Radio
ALL INDIA RADIO AIZAWL
REGIONAL NEWS UNIT
REGIONAL NEWS BULLETIN
HEADLINES (MORNING NEWS) - 10.8.2020
1. Nimin khan Mizoramah Covid-19 hri kai 7 hmuhchhuah thar an ni.
2. Mizoram University hnuaia Under Graduate exam neih tur chu COVID19 hripui kai hmuhchhuah an awmbelh zel tak avangin thulh rih a ni.
3. Hrikai hmuhchhuah belh avangin Aizawl khawpui chhung veng thenkhat leh khaw dang inkharkhip an puang.
4. Vawiin atang hian Assam Health Department chuan Guwahati khawpui chhunga Covid-19 hri kai, in lama inkhung hran thlang zawkte chu pulse oximeter leh Covid-19 damdawi a thlawnin an pe dawn.
<><><>
7 MORE COVID-19 POSITIVE FOUND
Nimin Pathianni chawhma dar 11 hnu lama hrikai enfiahnaah hrikai 7 hmuhchhuah leh a ni a. RAT hmanga endik a ni.
Heng mite hi Kolasib district mi 4, Aizawl district mi 2 leh Champhai district mi 1 an ni a. ZMC-a sam 55 endik chu hri lakah an fihlim vek thung a ni.
Hri kai hmuh thar zinga 4 chu driver leh handyman, Kolasib district-a endik an ni a. Hri kai zingah hian hri kai hnena kai chhawng, hri kai buaipuitu (frontline worker) 1 a tel bawk a, midang 2 chu state pawn atanga lo kal an ni.
Heti hian Mizorama Covid-19 hri kai tawh zat chu 620 an ni ta a. Hri kai 298 enkawl dam an ni tawh a, tuna hri kai enkawl mek chu 322 an ni.
Hetihlai hian tunhnaia Covid-19 hripui kai thar zingah Covid-19 hri dona kawnga a hmatawnga thawktu doctor pakhat bakah inkhunghranna hmuna vengtu hnathawktu Police pakhat leh BSF mi pakhat an tel a.
Hei vang hian fimkhur thilah Aizawl veng thenkhat leh khaw thenkhatah inkharkhip puan a ni a. Chu’ngte chu - Electric veng Sec 4 leh 5, Kulikawn Neuva Section, Venghlui, Mission vengthlang, Republic veng, Dawrpui vengthar, Tuikual South, Melriat, Thingdawl, leh Darlawnte an ni.
(DIPR & Desk)
<><><>
COVID-19 : EXAMINATION
Vawiin atanga Mizoram University hnuaia exam hrang hrang neih tur chu COVID19 hripui kai hmuhchhuah an awmbelh zel tak avangin thulh rih a ni.
Mizoram University in Under Graduate Degree Examination buatsaih a tum chu thulh rih a ni a, Professional course erawh lo tum sa angin kaltlangpui tur ni a hriat a ni.
Nimina Health & Family Welfare Minister Dr R Lalthangliana hova thutkhawm hmanhmawh kohah Mizoram University hnuaia Under Graduate leh Post Graduate exam tur te chu exam hrih lo turin Disaster Management & Rehabilitation Department atanga thurawn pek ni se tih rel a ni tawh a ni.
Hei bakah hian Nitin mamawh phurtu truck driver bakah ram pawn atanga thlawhna a lo lut thin, nitin mi 60 atanga 70 leh lirtheia Vairengte paltlanga lo lut mi 50 an awm tih ngaihthlak a ni a, Mizoram-ah COVID-19 hri kai an pun tak hluai avangin nitin a lo lutte chu awmze neia khuahkhirh tulin an hria a, a tul anga hmalak ni se tih a ni. Rapid Antigen Test Kit singkhat lei belh tura hmalak remtih a ni bawk.
Vairengte-ah Doctor leh Lab Technician 6 dah belh nghal tura rel a ni bawk a. Zoram Medical College, Falkawn chu COVID-19 veite enkawlna tur bika ruahman a nihna angin, COVID-19 vei nilo chu damlo dang tumah admit tawhloh tura rel a ni. Khawtuala inkaidarh lo awm palh ta se, hemi atana inbuatsaihna, a bikin a hma tawnga thawkte (frontline workers) tan hmalak dantur ruahmanna siam ni se tih rel a ni bawk. Swab Sample result nghak tan inkaihhruaina (SOP) siam ni se tih remtih tlan a ni.
Mitthi vuina programme-a mipui kalkhawm zingah hri kai hnaihtu chhui ngai ta se, harsatna a awm theih dawn avangin, chhiatni thatni inkaihhruaina chungchangah YMA hruaitute leh Kohhran hruaitute nen inrawn tlan that leh ni se tih a ni. Gymnasium leh Sports Complex te khar leh tura hmalak ni se tih remtih a ni.
He thutkhawm hmanhmawh-ah hian Information and Public Relations Minister Pu Lalruatkima chuan Cabinet Meeting-in a lo rel tawh anga Minister pahnih Pu Lalchhandama Ralte leh Pu TJ Lalnuntluanga te nen Inrinni lama National Highway 306 siamthat mek avanga lirthei tangkhang te, a khalhtute zinga COVID-19 kai hmuhchuah chungchangah, a hmuna an tlawh bakah Kolasib leh Vairengte Check Gate thleng an thlawh nghal thu a sawi a. Tun dinhmunah nitin mamawh a bikin buhfai dinhmun a tha tih a sawi a, Vairengte Screening Point-a hmalakna chak leh zuala kalpui a nih theihna’n ruahmanna an siampui tih a sawi a. COVID-19 hripui leng chungchangah kan hmabak sawi thiam har hle mah se; sawrkarin theihtawp chhuahin hma a la a, mipui te pawh sawrkar hmalakna ring ngam a, chi-ai lo tur leh mahni awmna hmun theuhah fimkhur turin a chah a ni.
Chief Secretary Pu Lalnunmawia Chuaungo chuan Independence Day, 2020 lawmna-ah National Anthem, Guard of Honour lak leh Chief Minister thuchah a awm dawn tih a sawi a, tunlai boruak avanga mipuite him nan kum dang angloin mipui leh zirlai sawm an ni lo tih a sawi a, parade a awm dawn loh thu leh Governor’s at home programme a awm dawn loh thu a sawi bawk.
Meeting-ah hian sawrkar official pawimawh te an tel a ni.
(DIPR)
<><><>
COVID-19 : ESSENTIAL ITEMS
Covid-19 hrileng avanga \henawm state ramri a lirthei khuahkhirh vanga thil man to uchuak a zawrh a awm loh na’n bungraw man khuahkhirh kawngah sorkarin theihtawpa hmalak a rel.
Mizoram pawn a\anga bungraw rawn phurluttu truck khalhtu leh handyman tam tham takin hripui an vei tih hmuhchhuah a nih tak avangin lo lut turte khuahkhirh a ni ta a. Hetiang a nih avang hian mipui nitin mamawh dinhmun chungchangah inrinni khan Food, Civil Supplies and Consumer Affairs Director Dr. Lalhriatzuali Ralte hovin FCS&CA Conference Hall-ah inkhawm hmanhmawh neih a ni a. Thil man to uchuak a zawrh a awm loh nan mipui mamawh thil man khuahkhirh lamah theihtawpa hmalak an rel. Inkhawmah hian mipui nitin mamawh hrang hrang dinhmun ngaihthlak niin, buhfai ah chuan ZIDCO report atangin tun dinhmunah mipui tan harsatna awm rihlo tura ngaih a ni a. Supply Kudam lamah OMP buhfai a \hathnem deuh avangin hlanthlaka dahna tur a awm rihlo a, hei avang hian buhfai hi an la phur rih lo a ni. Ei rawngbawlna gas LPG hi a thunna hmunpui a\anga LPG load phur truck 70 chu an agency la thleng lo an awm a, an lo thlen thuai theih na'n hmalak tum a ni. MIDA chuan tun dinhmuna an neih sa pawhin chawlhkar hnih vel chu mipui mamawh a la phuhru thei tho tura an ngaih thu an sawi.
Covid-19 hri len denchhena thil man uchuak taka lo chhiar an awm loh na'n a tam thei ang bera mipui leh dawrkai te hnenah fimkhur tura inhrilhhriat a, mipuiin dawrkai zinga dik lo taka thil man lo chhiar to uchuak an hriat chuan Legal Metreology hnenah report zel turin \hukhawm chuan a rel a ni.
Eichawp leh mipui nitin mamawh phurtu driver te chu kawng laka thil lei mai mai a him loh avangin anmahni tla tur eitur pai tura hrilh hriat nawn ni se tiin \hutkhawmah hian sawi a ni a. Driver/handyman zinga Covid-19 hei kai hmuhchhuah, enkawlna hmuna dahluh tawhte lirthei leh bungraw kalsan chungchangah IOC lamin transporter te be pawpin a \ul angin hma la tura ruahmanna siamin, district thuneitute leh Disaster Management and Rehabilitation department lamah kal zel dan tur thlen ni se tia rel a ni bawk.
Mipui nitin mamawh chi hrang hrang 26 bakah chini, tui (uma thun), hmuihmer bawlhlo, purun var, damlote ei tur bik food supplements, chhang leh a behbawmte chu telh belh nise tiin rel a ni bawk.
Vairengte a truck rawn khalhtute leh puibawmtute chu sawrkar ruahmanna anga Covid-19 an vei leh vei loh endik an nih hnu a an zinga hri kai an lo awm palh chuan a thlaktu tur IOC hnuaia transporter ten an ngaihtuah tura ngaih a ni a. Thlak tur an lo awm remchanglo palh a nih pawhin Mizo driver zingah Explosive License nei pawh an awm theih tur thu sawi chhuah a ni a. IOC lam pawhin an depot a phurh tur la tura kal te chu covid-19 vei leh vei loh endiktir zel tura hmalak a nih theih na'n leh phurh tur lakna hmunah hian inchiahpiah lo a, him zawka kalpui a nih theih na'na ruahmanna siamin sawrkarah thlen rel a ni bawk.
(DIPR)
<><><>
ASSAM GOVT TO PROVIDE PULSE OXIMETER, FIRST-LINE SUPPORTIVE MEDICINES TO COVID-19 PATIENTS IN HOME ISOLATION IN GUWAHATI
Vawiin atang hian Assam Health Department chuan Guwahati khawpui chhunga Covid-19 hri kai, in lama inkhung hran thlang zawkte chu boruak mamawh dan enna khawlte (pulse oximeter) leh Covid-19 damdawi a thlawnin an pe dawn.
Health Minister Himanta Biswa Sarma chuan Health Department-in damdawi mahmawh tana biak pawhna tur (Tele Medicine service) phone number 104 an tihnun thu a sawi a. Hetiang hian hmun dangah pawh tih thuai a ni ang a ti.
Assam-ah hian nimin khan Covid-19 hri kai 1,800 enkawl dam an ni a. Hri kai mek hi sing 1 sang 7 dawn an awm mek a ni.
(newsonair)
<><><>
MEGHALAYA REPORTS 39 NEW COVID-19 CASES
Nimin khan Meghalaya-ah Covid-19 hri kai thar 39 an awm a. Hri kai enkawl mek 566 an awm.
Meghalaya-ah hian Covid-19 hri kai 1062 an awm tawh a, enkawl dam 490 an awm tawh a, mi 6-in an thihpui tawh a ni.
(newsonair)
<><><>
MANIPUR ADVISES PEOPLE TO STOP USING CHLORINE DIOXIDE
Manipur Health Department chuan state mipuite chu Chlorine dioxide pe chhuak thei, awrh theih leh bang vela khai theiha siam ‘Virus Shut Out’ chu hmang lo turin an hriattir. He thil hi ram dang siam a ni a, mipuiin an hmang nasa hle a ni.
State Health Department thupuangtu chuan hetiang thil hman hian mipuiah hri a tipung niin a sawi a. Chlorine dioxide hi thil tuiril lam a ni a, tui in tur tihthianghlimna atana hman a ni. Hetiang thil hi a phuhin emaw, boruak a pekchhuahin emaw virus a that thu hriat a nih loh thu an sawi a. State Health Department chuan hetiang hmanraw finfiahna awm lo hi Covid-19 hri leng laka invenna atan a hman tlak loh thu an sawi a ni.
Hetiang thil hi duh an tam em avangin Manipur-a damdawi dawr tin deuhthaw-ah man to taka hralh chhuah a ni.
Manipur-ah hian darkar 24 kalta chhung khan Covid-19 hri kai 118 an awm belh a, dam lo 117 enkawl dam an ni bawk. Manipur-a Covid-19 hri kai tawh zat chu 3,753 an ni a, 2044 enkawl dam an ni tawh a, enkawl lai 1698 an awm a ni.
<><><>