RADIO
ALL INDIA RADIO AIZAWL
REGIONAL NEWS UNIT
REGIONAL NEWS BULLETIN
HEADLINES (MORNING NEWS) - 20.8.2020
1. Nimin khan Mizoramah Covid-19 hri kai 13 hmuh belh a ni.
2. Pawn lam atanga Mizoram luhka Vairengte, Kanhmun leh Lengpui Airport chu kar khatah ni 3 chauh hawn a ni tawh dawn.
3. Manipur-a Congress MLA hlui 5-in BJP an zawm.
4. Sawrkarlaipui Cabinet chuan Common Eligibility Test buatsaihtu tur National Recruitment Agency din an remti.
<><><>
COVID TALLY
Nimin khan Mizoramah Covid-19 hri kai 13 hmuh belh an ni.
ZMC-ah hri kai 1, hnam dang mipa kum 51, Bawngkawna cheng, positive contact atanga kai, quarantine centre-a awm lai a ni. Kolasib-ah RAT hmangin mi 12 hmuhchhuah an ni bawk a, heng mite hi mipa vek, hnam dang driver, kum 17-48 inkar, Assam leh Meghalaya amite an ni a, natna langchhuak lo vek an ni.
Nimin vek khan Lunglei RT-PCR TruNat-ah mi 33 endik an ni a, hri lakah an fihlim vek a ni.
Heti hian Mizoramah Covid-19 hri kai 873 an awm ta a, mi 384 enkawl dam an ni tawh a, enkawl lai hi 489 an awm a. Thihpui an la awm lo a ni.
Hetihlai hian, Mizoram Sawrkar chuan Covid - 19 hrileng vei an pun chhoh dan te zirchiangin ngun taka a ngaihtuah hnuah he hrileng a darh chak loh na turin tuna karkhat chhunga nitina khualzin rawn lut thin chu a him tawk loah a ngai a. Hei hi siam danglamin nimin khan Chief Secretary Pu Lalnunmawia Chuaungo, Chairman, State Executive Committee, State Disaster Management Authority chuan thupek a chhuah a.
Thupek ang chuan khualzinmite chu Thawhtanni, Nilaini leh Zirtawpniah te chiah Vairengte atang te, Kanhmun atang te leh Lengpui Airport atang tein thuleh awm hma chuan Mizoram an rawn lut thin tawh ang.
(DIPR)
<><><>
KOLASIB – AR FORCEFUL ENTRY
Vairengte Police Check Gate-a Covid-19 hrileng mek dang tura Rapid Antigent Test (RAT) titu Police leh sorkar mi Duty-te paltlang luitu Assam Rifles sipaite an dem thu leh sorkarin hma la se an duh thu Kolasib Group YMA leh Vairengte Joint YMA chuan an sawi.
Nimin khan Kolasib Group YMA hian thuchhuah siamin, Silchar atanga rawn chho Assam Rifles sipai 15 bawr vel te hian sorkar leh Mizoram mipuite an zah lo a ni tih a lang chiang hle, an ti a. Containment Zone pawh zah lotu Assam Rifles-te chungah hian zilhhauhna leh hremna pek an nih ngei theih nana hma la turin Mizoram sorkar chu an ngenin an phut tlat tih an thuchhuahah chuan an tarlang a.
Vairengte Joint YMA pawhin thuchhuah siamin, Vairengte chu Mizoram luhka ber a nih avangin khualzin leh Driver zawng zawng ten Covid19 an kai leh kai loh enna Rapid Antigen Test (RAT) pal tlang lo chuan tumah luh phal a ni lo, an ti a. Hetiang hi a nih mek laiin thawhleh ni tlai lam khan Assam Rifles mi 15 vel chuan Vairengtea Medical leh Police Duty-te chu pawisakna nei miah lovin RAT Test tiduh lovin an tlan tlang lui a; he thil thleng hi an ngai thutakin an lungni lo takzet tih an sawi a. Inkaidarh awlsam tak hrileng laka mipuite him nana sawrkar hmalakna engahmaha ngai lova tiderthawng zawnga khawsa te chungah hian na taka hma la turin sawrkar an ngen tih an sawi a ni.
Hetihlai hian Assam Rifles chuan nimina an thuchhuahah ram venhim hna thawktute leh Central Armed Police Force te chu hrileng vanga inkharkhipna dan sorkar laipui Home Ministry-in a duanin a huam ve lova, Mizoram sorkarin Assam Rifles te hnathawh tikhaihlak zawnga khapna a siam chuan an tan khawlhkham a siam hle niin an sawi ve thung a. Assam Rifles-te hian Mizoram chhungah vantlang zinga hri inkaidarhna an la thlen lo niin an sawi bawk.
Vairengte paltlanga Assam Rifles-te an rawn luh thu hi Kolasib DC chuan a hriat veleh Home Dept. thuneitute a hriattir nghal a, an hmalak dan ngaihchan mek a ni.
(Kolasib PTC & PRs)
<><><>
MAMIT – COVID19
Tunhnaiah Covid19 hri kai hnimhnaitu mi pakhat Mamit-a hawin Mamit khawpui chhunga hmun hrang hrang a tlawh kual avangin Mamit District Magistrate chuan Thawhleh zan atanga zanin dar 8.30 thleng Mamit khawpui chhungah Total Lockdown a puang.
Mamit-a Covid19 hri kai lo hnimhnaitu hi Rapid Antigen Test tihsakin hri a kai lo niin a lang a, khawl rintlak zawk RT- PCR test ti leh tura ruahman a ni. He thil thleng avanga Covid19 hri inkaidarh a nih loh nan leh ‘contact tracing’ awlsam zawka kalpui a nih theih nan Mamit District Magistrate, Dr. Lalrozama chuan Total Lockdown hi a puang a.
Lockdown chhung hian Mamit atanga bungraw thiar chhuak emaw la lut tur emaw ten VLTF hriatpuina lehkha nen DC hnen atangin phalna an la tur a ni a, ni tin mamawh thil atan erawh phalna hranpa a ngai lo. Mamit khawpui atanga luh leh chhuah khap tlat a ni. Mamit khawpui chhungah lirthei hmanga mipui chetvel khap tlat a ni a. Hei hian Election kaihhnawiha chhuak te leh phalna nei te a huam lo a ni.
(RD Darthanzauva PTC Mamit)
<><><>
LAWNGTLAI EAST MLA
Mizoram Upa Pawl, (MUP) District Hqrs. Lawngtlai Recreation Centre, Building chu Lawngtlai East bialtu MLA, Pu H. Biakzaua’n nimin khan a hawng.
MLA chuan upa te chu ram leh khawtlang inrelbawlnaah theihtawp chhuah turin a ngen a; ram changkang leh hmasawn apiangah upaten ngaih pawimawh an hlawh, a ti a. Upa Pawl Member-te chu Mizoram mai ni lo; khawvel hmun hrang hrangah an kum rualpuite chu ram leh khawtlang hruai hna thawktu zingah a tamber an nih thu hrilhin, Mizoram leh Lawngtlai District-ah pawh MUP member-te chu ngaihtuahna fim, ramin a chhawr theih tur tha tak tak nei an nih avangin ram tan nasa zawka ke pen turin a ngen a ni.
(Lalngheta Ralte PTC Lawngtlai)
<><><>
FIVE FORMER CONGRESS MLAS OF MANIPUR JOIN BJP
Manipur-a Congress MLA hlui 5, tun hnaia Congress party bansantute chuan nimin khan New Delhi-a party headquarters-ah BJP an zawm.
He hunah hian Manipur Chief Minister N Biren Singh, Party National Vice President Baijayant Panda leh National General Secretary Ram Madhav-te pawh an tel a ni.
MLA 5 zingah hian Congress party hruaitu leh Chief Minister hlui Okram Ibobi Singh-a laina hnai Okram Henry Singh a tel a. MLA dangte chu Oinam Lukhoi, Ngamthang Haokip, Paonam Brojen leh Ginsuanhau-te an ni.
BJP zawm tharnaa thusawitu Ram Madhav chuan Congress-in kum 15 ro an rel chhung khan Manipur chu nasa taka hrek an nih thu a sawi a. Kum 2017 khan BJP kaihhruai NDA chu a lo sawrkar ta a, kum 3 leh a chanve kalta chhung khan GDP thanna pawh za-a 16 a nih chhoh thu a sawi a ni.
MLA-te hian lakluh an nih hnuin BJP President JP Nadda an hmu zui nghal bawk a ni.
(newsonair)
<><><>
78 PEOPLE TEST POSITIVE FOR COVID-19 IN MEGHALAYA
Meghalaya-ah nimin khan Covid-19 hri kai thar 78 an awm a. Hei nen hian state chhungah hri kai enkawl mek 804 an awm.
Health Services Director Dr Aman War-a chuan nimin khan Covid-19 dam lo 40 chhuahtir an nih thu a sawi a, tun thlenga Covid-19 hri kai enkawl dam tawh zat chu 725 an ni tawh a ni.
Dr. Aman War-a hian khawpui hmun thenkhata a kahpaha sample endik chu chhunzawm a nih tur thu a sawi bawk.
Meghalaya-a Covid-19 hri kai tawh zat chu mi 1535 an ni a. Mi 6-in an thihpui tawh a ni.
(newsonair)
<><><>
BIHAR CM NITISH KUMAR ANNOUNCES EX GRATIA OF RS 36 LAKH
Bihar Chief Minister Nitish Kumar-a chuan thawhtanni-a Baramula-a mi firfiak beihnaa thi 2 - Khurshid Khan leh Lavkush Sudarshan Sharma chhungte chu cheng nuai 36 ve ve zangnadawmna pek an nih tur thu a puang.
Nitish Kumar-a chuan heng martar chhungkaw hniha mi pakhat ve ve hnenah State sawrkarin hna a pek tur thu a puang bawk a ni.
Khurshid Khan-a ruang hi Rohtas district-a Bikramganj-ah phum a ni a, Lavkush Sudarshan Sharma ruang hi Jehanabad district-a an khua Aaira-ah halral a ni a. State chawimawina famkim nen vui an ni.
(newsonair)
<><><>
CABINET APPROVES SETTING UP OF NATIONAL RECRUITMENT AGENCY TO CONDUCT CET
Sawrkarlaipui Cabinet chuan Common Eligibility Test buatsaihtu tur National Recruitment Agency din an remti.
Hemi chungchanga Chanchinbumite nimin tlaia kawmtu Union Minister Pakash Javadekar-a chuan he thil hi ram chhunga thalai hna zawngten an tangkaipui tur thu a sawi a. Hun rei tak thalaite nghahfak lo ni tawh chu tihhlawhtlin a nih thu a sawi a ni.
National Recruitment Agency (NRA) hian Common Eligibility Test an buaisaih tawh ang a, hna zawnglaite chu group B leh C ( non-technical post) atan an thliar hrang dawn a ni.
(newsonair)
<><><>
PM MODI URGES EVERY CITIZEN TO TAKE NECESSARY PRECAUTION IN MONSOON
Prime Minister Narendra Modi-a chuan khua leh tuite chu Covid-19 hri leng avangin furpui hnuaia fimkhur zual turin a chah.
Narendra Modi-a chuan fur khawchhiat lai hi hri chitin chitang len duh hun a ni a, inven that hun lai tak a ni a ti. Sawrkar pawhin boruak a thlir reng a, a mamawhte tanpui a inhuam reng a ni a ti.
Sawrkarlaipuia Health and Family Welfare Minister Dr. Harsh Vardhan-a pawhin nimin khan Delhi sawrkar mi pawimawhte leh khawpui Municipal Corporation hotute chu Delhi khawpui chhunga hri leng lak awm thei laka lo inbuatsaih dan thlirin a thutkhawmpui a. Dengue, Chikungunya leh Malaria laka lo invenlawk a pawimawh thu a sawi a ni.
Dr. Harsh Vardhan-a chuan Covid-19 hripui beihna karah pawh tlang hri leng dan chu ngaihthah tur a nih loh thu a sawi a. Nikum pawh khan Delhi khawpuiah Dengue vanga damlo sang 5 vel an awm thu a sawi a, tha zawka inbuatsaih a pawimawh a ni a ti.
(newsonair)
<><><>