RADIO
Rt Chhakchhuak:
*ALL INDIA RADIO AIZAWL*
*REGIONAL NEWS UNIT*
REGIONAL NEWS BULLETIN
HEADLINES (EVENING) - 6.7.2021
1. Mizoram Governor atan Dr Hari Babu Kambhampati ruat thar a ni.
2. Vawiin MHIP Day vawi 47-na pualin MHIP Branch hrang hrang ten mite tanpuina Ni atan an hmang.
3. Vairengte-ah ASF vaning vawk pakhat a thi a, Vawk pul hri African Swine Fever (ASF) chuan Mizoram Dist zawng zawng a tuamchhuak ta.
4. Ramchhungah COVID-19 vei enkawl dam zatin hma sawn zelin zaa 97.17 a kai tawh.
<><><>
COVID ADVISORY
Sawrkar laipuiin a thlawna kum 18 chin chunglam Covid-19 hridanna a pek mekah ngaithlatute hridanna la vek turin kan ngen che u a. Covid-19 laka invenna lamah lo inthladah lo ula. Inah tawm tlat ula, tul tawpah lo chuan lo pawnchhuak suh ang che u.
Hmai tuamna vuah, midang hnaih loh, kut leh hmai tihfai leh hridanna lakte ngaipawimawh ang che u.
Covid-19 kaihhnawiha hriat duh nei chuan rampum huap helpline number - 011 2397 8046 leh 1075 bakah, Mizoram tan 102 te hi biak pawh theih reng a ni e.
(NewsOnAIR)
<><><>
NEW GOVERNOR
Mizoram Governor atan Dr Hari Babu Kambhampati a ruat thar a ni a.
Governor har chungchang hi President Ram Nath Kovind chuan thuchhuah siamin India rama state 4 - Mizoram, Tripura, Haryana leh Himachal Pradesh a Governor te a sawn a.
Mizoram state Governor ni mek Pu PS Shreedharan Pillai chu Goa Governor a ni dawn a, a dang state 3 Tripura, Haryana leh Himachal Pradesh a Governor ni lai theuh te pawh state dangah Governor an ni leh vek dawn a ni.
Vawina thuchhuah in a tarlan ang chuan State 4 Madhya Pradesh, Himachal Pradesh, Mizoram leh Karnataka ah te Governor thar dah an ni a, Mizoram Governor tur Dr Hari Babu Kambhampati chu Mizoram Governor 28-na ani dawn a ni.
Dr Hari Babu Kambhampati hi Andhra Pradesh state mi leh sa ni in Vishakapatnam atangin Lok Sabha member ah thlan tlin a lo ni tawh a, Andhra Pradesh ah BJP President te lo ni tawh in tun hi Governor anih vawi 1na tur a ni.
(CORR)
<><><>
GOVERNORS
Sorkar laipuia Union Minister nilai Thawarchand Gehlot chu Karnataka Governor atan President-in a ruat. BJP hruaitu Mangubhai Chhaganbhai Patel chu Madhya Pradesh Governor atan ruat a ni a. BJP hruaitutho Rajendra Vishwanath Arlekar chu Himachal Pradesh governor atan ruat a ni bawk a. Goa Governor atan Mizoram Governor nilai P.S Shreedharan Pillai ruat a nia. Haryana Governor nilai Satyadev Narayan Arya chu Tripura Governor atan ruat niin Tripura Governor nilai Ramesh Bais chu Jharkhand Governor atan dah a ni thung a. Himachal Pradesh Governor Bandaru Dattatraya chu Haryana Governor turin dah a ni bawk.
(Newsonair)
<><><>
MHIP DAY
Vawiin hi Mizo Hmeichhe Insuihkhawm Pawl MHIP Day vawi 47-na a ni a, hripui leng mek avangin kuminah kum dang angin hman theih ni lo mahse, MHIP Branch hrang hrang te chuan mite tanpuina Ni atan an hmang.
MHIP President Pi Lalthlamuani chuan MHIP member te chu ‘Mite Tanpui’ an din chhan anih angin midang te tanpuina kawngah ke pen zel turin a chah a, MHIP member tin te mahni awmna hmun theuhah midang tana malsawmna ni vek turin leh hrileng do na atana thawktu sawrkar leh a kut ke hrang hrang te tawngtai pui vek turin a chah a ni.
MHIP Day pual hian MHIP General Headquarters chuan thla hmasaa Thuampui leimin avanga vanduai na tawk chhungkua Pu Lalbiakzuala te tanpui na pawisa fai an hlan a.
Sub Headquarters hrang hrang te leh Branch hrang hrang ten Covid – 19 hrivei te enkawl na a tan 4C ah te pawisa fai pein LLTF leh VLTF duty te pawisa fai an hlan bawk a, Tuipuiral Group MHIP chuan Myanmar raltlan te pualin in tinah thawmhnaw leh vehbur te khawnin raltlan te an tanpui bawk a ni.
Lunglei ah chuan MHIP Sub.Hqtrs hnuaiah branch hrang hrang ten an remchan dan ang a hmangin hemi pual hian damlo te sum leh pai a tanpui an awm nual.
Kolasib ah chuan Kolasib Sub-Hqrs MHIP hruaitute chuan MHIP Day pualin pawisa fai leh thilpek Sethawn a Jordan CCC ah leh TNT, Khuangpuilam ah te an hlan a,
Lawngtlai ah pawh MHIP Day pual hian Lawngtlai Sub Hqrs chuan DLTF Chairman Lawngtlai DC Dr Andrew H.Vanlaldika hnenah cheng sing khat an hlan a, MHIP Kawngchaw West Branch chuan Chawhmeh thahnem tak leh cheng sing khat DLTF kutah an hlan bawk.
Siaha ah chuan Sub Hqrs.hnuaia Branch hrang te chuan mahni Branch chhungah leh hmun hrang hrangah ten damlo te kanin ṭhenkhatin home ah te ṭanpuina an hlan a, Branch thenkhatin khawsak harsate an ṭanpui a ni.
Mamit ah chuan Sub Hqrs OB ten Mamit District Hospital a khualkhua atanga damlo awm, thi te khuh nan puan 20 an pe a, Covid 19 test TrueNat leh RAgT buaipuitute leh Mamit khawpui chhunga covid 19 positive enkawlna Covid 19 Care centre hmun hnih a thawktute tan eitur an pe bawk.
Vawiin MHIP day pual hian MHIP Mamit Sub Headquarter huam chhunga branch tam zawk chuan tanpui ngaite tanpui nan leh thilpek nan hun an hmanga, hlo thlawhpui ngaite hlo thlawhpuiin, thingtuah neilote thing an phurhsak bakah Covid 19 vanga home quarantine te tan chawhmeh an pe bawk a ni.
MHIP. hi.July ni 6, 1974-a din ani a, Tun dinhmunah Sub Headquarters10 a awm a, Block 26 a awmin Joint 17 an an nei a, MHIP Branch hrang hrang 732 a awm bawk a ni.
(CORR + PTC’s)
<><><>
COVID DEATH
COVID19 hrileng avangin Mizoram chu thla hnih chuang a inkharkhip hnu-ah pawh hripui avangin mi an thih belh zel a, niminah Covid-19 avangin mi 3 an thih laiin kar kalta khan Covid-19 avangin mi 4 an thi a, Mizoram chhunga thi zat hi 98 an tling tawh.
Nimin chawhnu khan Pi Ngurliantluangi (kum 72), Aizawl Armed Veng ami chu ZMC ah Covid-19 vangin a thi a, Nimin zing lamah Pi Shanda Prova Chakma (kum 57 mi) Kamalanagar – III ami chu ZMC panpui anih laiin Lungrang S ah a thi a, nimin vek khan Pu T Lalzamlova (kum 66 mi) Electric Veng chu thi leh in Inrinni khan Pu C.Zoparliana (kum 68 mi), Vairengte chu Covid-19 vangin a thi a, Ningani khan Pu Salvation-a (kum 73 mi) Saihapui K chu a thi leh a ni. Nilaini khan Pi Lalchhanhimi (kum 31 mi) Vairengte- a cheng chu a thi a, Thawhtanni khan Pi Lalthangmawii (kum 41 mi) Electric veng chu a thi bawk a ni. Heti hian Mizoram pawna Mizo thi 33-te nen Covid-19 hri leng avang hian mi 131 in nunna an chan tawh a ni.
(CORR)
<><><>
JAC ON INNERLINE RESERVE MEETING
Jt Action Committee on Innerline Reserve, Political Party te leh NGO hruaitute vawiina Aizawl MZP Pisa-a inhmukhawm chuan Mizoram leh Mizo hnam a lo dam a, a lo him theih nan Mizoram Sawrkar hian a rang thei ang berin Schedule Cast and Schedule Tribe (prevention of Attrocities Act) hi a enkawltu tur leh Dan lekkawhtu tur Officer ruat thuai rawh se an ti a.
Mizoram leh Assam Ramri hnaih ah Police Force tam zawk awmna tur hmunpui a rangthei ang berin siam ni rawh se an ti a, India Sawrkar Home Ministry kaihhruaina hnuaia Assam leh Mizoram inrina chungchanga a khawi lam v eve mah che rih lo tura tihna, Assamin vawi tamtak a bawhchhia chu thutlukna awmsa an zahloh naah an ngai tih an sawi a, Mizoram Chief Secretary leh Assam Chief Secretary te an inbiakna turah Mizoram chief Secretary in All political parties leh All NGOs te joint Memorandum pel a thil engmah ti lo turin an ngen tih an sawi a ni.
(PR)
<><><>
ASF- 9859 PIGS DIED
Vawk pul hri African Swine Fever (ASF) chuan Mizoram Dist zawng zawng a tuamchhuak ta a,
Hun rei tak chhung Mizoram hmun hrang hrangah ASF hi a leng a, hetih chhung hian Kolasib District a khawih ve lova amaherawhchu he hri avang hian Vairengte ah vawk 1 a thih tak avangin Mizoram District ah ASF len lohna a awm tawhlo a ni.
Vawiin khan ASF vawk pulhri avang hian vawk 280 a thih belh leh a, hei nen hian ASF vawk pulhri avanga Mizorama vawk thi zat chu 9,859 a tling ta.
AH and Vety department hotute sawi danin March thla laihawl aţanga leng ţan vawk pulhri hi hmun tam takah a reh chho ţan tawh a, a len hmasakna khaw tam takah chuan vawk thi a awm tawh lo a ni. Chutih laiin hmun hrang hrangah a ţaidarh tawh a, Vawin hian Mamit District a Lengte ah vawk 78 a thi a, Lengpui ah vawk 32 thi bawkin Serchhip District-a Thenzawl khua ah vawk 25 thi in Chhiahtlang atangin vawk 14 a thi bawk a ni.
Vawiin vek khan Aizawl District ah Lawipu vengah leh Falkawn ah te vawk 19 ve ve a thi a, Muallungthu ah vawk 8 thi in Hlimen ah leh Aibawk ah te vawk 7 ve ve a thi a, Phunchawng ah vawk 6 thi in zemabawk vengah vawk 5 a thi bawk a ni.
Hetih lai hian ASF vawk pulhri ni a rinhlelh, mahse la finfiah loh avangin vawiin khan vawk 90 a thih belh a, vawk pulhri finfiah loh ASF ni a rinhlelh vanga vawk thi zat hi a vaiin 604 a ni.
ASF hi khua leh veng 162 ah a leng mek a,vawin ah ASF avanga vawk suat 15 awmin ASF avanga vawk suat tawh zawng zawng zat hi vawk 1191 a ni.
(CORR)
<><><>
CADC-MDC’S DEMAND RESIGNATION OF CEM
Chakma Autonomous District Council, CEM Pu Durja Dhan Chakma chu rorel lai MNF MDC 9 te chuan CEM a nihna atanga bang turin an nawr a.
CEM bang tura an tihna lehkha ah hian a MDC pui ten an thlawp tawh lo a, banna a thehluh mai chu MNF party tana tha zawk tura ni an ti a, he lehkhaa hming ziaktu zingah CADC hruaitu lo ni tawh thin, Pu Rashik Mohan Chakma leh Pu Bhudha Lila Chakma te pawh an tel a ni.
Chakma Autonomous District Council ah hian kumin March ni 29 khan Chief Executive Member Pu Rashik Mohan Chakma chuan CEM atanga banna a thehlut a, hemi tum hian CEM atanga bang ta chuan Lawngtlai a AIR CORR Lalngheta Ralte zawhna chhangin, MNF Party ah hruaitu insiamrem a tul vanga bang a nih thu leh lungawilohna vanga bang a nihloh thu a sawi a, April ni 6 khan Pu Durja Dhan Chakma chu CADC CEM atan lakluh niin, MDC Seat 20 awmna CADC ah hian rorellai MNF 18 leh BJP 2 an awm mek a, rorel lai MNF MDC 9 te chuan nimin khan CEM Pu Durja Dhan Chakma chu CEM a nihna a tangin inhnukdawk turin an ti ta a ni.
Nimin vek khan CEM Pu Durja Dhan Chakma chuan Executive Committee thuchhuak angin Adviser to CEM, Pu Buddha Lila Chakma leh Adviser to Planning & Development Committee, Pu Ajoy Kumar Chakma chu an nihna dinhmun atangin a paih bawk a ni.
(Lalngheta Ralte PTC Lawngtlai)
<><><>
COVID
Ramchhungah COVID-19 enkawl dam zatin hma sawn zelin zaa 97.17 a kai tawh a. Darkar 24 kalta chhung khan hri kai thar sing 3 sang li leh 703 hmuhchhuah a ni a, hei hi ni 111 hnua nikhata hmuhchhuah tlember tum a ni a. Hrivei enkawl mek pawh tlahniam zelin nuai li sing 6 sang li leh 357 an awm mek a. Heipawh hi ni 101 hnua a tlember lai a ni a. Hri kai hmuhchhuah tawh atangin zaa 1.52 chauh hrivei enkawl mek an awm tawh a ni.
Darkar 24 kalta chhung khan hrivei enkawl dam hi sing 5 sang khat leh 864 an awm a. Tihian hrivei enkawl dam tawh hi vaibelchhe 2 leh nuai 97 sing nga sang 2 chuang an awm tawh a. Hetihlai hian darkar 24 kalta chhungin hri avangin mi 553 an thi a ni.
Rampumah COVID vaccine dose vaibelchhe 35 leh nuai 75 chuang pek tawh a ni a. Darkar 24 kalta chhungin dose nuai 45 sing riat leh sang hnih chuang pek hman a ni.
(Newsonair)
<><><>