RADIO

ALL INDIA RADIO AIZAWL

REGIONAL NEWS UNIT

REGIONAL NEWS BULLETIN

HEADLINES (MORNING) - 02.08.2021

1. Tukina Covid19 dinhmun hriat thar berah mi 438 in an kai tih hmuhchhuah a ni.

2. Mizoram a cheng za zela 81-te’n hri danna dose hmasa an la tawh a, hri danna la kim tawh zat chu za zela 31 a ni.

3. Ram chhung hmun hrang hranga Covid-19 dinhmun a inthlau hle.

4. India mipui Covid-19 hrikai dam chhuak Vbch 3 leh nuaih 8 chuang an awm tawh.

<><><>

COVID ADVISORY

Sawrkar laipuiin a thlawn a kum 18 chin chunglam, Covid-19 hridanna a pek mek ah ngaithlatute,hridanna la vek turin kanngencheu a. Covid-19 lakainvennalamah lo inthladah lo ula. Inah tawm tlatin tultawpah lo chuan lo pawn chhuaklo ula, Hmaituamna vuah, midang hnaih loh, kut leh hma itih fai leh hridanna lak te lo ngai pawi mawh zel ang che u.

Covid-19 kaih hnawih a hriat duh nei chuan rampum huap helpline number - 01123978046 leh 1075 bakah, Mizoram tan 102 te hi biakpawhtheihreng a ni e.

Tunah chuan chanchinthar i lo ngaihthlak chhunzawm ang u.

(Desk)

<><><>

COVID UPDATE

Tukina Covid19 dinhmun hriat thar berah mi 438 in an kai tih hmuhchhuah a ni a,

Sample test zawng zawng zat 1212 zinga zaa 36.13 an positive a ni.

Tun dinhmunah hri kai tawh zawng zawng zat hi 39363 an ni a, 27024 enkawl dam an ni tawh a, enkawl lai mek hi 12189 tling tawhin, mi 150 in an thihpui tawh a ni.

Nimin khan ZMC RT-PCR laboratory-ah sample test a awm lova, TrueNAT laboratory-a sample test zingah COVID-19 positive 13 an awm a, Rapid Antigen Test hmanga COVID-19 positive hmuhchhuah thar 425 an awm thung a ni.

(DIPR)

<><><>

VACCINATION

Mizoram a cheng za zela 81-in hri danna dose hmasa an la tawh a, hri danna la kim tawh zat chu za zela 31 a ni.

Hri danna pek chungchanga sorkar thupuangtu Dr Lalzawmi chuan hri danna la tawh zawng zawng hi inrinni thleng khan mi nuai 8, sing 2, sang 8 leh 867 an tling tawh niin a sawi a. An zinga mi nuai 6, sing 3 leh 599 in dose hmasa an la tawh a, dose la kim tawh hi mi nuai 1, sing 9, sang 8 leh 268 an ni a ti. Hri danna pek hna hi hmun ruat bikah kalpui a nih rualin mamawh dan a zirin veng leh khaw hrang hrangah ruahmanna hranpa siam a kalpui a ni.

Aizawl district chu a mihring cheng tam lam a chhuta hri danna la tamna ber a ni a, Serchhip leh Lunglei district-in a dawt a, Lawngtlai district chu hri danna pek tlemna ber a ni a, dose pumpui pek tlemna ber erawh chu Siaha district a ni.

(Desk)

<><><>

AMC LOCKDOWN

Aizawl Municipal Corporation (AMC) huamchhung a inkharkhip kalpui chhunzawm turah Aizawl district bawrhsap chuan inkaihhruaina thar a chhuah a, a hma aiin a dul hret.

Inkaihruaina tharah chuan pawn chhuah leh inlenpawh khap zui tlat a ni a, Buildingkhata in hrang hrang luahte pawh in tlawhpawh khap a ni. LLTF ten vengchhung kawngpui pawimawh ahte tul lo leh danin a phal chin baka chhuak vak khuahkhirh na’n uluk taka duty-in hrui an pawt chhunzawm ang. Chhiatna thlen thei hnaah chuan LLTF te hriatpuina in hnathawh phalna Incident Commander in a pe thei ang a. Incident Commander-in phalna a pek chu movement permit atan hman theih a ni ang. Mahni compound chhunga bungraw awmsa hmanga a hmuna awmchilhtute'n hna an thawh phal a ni. Hnathawh pawimawh dang, loh theih loha chhunzawm ngai a awm chuan LLTF hriatpuina in Incident Commander in phalna a pe thei ang.

Dawrkaite’n LLTF te hriatpuina-in bungrua an lam emaw wholesaler ten an deliver thei anga. Dawr nei veng leh a la tu tur veng LLTF te inbe tawnin mipui pungkhawm huk awmlo turin preorder/appointment siam fel sa in bungraw lak leh sem dan tur a hun chhung (timing) hi ruahman tur a ni a. A tul angin Incident Commander ten an ruahman pui ang. Vengchhung dinhmun leh mamawh dan ang zelin LLTF ten tuna mamawh chin chauh lak/sem tur a ni. Rualkhaia chhungkaw tinte’n an chan theih dan tur dawrkai leh sumdawng leh LLTF te’n an ruahman tur a ni.

Ţul bik thil nitin khawsakna leh hnathawhna bungrua lak mamawhna mipui-ah a awm chuan LLTF hriatpuinain Home Delivery hmanga pekchhuah/sem theih a ni. Bungrua sem/pek-ah hian damdawi/medical equipment–te chu ngaihpawimawh tur a ni. Amaherawhchu bungraw mamawhtu hian LLTF-ah phalna a la hmasa anga, dawr neitu in LLTF phalna leh ruahmannaa dawr hawngin bungrua hi a deliver thei ang.

Phalna neia dawr bungrua lak leh sem lehHome Delivery tih nan hian Commercial Vehicle hman phal a ni a. Motor hman theih (empanelled) list hi LLTF hnenah zawh leh hmuh theih a ni.

Hetihlai hian Commerce and Industries chuan AMC huamchhunga LLTF te hnenah hriattirna leh ngenna chhuahin tunkat Thawhlehni leh Zirtawpni hian sa leh chawhmeh zawrhna hun siam turin a ti a. Inkharkhip chhunga mipuiin sa leh chawhmeh dang an nghei lohna turin fruit and vegetable supply kaltlanga sa leh chawhmeh zawrh ni hi ruahman turin a hriattir a ni.

(Desk)

<><><>

BLOCKADE CONTINUES

Thawhţanni kaltaa Vairengte dai a Mizoram police leh Assam police ten silai an hmehpuah atang khan phailam aţanga Mizoram a lirthei lut turte chu Assam lamin nimin thleng khan an dang chhunzawm zel.

Nimin khan Vairengte kal tlangin Mizoram atangin Assam Cachar District panin lirthei panga 5 a chhuk thla a, heng lirthei te hi - 1109 truck 2, tanker 1 leh private motor (Bolero) 2 anni a, heng lirtheiah hian hnam dang vek an chuang a, heng mite hian Mizoram chhungah harsatna an tawh loh thu an sawi theuh ani. Nimin vek khan Bairabi kaltlangin harsatna engmah awm lovin heng hnamdangte hian Hailakandi District an thleng ani.

Silchar DRC chuan, Silchar ah boruak a ralmuangin, Mizo awm mek te tan hlauh tur a awm rihlo a ti a, Mizote tihnat tuma chet lakna a awm loh thu a sawi a. DRC chuan nimin khan Silchar Mizoram House ah lirthei tangkhang Tanker 2; Oxygen Concentrator plant, Kolasib a dah tur phurtu lehtruck te chi 2 leh Bolero Pik-up 1, Oxygen cylinder phur a awm thu sawiin, khualzin tangkhang buaipui ngai an awm loh thu a sawi..

Hetihlai hian Kolasib DC Dr. H. Lalthlangliana chuan, phailam atanga Mizoram a awm hnamdang lirtheite chu Mizoram chhungah zalen taka an tlan reng thu leh an tihturte an tih zawhah Vairengte leh Bairabi kaltlangin Assam lamah an tlan haw theih reng thu a sawi a. Hnam dang mite chu thil tul leh pawimawh ti turin Mizoram ah an lo lut duh anih a, ILP leh document dangte an nei anih phawt chuan an tan harsatna engmah a awm loh thu a sawi ani.

(Andrew Vanlalauva, PTC, Kolasib)

<><><>

RELIEF

Nimin khan Chief Minister’s Relief Fund thawh lina chu COVID-19 hrileng dona kal zelah inkharkhip vanga chhuanchham chhungkuate hnenah Aizawl bawrhsap in a sem chhunzawm.

Puan tawh angin Aizawl Municipal Corporation (AMC) huam chhunga cheng chhungkaw 9,750 hnenah tanpuina sum hi cheng sangkhat zanga zela sem a ni a.Mi inphal ten thahnemngai takin khawsak harsate tanpuina turin Chief Minister's Relief Fund-ah sum an chhung lut zel a. CMRF sem dan ngaihtuahtu Committee chuan a sem dan tur rang takin a ngaihtuah zung zung a. Khawtlai awm lovin bawrhsap tinte hnenah sum hi pek chhuah nghal zel a ni. Aizawl bawrhsap chuan CMRF atanga sum lo kal te hi LLTF kaltlangin a semdarh zel a. Nimin Pathianniah pawh chawlh awm lovin CMRF atanga sum lo kal te hi a sem chhunzawm zel a. Sum dawn chin hi nimin lamah sem zawh hman beisei a ni.

(DIPR)

<><><>

COVID CASES IN SEVERAL STATES

Ram chhung hmun hrang hranga Covid-19 dinhmun a inthlau hle.

Nimin khan Manipur-a sample 5600 endikah hrikai 832 hmuhchhuah a ni a, mi 10-in an thihpui bawk. Enkawl dam zat chu za-a 87.94 a ni.

Nagaland-ah chuan nimin khan Covid-19 hrikai 73 hmuhchhuah a ni a, hmuhchhuah zatin sing 2 sang 7 leh 940 a tling chiah a ni. Nagaland-ah hian Covid-19 thihpui mi 556 an awm tawh a ni.

West Bengal-ah pawh darkar 24 kalta chhung khan hrikai 769 hmuhchhuah a ni a. Hri kai enkawl dam chu nuaih 15 dawn an ni tawh a. Za-a 98.09 enkawl dam an ni.

Kerala-ah chuan nimin ringawt khan hrikai sing 2 leh 728 hmuhchhuah a ni a. Endik zat atanga hmuhchhuah hi za-a 12.14 a ni a. Nimin khan mi 56-in an thihpui a, mi sing 1 sang 6 leh 837-in an thihpui tawh a ni.

Delhi khawpui-ah chuan nimin khan hrikai 85 hmuhchhuah a ni a, mi 83 enkawl dam an ni a. Tuna Delhi-a hrikai mek awm zat chu 582 an ni.

(NewsOnAIR)

<><><>

NATIONAL RECOVERY RATE OF COVID-19 STANDS AT 97.36%

India rama Covid-19 hrikai enkawl dam zat chu za-a 97.36 a ni mek a. Hri laka dam chhuak tawh mi Vbch 3 leh nuaih 8 chuang an awm tawh.

Ram pum huapa Covid-19 hridanna lak beihpui thlak mekah dose Vbch 47 leh nuaih 2 chuang pek a ni tawh a. Darkar 24 kalta chhung khan dose nuaih 60 chuang pek a nih thu Health Ministry chuan a sawi a, hemi hun chhung hian hrikai enkawl dam sing 3 sang 9 chuang an awm a ni.

Darkar 24 kalta chhung khan hrikai sing 4 sang 1 leh 831 hmuhchhuah a ni a. Tuna ram chhunga hrikai enkawl mek zat chu nuaih 4 leh sing 1 chuang an ni a, hrikai tawh zat atanga chhuta za-a 1.30 a ni. Chawhruala India rama tuna hrikai hmuhchhuah zat hi endik atanga za-a 2.34 a ni.

(NewsOnAIR)

<><><>

P V SINDHU CREATES HISTORY BY BECOMING FIRST INDIAN WOMAN TO BAG MEDAL IN TWO OLYMPICS

India nula PV Sindhu chu India hmeichhe zinga Olympic tum 2-a medal la ve ve thei awm chhun a la ni.

Tokyo-a Olympic khelh mekah nimin khan PV Sindhu hian Badminton Women’s Singles-ah a khingpui China nula He Bingjiao chu 21-13, 21-15-a hnehin Bronze medal a la a. Kum 2016 Rio Olympic-ah khan Silver medal a lo la tawh bawk a ni.

Nimin vek khan India mipa hockey team-te chuan an khingpui Great Britain chu 3-1-a hnehin semifinals-ah an inhlang kai a, Semi finals-ah hian Belgium nen an intum dawn a ni.

(NewsOnAIR)

<><><>