Radio
*Listen to Morning Mizo News - 13.8.2020 by AIR Aizawl News on #SoundCloud*
https://soundcloud.com/user-172826833/morning-mizo-news-1382020?ref=whatsapp
ALL INDIA RADIO AIZAWL
REGIONAL NEWS UNIT
REGIONAL NEWS BULLETIN
HEADLINES (MORNING NEWS) - 13.8.2020
1. Chief Minister Pu Zoramthangan tun dinhmunah COVID 19 hrik taidarh hluai thei a ni tih hre rengin mitin fimkhur se a duh thu a sawi.
2. Nimin tlai dar 5 atanga tukin dar 5 thlenga Vairengte paltlang tur te zing mi 20 in COVID19 an kai tih Rapid Antigen Test hmanga hmuhchhuah a ni.
3. COVID-19 invenna damdawi siam leh vil zui chungchang ngaihtuah tura sawrkar laipuiin a din mithiam rual awmna National Expert Group on Vaccine Administration for COVID-19 chu nimin khan a hmasaber atan an thukhawm
4. Kuminah misual hnuchhui kawnga Police hna thawk tha chawimawina Union Home Minister's Medals for Excellence chu Police 121 hnenah hlan a ni dawn
<><><>
CM
Chief Minister Pu Zoramthangan tun dinhmunah COVID 19 hrik taidarh hluai thei a ni tih hre rengin mitin fimkhur tlan a tul a ni.
Nimin khan Chief Minister ho hian meeting neih a ni a, COVID19 hrik kai pung zel leh mipuiah inkaichhawn hlawhthawnawma a awm tawh avangin hmalak dan tur an ngaihtuah a, meeting Sawrkar inkaihhruaina dan dinglai angin mitthi vui inkhawmah mi 50 aia tam kalkhawmloh a, social distancing tha taka kalpui anih theih nan kohhran hall ah emaw, YMA hall ah emaw hall dang remchangah mitthi vuina neih thin ni se an ti a. Kalkhawmte an hming, veng leh biakpawhna tur phone number an ziahna tur register chhawpchhuah vek ni se tia rel a ni bawk.
Pungkhawm an tlem zawk theih nan association emaw, eng pawl emaw an member thi an lo awm a nih pawhin pawl emaw hnathawhpuite aiawhin mi pahnih aia tam lo intirh ni sela tia rel a ni a. Chhungkhat laina ah pawh a tlem thei ang ber an kal a tur a ni, tih a ni a. Zaikhawm hi COVID-19 hrik thehdarhna remchang tak a nih avangin mitthi vuinaah zai loh ni se tiin, kalkhawm tur zawng zawngte tha taka an hmai tuam tura tih an ni bawk.
Meeting-ah hian Chief Minister chuan Covid 19 vei leh vei loh test na ngawrh zawka tih zui zel pawimawh a tih thu sawiin, Rapid Antigen Test kit lei belh a nih tur thu a sawi bawk.
State pawn atanga lo lut te uluk leh zuala testing an tih dan te, Assam leh Tripura atanga lo lut tur te chu a negative chauh State chhunga an lo luh phal a nih thu te, frontline worker te an him zawk nan a fimkhur lehzuala inkaihhruaina siam chungchang te sawi a ni a. Khawtlanga tam tham taka inkaichhawng an pun thut pawha a inenkawlna hmun tur indaihlohna awm thei chungchang sawi ni bawkin, kohhran hruaitute hmunhma a tul chuan hman a ngaih thu te sawi a ni bawk.
Meeting-ah hian Health Minister Dr. R. Lalthangliana, CHief Secy, H&FW Secretary, DM&R Secretary, IGP (Law and Order), DC Aizawl leh official te, IMA, MKHC, CYMA, MUP leh MHIP aiawhte an kalkhawm a ni.
(DIPR)
<><><>
COVID TALLY
Vairengtea paltlang tur te COVID19 vei leh vei loh endik hna kalpui mekah nimin tlai dar 5 atanga tukin dar 5 thleng khan mi 20 in an kai tih Rapid Antigen Test hmanga hmuhchhuah a ni a, an vai hian natna langchhuak lo vek an ni.
Hri kai hmuhchhuah 20 zinga 1 hi tualchhung mi a ni a, nimin khan hnam dang mi 4-te’n hri an kai tih hmuhchhuah a lo ni tawh bawk a ni.
Vairengteah hian hnam dang 564 leh Mizo 164 enfiah an ni a, Heti hian tunhnaia vairengtea Covid19 hri kai leh kai lo enfiah kalpui thar lehah khualzin 728-te chu enfiah an ni ta a ni.
Hetianga Covid19 hri kai hmuhchhuah thar tur an awm tak reng avang hian Vairengte Police check Gate atanga Vairengte Kawngthar Auto stand inkar chu tuma tlawhpawh phal loh hmun atan puan a lo ni tawh a ni.
Containment Zone chhungah hian mihring leh Lirthei eng chi mah phalna nei lo chuan luh leh chhuah phal a ni lova, a huam chhunga awm mipui vantlang tumah pawn chhuah phal a ni lo bawk.
Nimin lamah ZMC Laboratory-a RT-PCR khawl hmanga swab sample test zingah COVID-19 vei 1 hmuhchhuah thar a ni a. Tihian COVID19 positive hmuhchhuah tawh zawng zawng zat chu 649 a ni a, enkawl lai mi 319 an awm mek a ni.
(Andrew PTC /DESK)
<><><>
AIZAWL DC
Village Council leh Local Council inthlan hmachhawn mek tluang leh felfai taka neih a nih theih nan Aizawl District chhungah inpuahchahna ngawrh taka neih chhoh mek a ni a.
Nimin khan Aizawl DC Conference Hall-ah Addl DC Pi K.Vanlalruati kaihruaiin Mizoram People's Forum te meeting neihpui an ni a. Election fel fai taka neih a nih theihnan MPF tawiawmna chu a pawimawh hle a ni tih sawiin, State Election Commission-in inthlanni atana inkaihhruaina a duan chu zawm a nih theihnan vengtina MPF te, tlawmngaia tan la turin a ngen bawk a ni.
He meeting-ah hian inthlan puan a nih atanga result puan thlenga lekkawh tur Model Code of Conduct chu chipchiar taka sawiin MCC chu dik leh felfai taka inthlan a nih theih nana ECI in zawm ngei tura a duan a nih thu leh a zawm lo chu dan tlawhchhana an chunga hremna lekkawh a nih theih dan te tarlan a ni bawk a. Dan bawhchhiatna chi hrang hrang awm theite pawh meeting-ah hian sawiho a ni.
(DIPR)
<><><>
LUNGLEI – BSF SECTOR COMMANDANT
BSF Aizawl Sector Commandant DIG, TG Simte chuan Lunglei Zotlanga awm 61 Bn. BSF sipai panga ten Covid19 hri an kai tih hmuhchhuah a ni chu pawi a tih thu leh hri kai belh an awm tawh loh nan theihtawpa hmalak a ni ang, a ti.
DIG, TG. Simte hian nimin khan 61 BSF Zotlang hi tlawhin thil awmdan a enfiah a. He hunah hian amah kawmtu chanchinbumite hnenah 61 BSF Zotlang atanga Covid-19 hri kai 5 hmuh a ni chu pawi a tih thu leh anmahni thiam loh liau liau a nih thu a sawi a. Hetiang thil a thlen chhan nia a hriat chu Mizoram pawn lam atanga sipai lo lette anmahni Camp chhunga sawrkarin inkhunghranna hmun a siamsak ni lo, hmun remchang dangah an lo khunghran vang nia a hriat thu a sawi a. Hetiang a nih avang hian heng hri kaite khunghran an nih laia enkawl hna thawktu mi pathum leh an khunghranna Puan In thiattu mi paruk te chu khung hran nghal an ni, a ti a. BSF Camp awmna Zotlang mipuite leh Lunglei mipuite chu hlauthawng lutuk lo tura a duh thu leh hetiang thil a thlen nawn tawh lohna tura hmalak nghal a tum thu te, 61 BSF Camp-a ruahmanna fel tawk lo awm te pawh enfiaha siam that a nih tur thu a sawi.
BSF te pawn chhuak tam leh inthunun tha lo anga sawi awm thin pawh pawi a tih thu sawiin, sipaite chu thil tul bik tak leh loh theih lohah lo chuan chhuahtir an ni ngai lova, an chhuah pawhin fimkhur tak leh dan zawm tha tura tih vek an ni thin a, a chhan leh vang hre chiang lova BSF sipaite puhchhiatna awm thin erawh pawi a tih thu a sawi.
Covid-19 hrileng kara Mizote tlawmngaihna leh thuawih theihna chu fakawm a tih thu BSF DIG TG. Simte hian a sawi a. A bikin VLTF te inpekna ropui a tih thu leh sawrkar pawhin rinrawl berah a nei nia a hriat thu te, BSF-te nen thawhhona tha zawk nei zel tura theihtawp an chhuah thu a sawi a. Mizoram chhungah BSF Battalion pali awm mekin sipai 5,000 chuang an awm a ti.
(Thanghmingliana PTC Lunglei)
<><><>
MAMIT – GAUHATI JUDGE
Mizoram State Legal Services Authority (SLSA) Executive Chairman, Gauhati High Court Judge, Justice Michael Zothankhuma’n nimin khan Mamit District Jail tlawhin hemi hnu hian Mamit I&PR Conference Hall-ah Mamit District chhunga Para Legal Volunteers (PLV)-te tana intuaitharna hun buatsaih a hmanpui.
Justice Michael Zothankhuma chuan PLV te’n an hnathawh leh tih tur ber chu dan hnuaia midangte tanpui a ni, a ti a. Mi harsa leh thil hre lo zawk te’n Court sang zawk thleng kher lova an awm hmuna an harsatna chinfelpui leh thingtlanga awmte’n sawrkar Department hrang hrang hmalakna leh tanpuina awm thei tur an hriat theih nana hrilh te pawh an hna a nih tel thu pawh sawiin, midangte tanpuina kawnga mahni inpe-a thawhhlawk tak an nih avangin an mamawh leh an harsatnate ngaihthlaksak ngei a duh avangin intuaitharna hun chu buatsaih a ni, a ti.
Intuaitharna hunah hian PLV hrang hrangte tan an harsatna leh hriat duh an neih te sawichhuahna hun hawn a ni a, an zawhnate chu Pu Michael Zothankhuma leh mithiam dangte’n an chhang nghal zel a ni.
Tukina Justice Michael Zothankhuma’n Mamit District Jail a tlawhnaah hian Jail tang mekte dinhmun enin harsatna an neihte a ngaihthlaksak a; Jail Building leh hmunhmate a enfiah nghal bawk a. Mamit DC Dr. Lalrozama leh Mamit CJM bakah State Legal Services Authority hotute’n an tawiawm a ni.
(RD Darthanzauva PTC Mamit)
<><><>
COVID VACCINE
COVID-19 invenna damdawi siam leh vil zui chungchang ngaihtuah tura sawrkar laipuiin a din mithiam rual awmna National Expert Group on Vaccine Administration for COVID-19 chu nimin khan a hmasaber atan an thukhawm a. Ramchhungah COVID-19 vaccine siamchhuah leh semdarh dan tura ruahmanna an ngaihtuah a. He inhmuhkhawm hi Chairman Dr. V K Paul chuan Niti Aayog Member chuan a kaihhruai a. Vaccine hmuhchhuahna tura ruahmannaah khawl changkang hmanga a ruangam leh a taka tihhlawhtlinna tur ngaihtuah bakah vaccine sem kawnga hmalak dan turte an ngaihtuah a. COVID-19 damdawi enchhinna tura mihring hman tur thlan dan tur sawiho ni bawkin hemi atan hian Standing Technical Sub-Committee of National Technical Advisory Group on Immunization atangin an rawtna lak ni se an thi a. COVID-19 vaccine neih dan turah ramchhunga siam leh ramdang atanga neih theih dan tur ngaihtuah a ni a, hei bakah hian mipui ngaihpawimawh hmasak tur bikte siamfel ni se an ti bawk. Expert group te chuan COVID-19 vaccine neihna tura sum ngai zat turte an chhut a. Inida-in a thenawm ramte leh COVID-19 vaccine siam kawnga a thawhpui ramte a thlawp dan pawh sawilan a ni bawk. Nimin thukhawm chuan ramchhunga vaccine siamchhuak tura hmalakna chu tihchak ni se a ti a, khawvel hmun danga vaccine sem kawngah pawh nasa zawka inrawlh nise an ti bawk.
(Newsonair)
<><><>
POLICE
Kuminah misual hnuchhui kawnga Police hna thawk tha chawimawina Union Home Minister's Medals for Excellence chu Police 121 hnenah hlan a ni dawn. He medal hi kum 2018 atang khan sem chhuah tan a ni a. Thil sual titute chhuichhuah kawnga police thawk tha leh fawkawm chungchuangte hnenah hlan thin a ni a. Kumia chawimawina dawng tur zingah hian 15 hi CBI ami an ni a, Maharastra leh Madhya Pradesh Police atangin 10 ve ve, UP Police atangin pariat leh Kerala leh West Bengal Police atangin pasarih ve ve an ni a. Hmeichhe police officer 21 lai an tel bawk a ni.
(Newsonair)
<><><>