Radio
ALL INDIA RADIO NEWS AIZAWL REGIONAL NEWS BULLETIN
HEADLINES (EVENING) - 9.8.2020
1. Nimin leh vawiina hri kai hmuhchhuah 43 zinga pakhat,doctor a tel ve avangin a kalna veng leh khaw engemawzatah pawn chhuah khap a ni.
2. Covid-19 hrileng avanga \henawm state ramri a lirthei khuahkhirh vanga thil man to uchuak a zawrh a awm loh na’n bungraw man khuahkhirh kawngah theihtawpa hmalak an rel.
3. Tripura-ah COVID-19 avangin BSF pahnih telin mi pali darkar 24 chhung khan an thi.
4. India chuan vawiin khan COVID-19 dona kawngah bung thar kaiin nikhatah sample nuai 7 a test hman
<><><>
COVID-19 : TALLY
Nimin leh vawiina Zoram Medical College (ZMC) laboratory leh hmun hrang hranga sample endikah Covid-19 hripui kai 43 hmuhchhuah thar a ni.
Hripui kai thar zingah hian Covid-19 hri dona kawnga a hmatawnga thawktu doctor pakhat bakah inkhunghranna hmuna vengtu hnathawktu Police pakhat leh BSF mi pakhat an tel a. An zinga 18 hi Kolasib district a National Highway 306 a truck khalhtu leh anmahni puitu tangkhang zing ami an ni a. An zinga 17 hi Assam mi an ni a, pakhat chu Rajasthan mi a ni. Hri kai hmuhchhuah thar, a bik takin sample lakkhawm hna thawktu doctor avang hian veng hrang hrangah leh Aizawl hnaih khaw 2-ah mipui an ralkhel hle a. Hri kai hmuhchhuah thar nena inhnimhnai chhui a hriat chinte chu khung hran nghal an ni a, Aizawl veng \henkhat bakah Sairang leh Melriat khuate chu mipui pawn chhuah khapa inkharkhip puan a ni.
He Doctor chenna Dawrpui Vengthar chu LLTF te chuan Aizawl bawrhsap nena inbiak rawn hnu-ah thu leh awm hma atan pawnchhuah an khap a. Pawn chhuah khap dang hriat theih chinte chu Venghlui, Kulikawn Venga Neuva section huamchhung, Electric Veng hmun \henkhat, Mission Veng section 2 te a ni a. Dinthar leh Republic Veng LLTF chuan inkhawm hmanhmawh kovin an ngaihtuah a, an thutlukna kan la hre hman lova. Chaltlang Lily Veng leh Venghnuai LLTF-te chuan mipuite fimkhur tura chahin hri kaiin a hnimhnaih ni a hriatte chu an chenna inah an khunghran tawh thu an sawi.
Tukin khan Kolasib Dist ah Rapid Antigen Test (RAT) hmangin phailam a\anga lo lut truck khalhtu leh handyman hnamdang 3 te chu hri an kai tih hmuhchhuah a nih thu puan a ni a. A hnu-ah mi 15 dang hri kai hmuhchhuah leh a nih thu puan a ni leh a. Heti hian phailam a\anga bungraw phura lo lut, Thingdawl leh Se\hawn inkar vela tangkhang truck khalhtu leh handyman hri kai hmuhchhuah tawh zat chu 39 a ni a. Anni rual hian Se\hawn khua a mipa naupang kum 12 mi chu he’ng truck khalhtu leh handyman te’n an kai ni a rinhlelh hri kai a awm bawk.
ZMC-a sample endik zinga 25 (BSF mi 17 leh civil mi 8) hri kai hmuhchhuah thar a ni. Lawngtlai ami 1 tihloh Aizawl Dist vek niin hri kai sa-in an kai chhawn mi 3 an awm. Police leh BSF mi bak, Aizawl district a hri kai hmuhchhuah tharte hi mipa 2 leh hmeichhia 2 niin, an zingah hian hmeichhe naupang kum 5 a upa a tel a. Mi 3 hi chhungkua niin Assam a\anga lo haw an ni a. Tripura a\anga lo haw mipa kum 33 mi a tel bawk a, an vai hian inkhunghranna hmuna awm lai mek niin hri kai an nih a langchhuak hlawm lo. Lawngtlai district a Covid-19 hri kai hmuhchhuah hi hmeichhe naupang kum 7 mi a ni a, a nu hri kai-in a kaichhawn ni a hriat a ni a, Covid-19 natna vei anga a lanchhuah avanga sample endik sak, hri kai a ni tih hmuhchhuah tak a ni.
ZMC lab-a endik zingah Hri kai a\anga kaichhawng mi 3 tih loh midang 22-te hi khunghran lai vek an ni. Heti hian Mizorama Covid-19 hri kai tawh zawng zawng chu mi 608 an tling tawh a, mi 298 chu enkawl dam ni tawhin mi 310 chu hri vei mek an ni a. Vawiin thlengin hripui thihpui an la awm lova, hri kai 2 chu state pawna thawn chhuah an ni.
(Desk, DIPR)
<><><>
COVID-19 : EXAMINATION
Mizo Students' Union (MSU) General Headquarters leh Aizawl City College Joint Student's Union (ACCJSU)te chuan naktuk a\anga Mizoram University hnuaia ekzam neih tur chu \hulh ni se an ti.
MSU leh ACCJSU vawiina MSU pisa a \hukhawm chuan Mizoram University (MZU) in naktuk atanga Under Graduate Degree Examination leh Professional course buatsaih a tum chu Covid-19 hrileng avanga khawvel pum a buai lai a nih avang leh Mizoramah a vei thar hmuh chhuah zel a nih avangin thulh nise an ti a. Zirlai exam tura inbuatsaih zawng zawng te pawh hrileng darh zel tur ven na’n class room exam a tel lo turin vawiin khan thuchhuah siamin hriattirna an chhuah. Zirlai exam lui leh hrileng vanga harsatna tawk an awm chuan MSU leh ACCJSU chuan a buaipui dawn lo a. He exam a tel lo zirlaite'n harsatna an tawk a nih chuan MSU leh ACCJSU chuan an zirna kawngah bahlahna an tawhloh na’n a tawp thlengin a buaipui dawn a ni. MSU leh ACCJSU chuan MZU thuneitute pawh he hrileng vanga an dinhmun a \hat hma chu exam buaipui rih lo turin a ngen nghal bawk a ni.
(Corr)
<><><>
COVID-19 : ESSENTIAL ITEMS
Covid-19 hrileng avanga \henawm state ramri a lirthei khuahkhirh vanga thil man to uchuak a zawrh a awm loh na’n bungraw man khuahkhirh kawngah theihtawpa hmalak an rel.
Mizoram pawn a\anga bungraw rawn phurluttu truck khalhtu leh handyman tam tham takin hripui an vei tih hmuhchhuah a nih tak avangin lo lut turte khuahkhirh a ni ta a. Hetiang a nih avang hian mipui nitin mamawh dinhmun chungchangah nimin khan Food, Civil Supplies and Consumer Affairs Director Dr. Lalhriatzuali Ralte hovin FCS&CA Conference Hall-ah inkhawm hmanhmawh neih a ni a. Thil man to uchuak a zawrh a awm loh nan mipui mamawh thil man khuahkhirh lamah theihtawpa hmalak an rel. Inkhawmah hian mipui nitin mamawh hrang hrang dinhmun ngaihthlak niin, buhfai ah chuan ZIDCO report atangin tun dinhmunah mipui tan harsatna awm rihlo tura ngaih a ni a. Supply Kudam lamah OMP buhfai a \hathnem deuh avangin hlanthlaka dahna tur a awm rihlo a, hei avang hian buhfai hi an la phur rih lo a ni. Ei rawngbawlna gas LPG hi a thunna hmunpui a\anga LPG load phur truck 70 chu an agency la thleng lo an awm a, an lo thlen thuai theih na'n hmalak tum a ni. MIDA chuan tun dinhmuna an neih sa pawhin chawlhkar hnih vel chu mipui mamawh a la phuhru thei tho tura an ngaih thu an sawi.
Covid-19 hri len denchhena thil man uchuak taka lo chhiar an awm loh na'n a tam thei ang bera mipui leh dawrkai te hnenah fimkhur tura inhrilhhriat a, mipuiin dawrkai zinga dik lo taka thil man lo chhiar to uchuak an hriat chuan Legal Metreology hnenah report zel turin \hukhawm chuan a rel a ni.
Eichawp leh mipui nitin mamawh phurtu driver te chu kawng laka thil lei mai mai a him loh avangin anmahni tla tur eitur pai tura hrilh hriat nawn ni se tiin \hutkhawmah hian sawi a ni a. Driver/handyman zinga Covid-19 hei kai hmuhchhuah, enkawlna hmuna dahluh tawhte lirthei leh bungraw kalsan chungchangah IOC lamin transporter te be pawpin a \ul angin hma la tura ruahmanna siamin, district thuneitute leh Disaster Management and Rehabilitation department lamah kal zel dan tur thlen ni se tia rel a ni bawk.
Mipui nitin mamawh chi hrang hrang 26 bakah chini, tui (uma thun), hmuihmer bawlhlo, purun var, damlote ei tur bik food supplements, chhang leh a behbawmte chu telh belh nise tiin rel a ni bawk.
Vairengte a truck rawn khalhtute leh puibawmtute chu sawrkar ruahmanna anga Covid-19 an vei leh vei loh endik an nih hnu a an zinga hri kai an lo awm palh chuan a thlaktu tur IOC hnuaia transporter ten an ngaihtuah tura ngaih a ni a. Thlak tur an lo awm remchanglo palh a nih pawhin Mizo driver zingah Explosive License nei pawh an awm theih tur thu sawi chhuah a ni a. IOC lam pawhin an depot a phurh tur la tura kal te chu covid-19 vei leh vei loh endiktir zel tura hmalak a nih theih na'n leh phurh tur lakna hmunah hian inchiahpiah lo a, him zawka kalpui a nih theih na'na ruahmanna siamin sawrkarah thlen rel a ni bawk.
(DIPR)
<><><>
COVID-19 : LAWNGTLAI
Lawngtlai-ah chuan phailam a\anga bungraw lalut \hin dawrkaite hri an kai leh kai loh endik vek tum a ni.
Lawngtlai a kan Corr Lalngheta Ralte sawi danin Mizoram pawn a\anga rawn lut, lirthei khalhtu engemawzat hri kai hmuhchhuah an nih tak avangin Lawngtlai khawpui mipui te an him zawkna atan phai lam a\ang a bungraw lalut \hin dawrkai te chu hri an kai leh kai loh enfiah tum a ni a. Lai Autonomous District Council (LADC) a Sanitation Officer leh Market Control Committee Secretary ni bawk, Pu C. Lalhmunsiama chuan phai lam a\anga bungraw lalut \hin dawrkai te chu ngaih pawimawh hmasak an nih tur thu sawiin dawr nghaktu te chu RT-PCR / RAT hmang a endik an ni ang a ti.
Hmalakna hmasa-ah Lawngtlai Bazar huamchhung a hnamdang dawrkaite chu hri an kai leh kailoh endik hmasak an ni dawn a, a \ul dan azirin Lawngtlai khawpui chhunga dawrkai, phai lam atang a bungraw lalut thin (Non-Tribal) dangte pawh hma chhoh zel tura ruahman a ni.
(Lalngheta Ralte, PTC, Lawngtlai)
<><><>
COVID-19 : BSM BUDGET
Mizoram Baptist Kohhran chuan hripui leng karah kum 2019-2020 a sum hmuh zat tura an bituk chu cheng nuai 308 chuangin an khum
Covid 19 hrileng avanga BCM Accounts endik hna hun rei tak tih theih a nih loh hnu-in July thla khan Internal Audit chu neih niin, zawh fel a ni a. Kum liam ta, 2019-2020 (April – March) chhunga BCM Assembly in sum hmuh tur zat a beisei chu cheng nuai 308 chuangin khum a ni. Kum 2109-2020 Assembly inKohhran thawhlawm atanga hmuh tura beisei chu cheng vaibelchhe 63, nuai 13, leh singriat a ni a, chutih laiin cheng vaibelchhe 66, nuai 21, sing 8, sang 8 leh 172 hmuh a ni a, sum hmuh tura beisei zat pumpui khumna chu cheng vaibelchhe 3, nuai 8, sang 8 leh 172 a ni.
(Desk)
<><><>
TRIPURA
Tripura-ah COVID-19 avangin BSF pahnih telin mi pali darkar 24 chhung khan an thi. Thudawn danin COVID-19 avang hian Tripura-ah hian mi 40 an thi tawh a. Sample 1,97,734 test atangin hri vei hmuhchhuah tawh hi 6164 an awm tawh a. Tuna hri vei enkawl mek hi 1876 an awm a ni.
Hri kai hmuhchhuah thar chak dan hi za zela 3.04 a ni a, mi maktaduai 1-ah mi 49,463 test zel anga chhut a ni a. Hri vei enkawl dam chak zawng hi za zelah 69.61 a ni a. Thihpui hi za zelah 0.67 a ni.
(Newsonair)
<><><>
COVID
India chuan vawiin khan COVID-19 dona kawngah bung thar kaiin nikhatah sample nuai 7 a test hman. Union Health Ministry sawidanin ni engemawti chhung nikhata nuai 6 bawr vel test thin chu vawiin khan hmasawn hretin nuai 7 test hman a ni a. Darkar 24 liamta chhung khan nuai sarih sing 1 sang 9 leh 364 test a ni a. Union Ministry chuan chak taka test kalpui a, khunghran ngai khunghran vat leh damlo tha taka enkawlna pek chu an thlurbing thu a sawi a. Kar liamta chhung khan state thenkhat COVID-19 thihpui tamna te chu inkawmhona neih pui an ni bawk.
Hetihlai hian nikhata hri vei enkawl dam an tam ber tumah darkar 24 liamta chhung khan 53 leh 879 enkawl dam an ni a. Heti hian hri vei enkawl dam hi nuai 14 sing 8 an tling tawh a. Hri vei enkawl mek aiin a let hnihin enkawl dam hi an tam tawh zawk a. Enkawl dam chak zawng pawh zaa 68.78 an tling tawh a. Sawrkar laipui chuan state sawrkarte nena tangruala chak taka hma an lak hona chuan enkawl dam zat hi a ti chak niin a sawi a. Thihpui zat pawh tlahniam zelin zaa 2.01 ah a tlahniam tawh a ni.
(Newsonair)
<><><>