RADIO
*ALL INDIA RADIO AIZAWL*
*REGIONAL NEWS UNIT*
REGIONAL NEWS BULLETIN
HEADLINES (MORNING) - 27.12.2020
1. Khawvel puma hripui lengin Krismas lawmna a tibuai, Mizoramah pawh krismas ruai theh thawm hriat tur a awm lo.
2. Nimin khan Mizoramah Covid-19 hri kai 4 hmuhchhuah a ni.
3. Vawiin chawhma dar 11-ah Prime Minister Narendra Modi-a chuan All India Radio Mann Ki Baat programme kaltlangin thuchah a sawi leh dawn.
4. Europe ramah Covid-19 hri insiam danglam hmuh belh zel a ni.
<><><>
CHRISTMAS
Khawvel puma hripui lengin Krismas lawmna a tihbuai avangin, Mizoramah chuan ruai theh ni tura ngaih niminah khan Krismas ruai theh thawm hriat tur a awm lo.
Nimin kha sorkarin Krismas puala chawlha a puan, kohhran tam berin ruai an theh ni tura ngaih a nih laiin ruai theh an awm lova, Mizoram pumah boruak reh tak hnuaiah he hunpui hi hman a ni. Biakina Pathian biak inkhawm leh Krismas zaikhawm awm lo mahse chhungtin ten hripui avanga sorkar thupek zawmin khawlai chhuak lovin an remchan dan angin Krismas lawmna an buatsaih thung a ni.
Nimin kha urlawk ni leh Krismas ni ang thovin a reh hle a, kohhran hrang hrangte ruahmanna siam erawh a inang lova, Presbyterian kohhranah pawh veng hrang hrang tihdan a inang lo a, Hmun thenkhatah chuan tualchhung kohhranin Krismas thawhlawm tlingkhawm atangin sa an lei a, chu chu an kohhran mi chhungkaw tin hnenah an sem leh a. Kohhran thenkhat chuan Krismas sa leina tur chhungtin hnenah an pe bawk a ni.
Nimin khan Krismas puala Kohhran programme siam an awm hriat a ni lova, vengchhungah aurinna hmanga Pathian thu puangchhuak an awm thung a. Aizawl ah chuan Dawr inhawng a tlem hle a, mi chhuak vak pawh an tlem a khawlai a thawl hle. Dawr in hawng awmchhun pawh dawrtu an awm meuh lova, thawmhnaw dawr inhawng a awm mang lova ei leh in tur lam inzuar pawh dawrtu an awm tam lo hle.
(Corr & Lawngtlai PTC)
<><><>
FOREST
Khawbung leh a chheh vel chu khualzin hiptu tha tak tak tamna a nih avangin Mizoram sawrkarin Eco-Tourism lamah project te siama hmalak chhoh a tum tih Forest Environment & Climate Change Minister Pu TJ Lalnuntluanga chuan a sawi.
Pu TJ Lalnuntluanga hian nimin tuk khan Mizo Hlakungpui Mual a tlawh a, Mizo Hlakungpui Mual ngaw thing leh ram hmul leh nauban humhalh dan chungchangte sawiin Minister chuan hripui avangin Mizoram sawrkar chuan chhiah a hmuh tur ang a hmu pha lova, hmalakna tur ruahman an neih sa pawh duh angin an kalpui chak thei lo niin a sawi a. Boruak a that velehah chak zawka hmalak theih a inbeisei thu a sawi a. Khawbung leh a chheh vela hmun pawimawh tak takte chu tlawh-naawm zawka a awm theihna turin Eco-Tourism lama hmalakna tur ruahmanna pawh siam chhoh mek niin a sawi bawk.
Khaw hrang hrangin ngaw tha tak an humhalh te chu lawmawm a tih thu sawiin, a tam thei anga ngaw siam turin a chah a. Khawbung khawtlang hruaitute chuan Tuiaw zaua Khawbung Vanzau leh Bungzungte'n sazuk an humhalh chu inthlah pung chho zelin kumina Tuiaw zaua thlasik thlai chingtute thlai an eisak chungchanga harsatna an neih te, Khawbung Forest Rest House-a Chowkidar Quarters an mamawh thu te, leh Hlakungpui mual hungna an mamawh thu te an thlen a ni.
Minister hian Tuipuirala hmun pawimawh thenkhatte a tlawh kual nghal bawk a ni.
(Lalhlupuia Champhai PTC)
<><><>
COVID-19 TALLY
Nimina khan Mizoramah Covid-19 hri kai 4 hmuhchhuah thar a ni a, Lawngtlai district ami 2 leh Aizawl leh Lunglei district ami 1 ve ve hmuhchhuah thar a ni.
TrueNAT hmanga hmuhchhiah hi BSF mi pakhat, kum 30-a upa, Bihar atanga lo kal, anmahni hmuna khunghran lai mek, hri kai tih langchhuak lo a ni a. Rapid Antigen Test hmanga hri kai hmuhchhuahte chu Aizawl Hunthar vengah hmeichhia kum 58 upa, hri kai tih a lanchhuah avanga endik a ni a, hri a kaina chhui nghal a ni. Lawngtlai district-a Mampui khaw mi 2, Mipa kum 60 mi leh Hmeichhia kum 47 mi, hri kai mek atanga kaichhawng, hri kai tih lang chhuak lo an ni.
Niminah khan ZMC RT-PCR laboratory chu a ni hnihna atan khar a ni a, sample endik a awm lo.
(Desk/DIPR)
<><><>
SIAHA
Siaha District-a No Tolerance Drive ni 60-na niminah khan The Mizoram (Containment and Prevention of the Spread of Covid - 19) Act, 2020 bawhchhia mi 10 man leh an ni a, an mi mante atang sum chawitir tlingkhawm hi Cheng 1000 a ni.
No Tolerance Drive ni 60-na hman a nih chhungin Siaha District chhungah dan bawhchhia mi 1,629 man an ni tawh a, heng atanga pawisa fai tlingkhawm chu Cheng 1,66,700/- a tling tawh a ni.
Nimina Dan bawhchhetu te hi, The Mizoram (Containment and Prevention of the Spread of Covid-19) Act, 2020 a Section 4 hnuaia Sub-Section 1 bawhchhiate vek an ni.
(CZ Hluna Siaha PTC)
<><><>
AFC
Aizawl Football Club (AFC) Team chuan kumthara I-League khel tan turin nimin khan Lengpui tumhmun atangin Kolkata an pan a.
Tun season I-League hi Covid 19 avanga tan tlai a nih bakah a khelh dan phung pawh tihdanglam a ni a. Covid 19 Hripui avangin Home and Away a awm dawn lova, ISL pawh hmun khat- Goa-a an khel mai angin I-League pawh Kolkata-ah a match zawng zawng an khel dawn a ni.
Covid Hripui avangin Aizawl FC pawhin thla 2 dawn chu Mualpuia Rajiv Gandhi Stadium chhuahsan lovin an inkulh a, AIFF dan anga RT PCR tests an paltlang hnuah nimin khan AIFF dan anga Kolkata Hotel-a Ni 7 chhung inkhung hrang turin Kolkata an pan a, Ni 7 chhung an khung hran hnuah January ni 2 atangin practice an tan thei ang. Kumthar January 9 ah an khelh hmasa ber chu Minerva Punjab FC nen an khel dawn a ni.
Aizawl FC team te hi, team neitu, Sports Minister Pu Robert Romawia Royte chuan a vailiam a, Pathian tanpui tlaka nungchang tha neia thawhrim a pawimawh thu sawiin Players, Coach leh Manager tha an neih avangin champion ngei an tum tur a ni, a ti.
Sports Minister chuan Player te chu 5-Star hotelah thla 4 dawn an khawsak dawn avangin a lawmpui thu a sawi a, AIFF leh Club in duhsakna a pek avanga lawm thiam tur leh I-League an khelh tur chu ram leh hnam tan anih rualin anmahni mimal hmakhua atan a pawimawh zual a ni a ti.
He hunah hian AFC Board of Governors leh MLA ni bawk Pu H.Biakzaua pawhin AFC football khel thiamte chu hotute thu awih tur leh theih tawp chhuaha bei turin a fuih a, Team-te chu a tawngtaisak bawk.
Tun season 2020-21 ah hian I-League ah Team 11 an awm a, a champion chuan Trophy leh Medal bakah cheng nuai 100 an dawng a. Asian League-ah an kaisang thei dawn a ni. April 2021 ah I-League hi zawhfel hman tur a ni.
(DIPR)
<><><>
PM MODI TO SHARE HIS THOUGHTS IN 'MANN KI BAAT' PROGRAMME ON ALL INDIA RADIO AT 11 AM TODAY
Vawiin chawhma dar 11 hian Prime Minister Narendra Modi-a chuan All India Radio Mann Ki Baat programme kaltlangin thuchah a sawi leh dawn a. Tun hi Man Ki Baat programme vawi 72-na tur a ni.
Mann Ki Baat programme hi AIR leh Doordarshan zawng zawngah tihchhuah a ni ang a. AIR News website www.newsonair.com-ah leh newsonair Mobile Application-ahte pawh tihchhuah a ni bawk ang.
AIR, DD News, Prime Minister Office leh Information and Boradcasting YouTube channel-ahte a ruala tichhuah a ni dawn bawk a ni.
Prime Minister thusawi hi a zawh hunah All India Radio station hrang hrangte chuan mahni tawng theuha lehlin an tihchhuak zui ang a. Chumi vek chu zanin dar 8-ah tihchhuah nawn leh ani ang. All India Radio Aizawl pawhin Mann Ki Baat programme hi vawiin chawhma dar 10:55 am atangin a tichhuak tan dawn a. Hei hi a zawh hunah Mizo tawnga lehlin tihchhuah zui nghal a ni ang a. Chumi vek chu zanin dar 8-ah tihchhuah leh a ni ang.
(newsonair)
<><><>
MANIPUR REPORTS 33 FRESH CASES OF COVID-19
Manipur-ah darkar 24 kalta chhung khan Covid-19 hri kai 33 hmuhchhuah a ni.
Hemi hun chhung vek hian hri kai enkawl dam 84 chhuahtir an ni bawk a. Manipur-a Covid-19 hri kai enkawl dam tawh zat hi za-a 94.11 a tling tawh a ni.
Manipur-ah hian hri kai sing 2 sang 7 leh 976 an awm tawh a, an zing asing 2 sang 6 leh 331 chu enkawl dam an ni leh tawh a. Tunah hian enkawl lai 1301 an awm a. Mi 344-in an thihpui tawh a ni.
(newsonair)
<><><>
INDIA'S CUMULATIVE COVID-19 RECOVERIES HIGHEST IN THE WORLD, SAYS GOVERNMENT
Sawrkar chuan India chu khawvela Covid-19 hri kai enkawl dam chak ber a nih thu an sawi a. India rama hri kai enkawl dam tawh zat chu nuai 97 leh sing 5 chuang an ni tawh a ni.
Health Ministry chuan tuna India rama hri kai enkawl mek chu nuai 2 sing 8 leh sang 1 vel, za-a 2.77 an nih thu an sawi a. India rama Covid-19 hri kai enkawl dam tawh zat chu za-a 95.78 a ni tawh a ni. Ni 13 liamta atang khan ni khata hri kai hmuhchhuah zat chuan sing 3 a tling pha ngai ta lo bawk a ni.
Darkar 24 kalta chhung khan ram chhungah Covid-19 hri kai sing 2 sang 2 leh 272 hmuhchhuah a ni a. Hri kai hmuhchhuah tawh zat chu nuai 101 chuang an ni tawh a ni.
India rama Covid-19 thihpui chu hri kai zat atanga chhuta za-a 1.45 a ni a. Khawvelah a hniam ber a. Darkar 24 kalta chhung khan mi 251-in an thihpui a. Hei nen hian India rama hri kai thihpui chu nuai 1 sing 4 sang 7 leh 343 an ni.
(newsonair)
<><><>
MORE EUROPEAN COUNTRIES REPORT CASES OF NEW COVID VARIANT
Europe ramah Covid-19 hri insiam danglam hmuh belh zel a ni. Spain chu Europe rama hri insiam danghlam hmuhchhuah tharlam berna a ni rih a. Hri kai 4 hmuhchhuah an ni. Spain-in hri thar kai an neih thu an sawi hma lawk hian France pawhin hri thar kai an neih thu an puang bawk.
Spain khawpui Madrid-a Deputy Health Chief Antonio Zapatero chuan Madrid-a hri khai hmuhchhuah tharte hi tun hnaia UK-a zinte leh chumi khaihhnawi ami vek an nih thu a sawi.
Ram hrang hrangte pawhin he hri insiam danglam hi an rama hmuhchhuah a nih thu an lo sawi tawh hlawm a. Japan chuan Ningani khan hri kai mi 5 an hmuhchhuak a, UK atanga zin haw vek an ni. Hemi hma hian Denmark, Germany, Italy, Netherlands leh Australia-te pawhin an ramah Covid-19 hri insiam danglam an hmuhchhuah tawh thu an lo sawi tawh a ni.
(newsonair)
<><><>