RADIO
*Listen to Evening Mizo News - 21.8.2020 by AIR Aizawl News on #SoundCloud*
https://soundcloud.com/user-172826833/evening-mizo-news-2182020?ref=whatsapp
ALL INDIA RADIO AIZAWL
REGIONAL NEWS UNIT
REGIONAL NEWS BULLETIN
HEADLINES (EVENING) - 21.8.2020
1. Central YMA leh MZP ten Assam Rifles 45th Batallion in sorkar ruahmanna dodal a dan an bawhchhia chu an dem tak zet tih vawiin khan thuchhuah siamin an sawi.
2. Mizorama COVID 19 vei hmuhchhuah zat chu 895 an tling tawh a, hri vei enkawl mek 475 an awm.
3. India ramah Covid-19 vei zinga za zela 74 chuang enkawl dam an ni.
4. A firfiaka chetna thlawptu Pakistan chu khawvelin a kawm serh tur a ni tih India-in a sawi.
<><><>
CYMA/MZP
Central YMA chuan Zoram mipui ten sorkar hmalakna tha taka an tawiawm laia Assam Rifles 45 Batallion mi Sawmpanga in August ni 18 tlaia sorkar ruahmanna dodal a dan an bawhchhia chu an dem tak zet tih vawiin khan thuchhuah an siam.
CYMA chuan Sorkar dan dinglai anga Mizoram chhunga lut tur ten RAT ti ngei tura Police leh sorkar aiawh te ngenna pawisa lova endikna paltlang lo a lirthei hmanga Mizoram an lut lui chu Mizo mipui te leh sorkar zah lohna lian tak a nih thu an sawi a. Ruahman lawk ni anga lang thei Assam Rifles Captain pakhat leh a hote, mi sawmhnih panga te'n motor pathum leh car hmanga lo hmuaka Vairengte Police Duty te ralthuam nena rikrapa, dan pawisalova Gate paltlang luitura an ruahmannnasiam chu dan zahlohna lian tak niin, vanduaithlak an tih thu an sawi. India rama State ralmuangbera Assam Rifles te chet dan chu Mizo mipuite hmuhsitna leh thamlohnaah ngaiin dan bawhchhetu chu an phu tawk hremna an hmuh ngei nana hma la thuai turin sorkar an phut tih an sawi a ni.
Vawiin vek khan MZP pawhin thuchhuah siamin Mizo mipuite leh tlang mite thian ni a inchhal Assam Rifiles te chet dan chu an dem tak zet tih an sawi bawk a. Hripui theh darh pawh an pawisa lo tihna ah ngaiin, heng mite chunga hremna lek ngei turin MZP chuan Brig. Vinod S a phut a, a tul anga hma la turin Mizoram sorkar leh thuneitute pawh a ngen a. Ministry of Home Affairs a he thil thleng chungchang hi thlen ngei turin a beisei bawk tih an sawi a. Assam Rifles-te chet dan chu Mizoram chhunga cheng mekte himna tura sorkar leh mipuite hmalakna pawisak lohnaah MZP chuan a ngai a ni, an ti.
MZP chuan a tul angin sorkar laipuiah a zualko chhunzawm tawh dawn tih an sawi bakah Covid-19 hripui lenlai chuan Mizoram chhungah rawn lut tawh lo turin a ngen nawn a. Checkgate paltlang lui sipaite chu hri an vei leh vei loh endik a, an result puangzar turin a phut bawk.
(PR)
<><><>
AMC LOCKDOWN EXTENDED
Aizawl Municipal Corporation Area inkharkhip chu tukin dar 4.30 a tawp tur anih laiin, State Disaster Management Authority chuan karleh thawhtanni ni 24 zing dar 04:30thleng a pawt sei a.
Pawn lam atanga Aizawl municipal area a luh leh Aizawl municipal area atanga chhuah khap a ni. Hei hian Home department-in Mizoram luh phalna a pek te a huam lova, Aizawl municipal area pawn atangin nitin mamawh chauh lak luh phal a ni.
Aizawl municipal area-ah chuan nitin mamawh zawrhna dawr te chu Deputy Commissioner leh LLTF te ruahmanna siam angin inkaihhruaina zawm chungin hawn theih a ni a. Zirna in, training institute leh sakhaw biakna hmunte chu khar chhunzawm zel a ni ang. Aizawl municipal area chhunga undergraduate leh postgraduate examination (off-line) te pawh thulh rih a ni anga, online examination erawh chu kalpui a ni ang.
Hetihlai hian Aizawl DC chuan vawiin leh naktuk atan AMC area-ah mipui ten harsatna an tawh loh nan Chawhmeh zawrh a phal a,
Ruahmanna a siam ang chuan Local Level Task Force tin te'n mahni veng theuhah a tul dan a zirin chawhmeh zawrhna tur hun leh hmun an ruahman ang a, Thingtlang lehAMC pawn atanga chawhmeh supply turte'n harsatna an tawh loh nan Local Task Force tin te'n ruahmanna an lo siam tur a ni. A theih hram chuan chawhmeh pho chhuah aiin, a mamawh te ina pek theih ni se tih a ni bawk.
(IPR)
<><><>
COVID19 TALLY
Mizorama COVID 19 vei hmuhchhuah zat chu 895 an tling tawh a, a vei enkawl mek 475 an awm.
Nimin khan ZMC Laboratory-ah COVID-19 vei 13 hmuhchhuah thar a ni a. Rapid Antigen Test 1248 neih niin COVID-19 vei 8 hmuhchhuah a ni bawk a. Lunglei Civil Hospital TrueNAT laboratory-a sample test 33 zingah COVID-19 vei hmuhchhuah thar 1 a awm.
Hetih lai hian Aizawl khawpuia mi hrang hrang thlanchhuah test result hriat tawh chin a la negative vek rih a, Rangvamuala COVID19 vei leh vei lo test te pawh hriat tawh chin a la negative vek rih bawk a ni.
ZMC Laboratory-a COVID-19 positive hmuhchhuah tharte hi Aizawl district-a sample 12 leh Siaha district a sample 1 te an ni a. Aizawl district-a positive hmuh chhuah thar zinga 9 hi positive te nena an inhnimhnaiah vanga kai an ni a, Chaltlang Lily Veng atangin 3 - mipa 1 leh hmeichhia 2 an ni a, Sawlengah 3 - mipa 1 leh hmeichhia 2. Darlawnah 2 - hmeichhia ve ve leh Durtlang North ah hmeichhe pakhat in a kai a ni.
Aizawl district-a positive dangte hi Agape Quarantine Centre, Durtlang a quarantine mek 2 hmun dang atanga Mizorama lo haw te an ni.
Aizawl district-a RAT positive hmuhchhuah hi mipa kum 23 a upa, Zangena Petrol pump-a thawk, Zemabawk North a cheng a ni a. COVID-19 natna in a kentel insawiselna a neih avangin mahni inringhlela test a ni.
(IPR)
<><><>
MPF
Mizoram People Forum chuan political party te kalphung chik a enfiahtura mipui zirtirna petu leh a kawng hawngtu an ni tih an sawi a. MPF chu tih tur leh tih loh tur te, tihdiklohte sawi tur nilovin mipuiten hei hi an lo chik deuh deuh theih nan hrilhhretu nih an tum zawk tih an sawi.
Tun thla ni 27-a local council leh village council inthlanpui neih turah MPF Gen. Hqrs. hruaituten vawiin khan thuthar thehdarhtute an kawm a. MPF president Rev R Lalchangliana chuan political party-te nen thawhhona thuthlung an siamah a tak ram thleng thei tur leh tihhlawhtlin theih tur chauh manifesto, policy leh programme duan nise; mimal chungchang leh tualchhung thil chauh nilovin, party policy leh programme chu campaign-na leh inzawrhna atan hman a, dawt leh thu belhchian dawl lo leh finfiah nghal mai theih loh hmanga inbeih chu tih loh nise, an ti tih a sawi.
Political party-te nen an sawi ho hnuah tun VC/LC inthlanah hian candidate-te ngei telin house to house campaign neih phal a ni tih MPF president chuan a sawi a. Chutihrualin, sum leh therhlo nena len emaw candidate-te tel lo luh emaw chu tih remtih a ni lo tih a sawi a. Tunlai hrileng karah veng/khuaa local forum/task force-in house to house campaign tih loh an lo ti a nih erawh chuan MPF chuan a thlawp tho tih a sawi a ni.
Covid-19 hri leng mek laka himna turin State Election Commission ngenna angin local forum tinte ruahmanna siam tura tih an nih thu a sawi a. Vote thlak turte chu an hming leh phone number lak vek a nih dawn bakah mask vuah leh social distancing tha taka kalpui tur a nih thu te, tum khata mi tam tak an punkhawm emaw intlar emaw loh nan mi panga vel intlarna tur rinbial tura tih a nih thu te a sawi. Hming leh phone no lak hi, hri inkaidarh palh a lo awm a nih pawha rang taka inchhuizui tih theihna atan a ni tih MPF hruaitute chuan an sawi.
Inthlan ni a MPF local forum duty tur zingah hrilen lai a nih avangin upa lam, kum 60 chin chu duty ve lo tura an inchah thu sawiin, thalai zawkte duty tura ruat nise, an ti a. Pianphunga harsatna nei te chu an intlar ve ngai loa vote an thlak thuai theih nan ruahmanpui turin duty-te an ngen tih MPF hruaitute hian an sawi.
MPF President chuan Party malin emaw independent candidate in emaw vantlang inkhawm neih an duh chuan MPF kaihhruaina hnuaiah neih theih a nih thu a sawi a. State pawnlam atanga campaign tura lo kal an awm pawhin vantlang inkhawm an koh pawhin MPF-in a kaihhruai tura tih a ni, a ti.
Inthlanna thianghlim, zalen leh muanawm a awm ngei theihna turin mitinin theihtawp chhuah theuh turin a sawm tih Rev R Lalchangliana hian a sawi a.
(CORR)
<><><>
COVID19-INDIA
India ramah Covid-19 vei enkawl dam an pung chho zel a, vawiin thleng khan hri vei zinga zaa 74.30, mi nuai 21 sing 5 sang 8 leh 946 an dam awm tawh a ni.
Hetih lai hian hri kai pawh nitin sing 6 chuang an la awm belh zel a, Union Health Ministry sawi danin, darkar 24 kalta chhung khan hri kai 68,898 hmuh belh a ni. Tun dinhmunah hri vei enkawl lai nuai 6 sing 9 sang 2,28 an awm a, hri vanga thi, 54,849 tawhin hri vei zinga zaa 1.89 in an thihpui a ni.
Meghalaya-ah nimina Covid-19 positive 55 hmuh lehte nen he state-a hri kai hmuhchhuah chu 1,716 an tling tawh a, hri vanga thi 6 awm tawhin enkawl dam 744 an awm tawh thung a ni.
Nagaland-ah Covid-19 vangin mi 7 an thi tawh a, niminah khan hri kai 25 hmuh belhin heng nen hian hri kai 3,583 hmuh chhuah a ni tawh a, enkawl dam 1,921 awm tawhin enkawl lai 1,648 an awm mek a ni.
Sikkim-ah hri kai 1,290 hmuh chhuah a ni tawh a, nimin khan 58 hmuh belh a ni. State Health Dept. sawi danin, hri atanga dam 827 awm tawhin enkawl mek 460 an awm a, hri vanga thi 3 an awm tawh bawk.
(NewsonAir)
<><><>
INDIA URGES INTERNATIONAL COMMUNITY
India chuan a firfiaka chetna thlawptu Pakistan chu khawvel ram hrang hrang-ten an kawm serh tur a ni, a ti. Khawvel pum huap Parliament Speaker-te khawmpui vawi 5-na-a Pakistan thuchhuah, Right of Reply hmanga nimina India-in a chhan letnaah he thu hi tarlangin Pakistan Prime Minister chuan an leilungah mifirfiak sing 4 thelh an khawi tih a sawi a ni, a ti a, Jammu & Kashmir chu India ram bung khat a nih thu pawh sawiin Pakistan chu ramri kana a firfiaka chetna ti tawp turin a hriattir bawk.
Ni hnih awh, Parliament Speaker-te conference hi video conference hmanga neih a ni a, Lok Sabha Speaker Om Birla-a’n India ram palaite a kaihruai a ni.
(NewsonAir)
<><><>