RADIO
ALL INDIA RADIO AIZAWL
REGIONAL NEWS UNIT
REGIONAL NEWS BULLETIN
HEADLINES (EVENING) - 10.10.2021
1. Tun thla ni 30-a Tuirial assembly bial by-election lo awm turah Bru vote nei 663-te chungchangah Election Commission thutlukna hriat thuai beisei a ni.
2. Pawn chhuak thei lote hnena hri danna pe turin Mizoram sorkar a inbuatsaih mek.
3. Aizawl West-I Presbytery inkhawmpui a thurel pakhat Pathian biak inkhawm tihtlem rawtna chu hnawl a ni.
4. Union Power Minister, RK Singh-a’n ram chhungah kawlphetha indaihloh a awm dawn lo tih a sawi.
<><><>
QUIZ
Hei hi All India Radio, Aizawl a ni. Chanchin Thar kan ngaihthlak hmain Amrit Mahotsav Quiz result kan puang leh dawn a. Nizanah khan kan zawhna chu ‘Kum 1947 Aug. ni 15-a Red Fort-a Independence Day lawmnaa India hnam puanzar pawtpharhtu kha tunge?” tih a ni a, a pawtpharhtu chu Jawaharlal Nehru-a a ni. Mi engemawzat atangin chhanna kan dawng a, chung zinga chhanna dik rawn thawn hmasabertu chu Pu Zothankunga, kum 71, Aizawl Mission Veng a ni. Pu Zothankunga, kan lawmpui takmeuh che a, chhangtu dang zawng zawngte chungah pawh lawmthu kan sawi a.
Quiz hi tunkar Inrinni zan dar 6.30-ah kan nei leh ang a, min telpui leh vek turin kan sawm che u a ni.
(Desk)
<><><>
COVID ADVISORY
Sawrkar laipuiin a thlawna kum 18 chin chunglam Covid-19 hridanna a pek mekah ngaithlatute hridanna la vek turin kan ngen cheu a. Covid-19 laka invenna lamah lo inthladah lo ula. Inah tawm tlat ula, tul tawpah lo chuan lo pawnchhuak suh ang che u.
Hmai tuamna vuah, midang hnaih loh, kut leh hmai tihfai leh hridanna lakte ngaipawimawh ang che u.
Covid-19 kaihhnawiha hriat duh nei chuan rampum huap helpline number - 011-2397-8046 leh 1075 bakah Mizoram tan 102 te hi biak pawh theih reng a ni e.
(NewsOnAIR)
<><><>
BY-POLL
Tun thla ni 30-a Tuirial assembly bial by-election lo awm turah Bru vote nei 663-te chungchangah Election Commission thutlukna hriat thuai beisei a ni.
Joint Chief Electoral Officer Pu David Liansanglura Pachuau chuan Election Commission hnenah hian pawl hrang hrang leh political party hrang hrangte’n Tripura a inbengbel tawh ni si Tuirial bial electoral roll a hmingchuang mi 663-te hi an hming paih turin ngen a, chu chu election directorate pawhin a thawn thla a ni a ti a. Election Commission chhanna hi an hmuh thuai a rinawm thu a sawi a. Election Commission thu a awm hma chuan eng ruahmanna mah a siam theih loh a ni a ti.
Central YMA leh Kolasib Sub Headquarters YMA te chuan Bru vote neite hi an chhuk thlak hma a vote an neihna khua a vote an thlak dawn chuan vote thlak an dodal loh thu an sawi a. Tripura a vote thlaktir erawh chu an remti dawn lo tih an sawi a ni. Bru vote neite hi Hortoki Polling Station-ah 176 leh Zodin (Rastali) ah 487
Tuirial assembly bial by-election atan hian party 4 candidate-te’n an inchuh a, candidate-te’n an nomination thehluh chu naktuk hian endik a ni ang a, Thawhlehni khi inhnuhdawh theihna ni hnuhnung ber a ni ang.
Tuirial assembly bial a inthlan ţhat a ngaihna chhan hi ZPM-in independent an din tir zinga Pu Andrew H. Thangliana tun hnai a a thih vang a ni.
(Desk)
<><><>
LB SAILO’s DEMISE
Kohhran Thianghlim dintu Dr. Lalbiakmawia Sailo, kum 69 chu vawiin chawhnu khan Ebenezer Hospital-ah a thi a, A nupui Pi Lalzirliani leh a fate pali a kalsan a ni.
Dr. LB Sailo kal ţha lo, thisen sang leh zunthlum nei niin hun eng emaw chen chu heng a natna avang te hian enkawl a lo ni tawh a. Nikum aţang khan damdawiin te pawh lut zeuh zeuhin a chhuak leh thin a. Tunhnaiah thlakhat chuang deuh Ebenezer hospital-ah enkawl a ni leh a, vawiin hian a natna tuar lovin a thi ta a ni. Dr. LB Sailo hi naktukah Solomona Temple, Kidron Valley, Chawlhhmunah vui a ni ang.
Dr. LB Sailo hian kum 1984-ah Kohhran Thianghlim dinin Aizawl Chawlhhmun venga Kidron Valley-ah an hmunpui hi a awm a. He hmunah hian khualzin te pawhin an tlawh tam em em Solomona Temple chu kum 1996 khan a lung phum niin din a ni a. Dr. LB Sailo hi Kohhran thianghlimah hian Executive Committee Chairman dinhmun chelh mek a ni a. Hnathawhna lamah chuan ran doctor niin Animal Husbandry and Veterinary department-ah Director-in a pension a ni.
(Corr)
<><><>
VACCINATION
Pawn chhuak thei lote hnena hri danna pe turinMizoram sorkar a inbuatsaih mek.
State Immunisation Officer, Dr. Lalzawmi chuan kokim zawka Mizoram tuam chhuah tum mek a nih thua sawi a. Tunah hian Mizoram puma pawn chhuak thei lo, khum beta awm te leh ramtuileilo te chu a hmuna kalchilha hridanna pe turin hmalak mek a nih thu a sawi a. Hetah hian damlo nazawng erawh an pek theih loh thu leh pawn chhuak ngai lo, mamawh tak tak chauh pek an nih thu a sawi.
Dr. Lalzawmi chuan hridanna dose khatna la duh lo bur an la awm thu a sawi a, heng mite hian an lak duh theih na’n beihpui an thlak thu a sawi a. Hridanna la duhlo te finchhuaha an lak duh theihna tura puitu tur mobiliser an ruat thu leh naktuk aţanga training an pek dawn thu a sawi a. He’ng mite hian hridanna la duh mi pakhat an hruaiin Rs. 50 zel an hlawh dawn tih a sawi a, hridanna la duh lo burte tihngaihna vak a awm loh thu a sawi a. Insawiţhaih chingte pawh an la awm lehzel thu leh heng zingah hian sorkar hnathawk te pawh an tel ve nia an hriat thu a sawi a ni. Voter ID leh Aadhaar nei ve lo te tana hridanna an lak theihna tur ‘special session’ siam a nih thu a sawi bawk.
Mizorama kum 18 chin chunglam zingaza zela 60 point 78an tling tawh a ni.Covid-19 hri danna hi Zirtawpni thleng khana vaiin dose nuai 11, sing 5, sang 7 leh 114 pek chhuah a ni tawh a.Hri danna dose hmasa dawng hi mi nuai 6, sing 8, sang 6 leh 020 an ni a. Mizoramah hian kum 18 chin chunglam mi nuai 7, sing 7, sang 5 leh 106 awm anga chhutin za zela 88 point 51 chuan hri danna dose hmasa hi an la tawh tihna a ni a. Dose 2-na nena hri danna la kim tawh hi mi nuai 4, sing 7, sang 1 leh 094 an awm tawh a ni.
(Corr)
<><><>
COVID-19 UPDATE
Mizoram aCovid hri kai thar zat chuhmar chhak pumpui a hri kai za zela 68 point 86 zet a tling.
Nimina Mizorama hri kai hmuhchhuah 1,170chu India hmarchhak state 8 zinga Mizoramin a zawna ni 48chhung hri kai hmuhchhuah tam ber nihna a hauhna a ni a.Niminah khan Mizoramasample 6,188endik a ni a, heta ţanga chhutin hri kai zat hi za zela 18 point 91 zet a ni. Niminah khan hri kai hmuhchhuah tam lamah Mizoram hi India ramah palina a ni a. Hri kai dam lamah a tlem ber thung.Hri kai mek tam lamah Mizoramin hmarchhakah a ber nihna a chang rei ta hle bawk.
Vawiin tlai dar 5 thleng khan Covid-19 hri kai mi 1,256 chu an inenkawlna hmun hrang hrang aţangin an chhuak a. Heti hian hri kai dam leh tawh hi mi 89,614 an ni a, hri kai mek mi 14,700 an la awm mek. Hri kai tawh zawng zawng hi nuai 1, sang 4 leh 614an ni a. Nunna chan tawh zawng zawng hi 345 an ni.
(Desk)
<><><>
PRESBYTERY
Presbyterian Mizoram Synod hnuaia inkhawmpui lian ber dawttu Presbytery inkhawmpui a thurel pakhat Pathian biak inkhawm tihtlem rawtna chu hnawl a ni.
Aizawl West-I Presbytery inkhawmpui-ah chuan Tuikual leh Vaivakawn Pastor bial aţangin Pathian biak inkhawm tihtlem rawtna a lut a. Mahse, hun engemawchen sawiho hnu-ah hnawl a ni a, tuna kal ang pangngai a kal tura thutlukna siam a ni. He rawtna puluttu bial aiawhte hian inkhawm tam lutuk chu nu leh pa tam takin an chhungkua an uap tam loh phah avangin khawtlang sualna pawh a punlun a ni, an ti a. Inkhawm tam lutuk hian mi tam tak eizawnna a chhe zawngin a nghawng a ni, an ti bawk. Ţhenkhat chuan inkhawm titlem chuang lovin thil danga inhmanna hi tihtlem an rawt thung.
He rawtna hi nikum lam khan Synod Executive Committee kuta dah a ni tawh a, kumin Synod inkhawmpui-ah hian sawiho leh tho a nih an rin thu ţhenkhatin an sawi chhuak a. Sawihona chu a tawk an tih thu an sawi a ni.
Presbytery inkhawmpui, Ningani aţanga ţan chu vawiin hian a ţiak a. Hrileng mek avangin kumin Presbytery Inkhawmpui hi Presbytery hrang hrangah zan lam vantlang Pathian Biak Inkhawm awm lovin chhun lamah Rorel Inkhawm leh vawiinah Kohhran Upa nemngheh inkhawm neih a ni a.
(Desk)
<><><>
POWER MINISTER
Union Power Minister, RK Singh-a’nram chhungah kawlphetha indaihloh a awm dawn lo tih sawiin tullovah chi-ai tur a ni lo, a ti. He thu hi Power Ministry leh discom hotute nena N. Delhi-a thutkhawm an neihzawha thuthar lakhawmtute hnenah sawiin Delhi chuan kawlphetha a mamawh ang zat a la dawng zel a, a mamawh zat ang ang chu a dawng zel bawk ang, a ti.
Minister chuan ramchhunga power station-tehnenah an mamawh ang zat gas supply turin GAIL CMD a hrilhtawh tih pawh sawiin hun kaltawhah gas indaihlohna a la awm ngailova, hun lo kal zel turah pawh indaihloh a awm ngai lovang, a ti a, kawlphetha siamchhuaktu company-ten nitina lungalhthei leh gas an dawn dan chu a Ministry-in a vil reng tih a sawi bawk.
Hetihlai hian Coal Ministry chuan power plant-te mamawh zat lungalhthei, ramchhungah a awmtih sawiin hlauhthawn tur a awm lo, a ti. Tun dinhmunah power plant-tehian power siamchhuah nan nitin lungalh thei Ton nuai 18 leh sing 5 vel an mamawh laiin nitina lungalhthei supply chu Ton nuai 17 leh sing 5 vel a ni a, lungalhthei supply a hniamna chhan hi fur ruah a tlak rei vanga thawn chhuah lama harsatna a awm vang niin Coal Ministry chuan a sawi a ni.
(NewsonAir)
<><><>
COVID VACCINE
Ram pum huapa Covid hridanna pek beihpui thlak chhunzawm zelah mi vbch 94 leh nuai 70 chuangin hridanna an la tawh a, darkar 24 kalta chhung khan mi nuai 66 sing 8 sang 5 chuang hnenah hridanna pek leh a ni.
Darkar 24 kalta chhungvek khan hri kai sing 1 sang 8 chuang hmuhchhuah a ni a, hei hi ni 214 chhunga hri kai thar tlem berni a tling a ni. Darkar 24 chhung vek hian hriatanga dam sing 2 sang 3 chuang awmin hri kaihhnawih a thi, 214 an awm bawk.
Union Health Ministry sawidanin, tun dinhmunah hri kai zinga zaa 97.99 enkawl dam an ni a, hrivei enkawllai nuai 2 sing 3 chuang awmin ni 208 chhunga enkawl lai tlember tum a tling a ni.
(NewsOnAir)
<><><>