RADIO
*ALL INDIA RADIO AIZAWL*
*REGIONAL NEWS UNIT*
REGIONAL NEWS BULLETIN
HEADLINES (MORNING NEWS) - 21.8.2020
1. Aizawl Municipal Corporation Area inkharkhip chu State Disaster Management Authority chuan ni 24 zing dar 04:30 thleng a pawt sei.
2. Nimin khan ZMC laboratory ah COVID19 positive 21 hmuhchhuah leh a ni.
3. Covid-19 hri laka endik tam ber ni, nimin khan ram chhungah sample nuai 9 chuang endik a ni.
4. Covid-19 inkharkhip tuarte chhawmdawlna turin Public leh Private sector bank-ten Cheng Vaibelchhe nuaih 1 leh sing 5 loan pekchhuahna tur an pawm.
<><><>
AMC LOCKDOWN EXTENDED
Aizawl Municipal Corporation Area inkharkhip chu tukin dar 4.30 a tawp tur anih laiin, State Disaster Management Authority chuan ni 24 zing dar 04:30thleng a pawt sei a.
Pawn lam atanga Aizawl municipal area a luh leh Aizawl municipal area atanga chhuah khap a ni. Hei hian Home department-in Mizoram luh phalna a pek te a huam lova, Aizawl municipal area pawn atangin nitin mamawh chauh lak luh phal a ni.
Aizawl municipal area-ah chuan nitin mamawh zawrhna dawr te chu Deputy Commissioner leh LLTF te ruahmanna siam angin inkaihhruaina zawm chungin hawn theih a ni a. Zirna in, training institute leh sakhaw biakna hmunte chu khar chhunzawm zel a ni ang. Aizawl municipal area chhunga undergraduate leh postgraduate examination (off-line) te pawh thulh rih a ni anga, online examination erawh chu kalpui a ni ang.
Hetihlai hian Aizawl DC chuan vawiin leh naktuk atan AMC area-ah mipui ten harsatna an tawh loh nan Chawhmeh zawrh a phal a,
Ruahmanna a siam ang chuan Local Level Task Force tin te'n mahni veng theuhah a tul dan a zirin chawhmeh zawrhna tur hun leh hmun an lo ruahman ang a, Thingtlang lehAMC pawn atanga chawhmeh supply turte'n harsatna an tawh loh nan Local Task Force tin te'n ruahmanna an lo siam tur a ni. A theih hram chuan chawhmeh pho chhuah aiin, a mamawh te ina pek theih ni se tih a ni bawk.
(IPR)
<><><>
COVID19 TALLY
Nimin khan Zoram Medical College laboratory ah COVID19 positive 21 hmuhchhuah leh a ni a, tihian Mizorama a vei hmuhchhuah zat chu 895 an tling tawh a, a vei enkawl mek zat hi 493 an ni.
Positive hmuhchhuah te hi ZMC lab-ah 13 - Aizawl district mi 12 leh Siaha district mi 1 an ni a, RAT hmangin Kolasib-ah hnamdang driver 7, mipa kum 25-53, Assam & Meghalaya a mi te hmuhchhuah a ni bawk a.
Lunglei RT-PCR TrueNAT atangin positive mipa 1, kum 28, Assam atanga lo haw, Quarantine Facility-a awm mek an ni.
Hetihlai hian Aizawl District Magistrate chuan tukin zing dar 4:30 atanga September ni 3 zing dar 4:30 thleng Rangvamual leh Phunchawng vengah te luh leh chhuah a khap a. Heng veng pahnihte paltlang tur khualzinte pawh heng veng huam chhungah hian an ding tur a ni lo, a ti.
(IPR & PTC Kolasib)
<><><>
HEALTH MEETING
Health & Family Welfare minister Dr. R. Lalthangliana kaihhruaiin nimin khan Coordination meeting on COVID-19 neih a ni a.
COVID-19 dona kawnga hmalak chhunzawm zel dan tur an ngaihtuahho a. COVID-19 frontline medical workers, a bikin sample lakhawmtute leh COVID-19 vei enkawlna hmun Covid Care Centre (CCC) leh Dedicated COVID Health Centre (DCHC)-a thawkte an in lamah haw lova hmun khata an riah khawmna tur district tinah ruahman tha an ti a, Aizawl-ah chuan Chaltlang Tourist Lodge additional building ruahman fel a nih thu tarlan a ni. Vairengteah Covid Care Centre leh COVID-19 frontline medical workers-te awmna tur ruahman tul ni-a hriat a ni a, hmalak thuai tum a ni bawk.
District 10-a dah tur Truelab Quattro Real Time Quantitative Micro PCR Machine in an awmna tur district a thlen vek tawh thu tarlan a ni a, a dahna tur hmun leh thil danga civil works pawh tun kar hian zawhfel a nih tur thu tarlan a ni a, tun thla ral hma ngeia hman tan theih tura bun fel vek beisei a ni. A enkawltu tur doctor leh technician-te pawh training pek fel vek an ni tawh a ni.
Health Minister Dr. R. Lalthangliana chuan sawrkar laipuia Ministry of Health & Family Welfare-in an chhut danin Mizoramah hian December thla tir lamah COVID-19 hmuhchhuah zatin 5000 chuang a kai dawn a, hetiang dinhmun anih avang hian inruahman lawk a tul hle a ni, a ti a. Contingency Plan te siam a tul a, nasa takin ngaihtuahna sen mek a ni, a ti.
ZMC chu Dedicated Covid Hospital-a puan a nih avangin COVID-19 vei nilo enkawl nan a hman theih rih lova, anni enkawlna tur ruahman chungchang pawh sawrkar damdawiin leh private damdawiin hotute nen sawiho a ni. State pawn atanga damlo rawn haw damdawiina inenkawl chhunzawm nghal ngai an awm thin avangin Lengpui an rawn thlen veleha Rapid Antigen Test an tih sak result chhuah hmaa an lo awm lailawkna tur pawh ngaihtuah niin ruahmanna siam thuai tum a ni.
Hmalam hun thlirin Covid Care Centre (CCC) mamawh belhna a nasa dawna hriat a ni a, Sports & Youth Services department-in Ramhlun Sports Complex-a an building pali, mi 100 vel awm theihna tur CCC atana hman an phal thu tarlan a ni.
COVID-19 dona kawnga thawktu indaihlohna a nasat thu tarlan a ni bawk a, COVID-19 reh fel hma, abikin kumin december thla tawp thlenga temporary basis a rawih tur COVID-19 frontline workers mamawh belh zat chhut chhuah chu mi 1151 an ni.
Health Minister chuan contact tracing tih laia sample laksakte chu an result a chhuah hma chuan anmahni leh an chhungte home quarantine-in an awm tur a ni, a ti a. Hemi chungchangah sawrkarin thupek a tichhuak tawh a, mipuite pawhin lo chik zui se tha a tih thu a sawi a ni.
(DIPR)
<><><>
INDIA CONDUCTS RECORD OVER 9 LAKH COVID-19 TESTS IN SINGLE DAY; FATALITY RATE DECLINES TO 1.90%
Nimin khan India ram pumah Covid-19 hri lakah mi nuai 9 chuang endik a ni a. Ni khata hri endik tam ber tum a la ni.
Health Ministry chuan nitina sample nuai 10 endik ziah thei tura India chu a insan mar zel thu an sawi a. Tun thlenga hri laka endik tawh zat chu Vbch 3 leh nuaih 25 an chuang tawh a ni.
India rama Covid-19 hri kai enkawl dam tawh zat chu nuai 21 dawn lai an ni tawh a. Enkawl dam an pun chhoh zel chhan hi rinhlelhawm chhui a, endik zung zung a, enkawlna pek thuai thin an nih vang tih Health Ministry chuan an sawi a ni.
Darkar 24 kalta chhung khan Covid-19 hri kai enkawl dam sing 5 sang 8 leh 794 an awm a. Hri kai enkawl dam hi za-a 74 an ni tawh a. Thihpui pawh an tlem hret hret a, thihpui zat hi za-a 1.90 an ni tawh bawk a ni.
(newsonair)
<><><>
MEGHALAYA GOVT TO AMEND CERTAIN PROTOCOLS LAID DOWN BY CENTRE FOLLOWING DIRECTIONS FROM ICMR
Meghalaya Sawrkar chuan Sawrkarlaipui duan ICMR kaihhruaina chu siam danglam tul an ti a. He thu hi Deputy Chief Minister Prestone Tynsong chuan chanchinbumite bulah a sawi a ni.
State sawrkarin state chhunga luhka (entry point) a siam atanga state chhunga lut tupawhin Rapid Antigen Test an paltlang tur a ni a, hri an lo kai a nih chuan chumi chu Corona Care Centre-ah belhchian zui atan dah tur an nih thu Deputy Chief Minister chuan a sawi.
Vawiin atang hian hmun dang atanga haw, Meghalaya-a lut tawh phawt chu anmahniin ni 10 chhung an inkhunghrang tur a ni tih a ni a, a hma chuan hei hi ni 14 chhung tih a ni.
Rapid Antigen test-a hri kai lote chu ni 10 chhung mahni-a inkhung hrang tura in lama hawtir phalsak an ni ang tih a ni bawk.
Meghalaya sawrkar chuan Meghalaya luhka zawng zawngte chu September thla atanga November thla thlengin, thlatin chawlhkar hmasa ber-ah a khar vek dawn bawk a ni.
Hetianga tih a nih chhan hi Meghalaya luhka zawng zawnga frontline worker awmte nawrna nasa lutuk tihnepna tura ruahman a nih thu Preston Tynsong chuan a sawi a. Thlatin chawlhkar hmasa berah hian luhka hmunhmate chu then thianghlim thin tur a nih thu a sawi bawk.
(newsonair)
<><><>
BANKS APPROVE LOANS WORTH RS. ONE LAKH 50 THOUSAND CRORE TO MITIGATE COVID-19 DISTRESS
Public leh Private sector bank-te chuan Emergency Credit Line Guarantee Scheme hnuaiah Cheng Vaibelchhe nuaih 1 leh sing 5 loan pekchhuah tur an ruahman a. Finance Ministry chuan cheng Vaibelchhe nuai 1 chuang an semchhuah tawh thu an sawi.
He scheme hi Sawrkar-in Aatma Nirbhar Bharat Package hnuaia a puan a ni a, Covid-19 vanga inkharkhip tuartute chhawmdawlna hrang hrang atana ruahman a ni.
He Scheme hnuaiah hian Public Sector Bank-te chuan cheng Vaibelchhe sing 7 sang 6 chuang an ruahman a, chumi atang chuan cheng Vbch sing 5 sang 6 chuang an semchhuak tawh a ni.
Private Sector Bank pawhin cheng Vbch sing 7 sang 4 leh 715 an ruahmanah cheng Vbch sing 4 sang 5 chuang an semchhuah tawh thu Ministry chuan a sawi bawk.
He scheme kalputu Bank lian zualte chu State Bank of India, Canara Bank, Punjab National Bank, Bank of India, Union Bank of India leh HDFC Bank Limited-te a ni.
(newsonair)
<><><>
CONSTRUCTION OF SHRI RAM JANMBHOOMI MANDIR IN AYODHYA BEGINS
Ayodhya-a Hindu sakhaw betute biakbuk Shri Ram Janmaboomi Mandir chu nimin atang khan sak tan a ni.
CBRI Roorkee, IIT Madras leh hmun danga Engineer-ten mandir sakna tur hmun lei lung an endik mek a. Shri Ram Janmabhoomi Teerth Kshetra chuan biakbuk sak hna hi thla 36 atanga thla 40 chhung vela zawh fel hman beisei a nih thu a sawi a ni.
He biakbuk hi hmakhawsang India mite thiamthil leh ziarang lang theia sak tur a ni a. Lirnghing, ruahpui vanawn leh khuarel chhiatna dang laka him vek tura sak a ni dawn a. A sakna chak atan hian thir hman a ni dawn lo a ni.
Ayodhya-a Ram Temple sakna tur lung phumna Bhoomi Poojan-ah tun thla ni 5 kha Prime Minister Narendra Modi-a pawh a tel a ni.
(newsonair)
<><><>