иккинчисининг хусусиятлари ҳам маълум.

Galaxy J6 Prime русумли смартфоннинг техник жиҳатлари ҳақида тобора янги маълумотлар чиқиб келаётир. Уларга таянган 91mobiles ресурси қурилманинг ҳар томондан кўринишини акс эттирувчи макети видеосини тайёрлаган.

Шунингдек, мазкур видеода Samsung Galaxy J6 Prime’нинг аввал маълум бўлмаган бошқа жиҳатларини ҳам келтириб ўтишган. Агарда улар тўғри бўлиб чиқса, пластик корпусли ушбу смартфон microUSB порти ва қулоқчинлар учун стандарт аудиотирқишга, шунингдек қўшалоқ камерага эга. Дактилоскопик датчик масаласида эса жанубий кореяликлар Sony’дан ўрнак олиб, ушбу модулни корпуснинг ён қиррасига жойлаштиришган. Шунингдек, мазкур гаджет селфи ишқибозларига ҳам маъқул келади – унинг олд камераси фоточақноқ билан бойитилган. Олдинги маълумотларда Galaxy J6 Prime’нинг экрани 5,6 дюймлик, дейилаётган бўлса, янги хабарларда бу кўрсаткич 6 дюймга тенг, корпус ўлчамлари эса 161,6х77х8,2 миллиметрни ташкил этади.

Мана, лавҳани бирга томоша қиламиз:

https://www.youtube.com/watch?v=i4S8uf8GdXg

Техник хусусиятларига келсак, Qualcomm Snapdragon 450 процессорли ушбу смартфон тезкор хотираси 3/4, доимий хотираси эса 32/64 гигабайтлик талқинларда чиқади. Унинг тақдимот санаси аниқ эмас, лекин инсайдерлар бу смартфон айрим мамлакатларда Galaxy J6 Plus модели сифатида сотилишини ҳам айтишаётир. Samsung бу девайсига 210 АҚШ доллари миқдорида нарх белгилаши тахмин қилинмоқда.

Жанубий кореяликларнинг шу пайтгача бозорга чиқарилган аксарият русумлардаги мобил телефонлари эса Ўзбекистонда ҳам расмий кафолат билан сотилмоқда.