RADIO
*ALL INDIA RADO AIZAWL*
*REGIONAL NEWS UNIT*
*REGIONAL NEWS BULLETIN*
*HEADLINES (MORNING) - 24.7.2021*
1. Vawiin thlenga hman tur Aizawl Municipal Corporation huamchhunga total lockdown a kalpui mek chu tun thla ni 31 thleng a pawtsei.
2. Mizoram sorkar chuan Mizoram leh Assam ramri buai ngaihtuahtu tur Boundary a din.
3. Ram chhungah Covid-19 hrileng kiam hleihtheih lohna hmun engngemaw zat a la awm a.
4. Rampum huapa beihpui thlak mekah Covid-19 hridanna dose Vbch 42 leh nuai 34 chuang pek a ni tawh.
<><><>
COVID ADVISORY
Sawrkar laipuiin a thlawna kum 18 chin chunglam Covid-19 hridanna a pek mekah ngaithlatute hridanna la vek turin kan ngen che u a. Covid-19 laka invenna lamah lo inthladah lo ula. Inah tawm tlat ula, tul tawpah lo chuan lo pawnchhuak suh ang che u.
Hmai tuamna vuah, midang hnaih loh, kut leh hmai tihfai leh hridanna lakte ngaipawimawh ang che u.
Covid-19 kaihhnawiha hriat duh nei chuan rampum huap helpline number - 011 2397 8046 leh 1075 bakah, Mizoram tan 1070 leh 102 te hi biak pawh theih reng a ni e.
(NewsOnAIR)
<><><>
LOCKDOWN EXTENDED
Mizoram Sawrkar chuan Aizawl Municipal Corporation huamchhunga total lockdown a kalpui mek chu tun thla ni 31 thleng a pawtsei.
Mizoram sorkar thuchhuahin a tarlan danin lockdown pawhsei chu COVID-19 hri darh chak lutuk tur venna tur leh Health Department-in mass testing an kalpui chhunzawm zel theihna tura tih a ni a. Total lockdown pawhseiah hian July ni 16-a lockdown inkaihhruaina tihchhuah tawh chu tidanglam loin hman zui a ni dawn a ni.
Champhai district-ah chuan Bawrhsap Pi Maria CT Zuali chuan hrileng dinhmunin ziaawm lam a pan theih loh avangin tunthla ni 31 zanlai thleng inkhuahkhirhna thupek kallai chu a ngai anga chhunzawm a nih tur thu a puang bawk.
(DIPR)
<><><>
HEALTH MINISTER met with dist authoritites
Health Minister Dr. R. Lalthangliana hovin Dist hrang hrang DC leh Chief Medical officer te nimin khan internet kaltlangin an inkawm a, COVID hrileng kara an dinhmun te an sawiho a ni.
Meetingah hian Lunglei district tih loh district dangahte chuan total lockdown kalpui a nih loh thu DC ten an sawi a, an district dinhmun an thlirin mipuiten sawrkarin inkaihhruaina dan a siamte an zawm tha a, harsatna lian tham an la tawh loh avang leh hri inkaichhawnna an la thunun thei nia an hriat avangin COVID Appropriate Behaviour zawm chungin fimkhur takin dawrte pawh hunbi tuka an hawn thu an sawi a, VLTF leh Executive duty ten uluk taka hma an lak reng thu an sawi bawk a. Boruak awmdan azirin rang taka Containment an puan thin thu sawiin district 6 ah chuan Containment Zone puan mekna a awm lo a ni.
Lunglei district ah erawh chuan tunhnai kar hnih chhung khan COVID-19 hri kai thar an pun nasat avangin hri inkaichhawnna chhut chah a nih theihnan khauh taka total lockdown kalpui a nih thu tarlan a ni a, thingtlang khua 2 telin Containment Zone hmun 11 ah puan mek a ni.
Nimin thutkhawmah hian District tinah sample test chungchangah harsatna an neih loh thu tarlan a ni a. Lunglei district ah chuan Dawn khuaah mass testing neih a ni a, district dangah chuan sample test ngai chu harsatna awm lova an la in test theih thu tarlan a ni. CCC leh CCCC chungchangah harsatna tawk an la awm lova, vaccine pekchhuah pawh tluang taka kalpui vek niin hmun thenkhatah erawh chuan chhan hrang hrang vanga vaccine la ngam lo an awm tih sawi a ni.
Health Minister chuan district tin ten COVID-19 dona kawnga hma an lak danah lawmawm a ti a, vaccine pek chhuah kawngah theihtawp chhuaha chhunzawm zel turin a chah a, a tul dan azira sample test bei ngawrh turin a chah a, sample test kit (RAgT) chungchangah harsatna awm loh thu sawiin an mamawh ang zat te rawn la thuai thuai zel turin a chah bawk a ni. COVID-19 third wave lo thleng thei laka inbuatsaih tura in hriattirna an chhuah tawh anga District tinah naupangte enkawlna tur ruahmanna siam turin a chah bawk a, PM Cares hnuaiah district tinah oxygen plant dah tum a nih thu sawiin, Mizoram sawrkarin cheng vaibelchhe 6 vel a sen ve a ngaih tur thu a sawi a ni.
(DIPR)
<><><>
BOUNDARY COMMITTEE
Mizoram sorkar chuan Mizoram leh Assam ramri buai ngaihtuahtu tur Boundary Committee - Deputy CM Pu Tawnluia kaihhruaina hnuaiah a din.
Hemi chungchanga hriattiirna hi ningani khan he committee-a member secretary tur Mizoram Home Secretary Pi Lalbiaksangi'n a tichhuak a. Hriattirnain a tarlan danin, Vice Chairman chu Home Minister Lalchamliana niin, Member Secretary chu Home Secretary a ni a.
Member te chu; Minister of State pathum, Pu K Lalrinliana, Pu Lalruatkima, Pu TJ Lalnuntluanga te bakah Chief Secretary, Addl Chief Secretary, Mizoram Police DGP, Pu CL Ruala, Pu Lalbiakzama, recognized political party atangin mi pakhat theuh, NGO Coordination Committee, CYMA, MUP, MHIP, MZP leh MSU aiawh pakhat theuh leh Joint Action Committee on Inner Line Reserved Forest Demand aiawh pakhat te an ni a.
Chairman-in tul a tih chuan midang a sawm belh thei dawn bawk a ni.
(Corr)
<><><>
CHIEF MINISTER LEH SPORTS MINISTER-IN TOKYO OLYMPICS GAMES HAWNNA VIRTUAL-IN AN HMANPUI
Nimin tlai dar 4:30 khan khawvel nghahfak Tokyo Olympics Games ‘20 chu ropui takin Japan khawpui Tokyo ah hawn a ni ta. India pawhin record siamin infiammi 127 a tir a.
Mizo nula chhuanvawr Lalremsiami pawh India Women Hockey Team Striker niin a telve a. Remsiami hi Mizo hmeichhe zinga Olympic khel thei hmasaber niin Youth Olympics leh Asian Games ah Silver Medal India tan alo hawn tawh a ni.
Mizoram Chief Minister Pu Zoramthanga pawhin Olympics Opening Ceremony hi lo zawm vein Mizo hockey star Lalremsiami leh India Team te hi a zinna Shillong atangin a lo tan ve a, duhsakna sangber a hlan a ni.
Mizoramah chuan total lockdown avangin hmunkhatah a punkhawm theih lova,Sports Minister Pu Robert Romawia Royte pawhin ama chenna inah enin India Team an lo support a. Nula Lalremsiami Official Jersey leh Indian Olympics Team Official T.Shirt te hain an lo au phur ve a ni.
Sports Minister Pu Robert Romawia Royte chuan Nl.LalRemsiami leh Team India duhsakna a hlan a, Mizo mipui zawng zawngte Remsiami leh India Team tan turin a sawm bakah tawngtaipui turin a ngen bawk a ni.
Pu TC Pachhunga Ex-MLA leh Vice Chairman, SYATICT Board leh Sports Deptt hotu dangte pawhin Lalremsiami leh India Team tanin an lo telpui ve bawk a ni.
(Desk)
<><><>
SERCHHIP AGRI DEPT
Nimin khan District Agriculture Office Serchhip hmalaknain Thenzawl a Obing zau rama Sub Mission on Agroforestry (NMSA) Small Nursery atangin Zawngtah thiak 9050 sem chhuah a ni a, semchhuah inkhawm hi FOCUS hnuaia Serchhip District Project Manager Pu K. Laltlanmawian kaihruaiin loneitute hnenah a thlawna thlai tiak sem leh chumi hmanga an sum lakluh tihpun hi Sub Mission on Agroforestry in a tum bulpui ber a nih thu a sawi.
Zawngtah tiak te hi Thenzawl ah 4900, Kanghmun South ah 1710, Neihloh ah 890 leh Zote South ah 1550, a vaiin tiak 9050 chu chhungkaw 223 hnenah sem chhuah a ni a. Khaw tina FIG ten a tul angin an lo buaipui zui dawn a ni.
(Serchhip PTC C Lalhminghlua)
<><><>
MANN KI BAAT
Prime Minister NarendraModi-a chuan Pathianni dar 11-ah hian AIR-ah Mann Ki Baat programme kaltlangin mipuite hnenah thuchah a sawi leh dawn a. Tun tum hi Mann Ki Baat hun a hman vawi 79-na tur a ni a. Mizotawnga lehlinin a chhunzawm ang a, zan dar 8-ah tihchhuah nawn leh a ni ang.
<><><>
COVID CASES IN MANIPUR, MEGHALAYA & KERALA
Ram chhungah Covid-19 hrileng kiam hleihtheih lohna hmun engngemaw zat a la awm a.
Darkar 24 kalta chhung khan Manipur-ah sample 6,836 endik a ni a, Covid-19 hrikai 1,284 hmuhchhuah a ni.
Hemi hun chhung vek hian mi 15-in Covid-19 an thihpui a, thi zinga 2 hi Covid-19 hridanna dose hmasa la tawh an ni. Manipur-a he hri thihpui tawh zat chu 1,451 an ni ta a ni.
Manipur-ah hian hrikai sing 9 leh 262 hmuhchhuah tawh a ni a, an zinga sing 7 sang 8 leh 872 chu enkawl dam leh tawh an ni a. Enkawl lai mek 9,939 an awm bawk. Manipur-ah hian mi nuai 11 chuangin hridanna an la tawh a ni.
Meghalaya-ah pawh darkar 24 kalta chhung khan hrikai 558 hmuhchhuah a ni a, mi 21-in an thihpui a. Enkawl lai 4,539 an nei mek bawk. Meghalaya-ah hian hridanna la nuai 9 leh sing 6 chuang an awm tawh a ni.
Kerala-ah pawh Covid-19 hrikai an la pung zel a, nimin khan hrikai sing 1 sang 7 leh 518 hmuhchhuah a ni a. Test atanga hrikai zat hi za zela 13.63 an ni.
Kerala-ah hian nimin khan mi 132-in Covid-19 an thihpui a, a zavaia hripui vanga thi chu sing 1 sang 5 leh 871 an ni tawh a. Tuna hrikai enkawl mek chu nuai 1 sing 3 sang 5 leh 198 an ni.
(NewsOnAIR)
<><><>
OVER 42.34 CRORE DOSES OF COVID VACCINE ADMINISTERED IN THE COUNTRY SO FAR
Rampum huapa beihpui thlak mekah Covid-19 hridanna dose Vbch 42 leh nuai 34 chuang pek a ni tawh.
Health Ministry sawi danin, darkar 24 kalta chhung khan dose nuai 54 sing 7 sang 6 chuang pek hman a ni.
Darkar 24 kalta chhung vek khan Covid-19 damlo sing 3 sang 8 leh 740 enkawl dam an ni a. Hemi chhung hian hrikai sing 3 sang 5 leh 342 hmuhchhuah a ni bawk. Ram chhunga hrikai enkawl dam tawh zawng zawng chu Vbch 3 leh nuai 4 chuang an ni tawh a. Hrikai enkawl dam zat hi za-a 97.36 a ni tawh a ni.
(NewsOnAIR)
<><><>