RADIO

ALL INDIA RADIO AIZAWL

REGIONAL NEWS UNIT

REGIONAL NEWS BULLETIN

HEADLINES (EVENING) - 1.6.2021

1. Chief Minister Pu Zoramthanga chuan twitter kaltlangin Mizorama vaccine la la lo te lak tur pe turin Prime Minister Narendra Modi a ngen.

2. Mizorama COVID19 enkawlna bik ZMC ah tun dinhmunah an enkawl zawh tawk damlo an kawl mek tih ZMC Covid-19 Task Force Nodal Officer Dr PC Lalramengan a sawi.

3. Ramchhungah darkar 24 kalta chhungin COVID-19 hri kai nuai 1 sing 2 sang 7 leh 510 hmuhchhuah a ni a. Ni 54 hnua hmuhchhuah tlem ber tum a ni.

4. Defence Minister Rajnath Singh-a chuan vawiin khan Australian Defence Minister Peter Dutton chu telphone hmangin a kawm.

<><><>

COVID ADVISORY

Ramchhung hmun hrang hrangah COVID-19 hri kai thar an awm belh zel avangin chanchinthar lo ngaithlatute hri laka lo fimkhur zel turin kan ngen che u a. Vaccine dose khatna la tawhte chu a hun takah dose hnihna lo la turin kan ngen che u a. Hei bakah hian hmai tuamna vuah, midang nena inhlata awm leh kut leh hmuihmai silfaite lo ngai pawimawh zel turin kan nge a che u.Tunah chuan chanchinthar ilo ngaihthlak chhunzawm ang u.

<><><>

CM

Chief Minister Pu Zoramthanga chuan Prime Minister Narendra Modi hnena twitter kaltlanga ngenna siamin Central India lamah hrilengin kian lam pan mahse NE state hrang hrangah ala darh nasa hle a ti a. Kum 18-44 inkar vaccine pek kawngah pawh harsatna an tawk tih sawiin Prime Minister hnenah Mizoram chhunga vaccine la hmanlo ten Vaccine an lak theih nan Central sawrkar chu vaccine leisak turin a ngen.

Pu Zoramthanga chuan Mizoram chu special category an nih angin Central Sawrkar kaltlanga vaccine a thlawna pe turin a ngen a, North East a Chief Minister theuh te pawh vaccine a thlawna dawng thei tura hma la theuh turin a sawm bawk a ni.

(DIPR)

<><><>

COVID CASE

ZMC Covid-19 Task Force Nodal Officer Dr PC Lalramenga chuan COVID19 enkawlna bik ZMC ah tun dinhmunah an enkawl zawh tawk damlo an kawl mek a, case a pun erawh chuan harsatna a awm thei a ni a ti.

Kan corr in a kawmnaah Dr PC Lalramenga chuan tuna ZMC dinhmun sawiin khum 246 awm zingah khum 28 a ruak a, ICU ah 37 enkawl mek anni a, 37 zinga mi 20 chu Ventilator hmanga enkawl mek an ni. Hetihlai hian, damdawiina admit zaa70 in oxygen an mamawh a ni.

Damlo zingah oxygen mamawh an tam tih sawiin Ward hrang hranga damlo ICU awm kher nilo pawhin oxygen mamawh an tam a, tunah hian Damlo na zual oxygen mamawh te chauh leh mamawh thei dinhmuna ding chauh te an admit thin tih sawiin damlo an neih te Covid negative an la nih kher loh pawhin oxygen mamawh tawhlo leh mamawh hnai lo chu CCC ah leh 4C ah te an sawn chhuak thin tih a sawi bawk.

Dr PC Lalramenga chuan ZMC damlo Covid-19 vei enkawl nana damdawi an hman ber chu Remdesevir anih thu a sawi a, Heparin damdawi pawh damlo chuap a thisen khang a awmloh nan an hmang a, tun hnaia Remdesevir sawisel ni mahse Mizoram ah chuan Remdesevir aia tha ala awm loh thu a sawi bawk.

Dr PC Lalramenga chuan ZMC ah hian hrileng thawh khatnaah kum upa lam admit an tam laiin tun a thawh hnihna ah kum 30 atanga kum 50 inkar bawr an tam ber tih a sawi a. Covid-19 3rd wave chu October emaw November velah a awm leh beisei anih avangin ZMC lamah pawh 3rd wave lo thleng tur atan inbuatsaihna a kalpui zel tih a sawi bawk.

Tuna hrileng thawh hnihna hi a hlauhawm bik tia sawi chungchang chhangin, a hlauhawm bik loh thu leh inkai chhawn erawh a awlsam bik thu a sawi a, chuvangin hri vei pawh an pung chak a, fimkhur a ngai hle a ni a ti.

(CORR)

<><><>

COVID STATS

State Spokesperson on COVID-19 Dr Pachuau Lalmalsawma chuan, Chik taka bih chianin tun dinhmunah tual chhunga positive–te atanga inkaichhawnna hi Mizorama COVID-19 tihluartu a ni a; a chhan bulpui ber pawh mipui lamah vanduai bikte awm theih bawk mahse nunphung leh chetzia a pawlawh leh ngaihsam avang a ni berin a lang, a ti.

Dr Pachuau Lalmalsawma hian Mizorama COVID19 dinhmun tarlangin, COVID-19 hrileng thawh khatna- March, 2020 atanga March, 2021 chhungin positive 6131 hmuhchhuah niin mi 11 in an thihpui a, a thawh hnihna April leh May thla chhungin positive 7923 hmuhchhuah an ni a, thihpui mi 30 an awm a ni.

May thla chhunga hri kai hmuh chhuah zat hi 6268 a ni a. Thla khat chhung ringawta hri kai hmuhchhuah hi a hma thla 12 kalta chhunga hmuhchhuah zat 6131 aiin 137 in a thahnem zawk a, he dinhmun hi a manganthak ru viau a ni a ti a, Covid-19 second wave a heti taka a hrik kai leh thi an tam ta hi lu haina tham tak meuh a ni tih sawiin mipui an fimkhur hle a ngai a ni a ti a, Lockdown lai a ni emaw, ni lo emaw, dawr hmun leh punkhawm theihna hmun sa leh chawhmeh dang leh mamawh leinaah tih tak zeta fimkhur a tul ngawih ngawih a

Mahni inchhung khurah pawh uar leh zuala fimkhur a tul bakah Colony a ni emaw, compound khat a ni emaw, thenawm intlawhpawh loh hun, vak cheh deuhten nasa taka midang kan kai theihna hun a nih hriain mi dang tlawh pawh loh tur a ni a.

Zuk leh hmuam leh chawhmeh insuah thlengin insum a ngai ang. Thil inban tawm leh mi khawih hnu khawih atang te, khuh leh tawng per te atanga COVID-19 hi awlsam taka kai theih a nih avangin heng lakah hian fihlim hram tur a ni.

h Dawr hmunah pawh thil lei turah bur chatin lei tur ni lem lote chu mi dang lo khawih hnu a nih theih avangin khawih lawr chiam loh tur a ni.

Mithiamte zir chhuah danin ZUK LEH HMUAM hian ka leh thawkna dawt mai bakah chuap thlenga a khawih chhiat thin avangin enkawl buaithlak khawpa na taka awm theih a nih avangin tun hun tha hi simna hun atan hman hlauh nise

Vaccine la tawh te pawhin midang, chhung leh khat, then leh rualte an la kai theih fo avangin a hrik kai lo tura fimkhurna kalpui tur a ni a ti.

(DIPR)

<><><>

ASF

Vawk pul hri hlauhawm African Swine Fever (ASF) leng mekah vawiin khan vawk leh vawkte 76 a thih belh leh a, heti hian ASF vanga Mizorama vawk thi zawng zawng chu 4,917 a tling tawh a ni.

AH and Vety department thupuangtu Dr Lalhmingthanga hnen atanga thudawn danin Aizawl district-ah Zemabawk Vengah vawiin hian vawk thi a tam ber a, vawk 15 thi-in Zemabawk vengah hian vawk 101 a thi tawh a. Aizawl district-ah Salem Vengah leh Bethlehem Vengthlang ah vawk thi tam berin vawk 144 ve ve thi an awm tawh a, vawiin khan Khawzawl ah vawk 15 an thi bawk a ni.

ASF hri lenna hmun tam takah hri avanga vawk thih belh a awm tawh lova, a lenna hmasa ber Lungsen khuaah chuan vawk 756 zet thi tawh mahse May ni 20 atang khan vawk pakhatmah a thih belh tawh lo a ni.

(CORR)

<><><>

COVID AID

AH&Vety Minister Dr.K.Beichhua chuan Tipi Ferry, Riasikah, Amotlah leh Thiahra khuaa VLTF duty te a tlawhin tanpuina a pe a.

Dr.K.Beichhua chuan heng khuaah te hian Covid-19 lockdown avanga chhungkaw harsatna tawkte chhawmdawlna tur sumfai Rs.10,000/- theuh a MLA Fund atangin a hlan a. Sumfai bakah hian Minister hian Buhfai ip engemawzat leh damdawi te a sem bawk.

Minister chuan Covid-19 avanga harsatna leh chhuanchham a bial chhunga an awm a phal dawn lo tih a sawi a, a ei chhung chu a bial mipuiten an ei tur thu sawiin a bial mipuite chu thlaphang lo tur leh sorkar thu awiha fimkhur taka awm tur leh intodelh tur pawha taihmak chhuah theuh turin a chah bawk.

Hetihlai hian Serchhip Officers Club chuan vawiin khan Serchhipa VLTF duty te kal chilhin tanpuina cheng 3000 theuh an pe a. Hetih lai hian Malsawm HOUSE, Home Appliances, Multibrand Show Room, Aizawl chuan malsawmna an dawn atangin Hrangturzo bial chhunga chhungkaw 590 (AAY family) tan June/July/August thla 3 chhung Ration Buhfai an khul sak dawn a, he Covid 19 hripui avanga mi harsa ten harsatna kan tawh ang zelin la khul chhoh sak zel an tum a ni.

Serchhipah hian mi inphal ten VLTF te bakah chhungkaw harsa te leh COVID-19 hri vei enkawl mek te tanpuina pek an intihhmuh hle tih Serchhipa kan corr chuan a sawi a ni.

Nimin khan, Agriculture Minister Pu C.Lalrinsanga chuan Lungleia Covid Care Centre pathumah tanpuina pein MNF Sub Hqrs Lunglei hruaituten an hlan.

MNF Sub Hqrs President Pu H.Thangrenga leh a thawhpui te hian Covid Care Centre Zobawk, Mizoram Polytechnic, Hrangchalkawn leh CCC SIRD Pukpui te tlawhin, tanpuina pawisate hi Covid 19 hri vei enkawlnan cheng 6000 theuhin an pe a ni.

(PTC’s)

<><><>

COVID

Ramchhungah darkar 24 kalta chhungin COVID-19 hri kai nuai 1 sing 2 sang 7 leh 510 hmuhchhuah a ni a. Ni 54 hnua hmuhchhuah tlem ber tum a ni. Hri kai hmuhchhuah atanga hri vei mek hi zaa 6.73 a ni a. Sorkar laipui sawidanin damlo nuai 18 chu damdawiinah leh in lamah enkawl an awm a. Ni 43 hnuah hri vei enkawl mek chu nuai 20 hnuai lamah a tlahniam a. Nitina hri kai hmuhchhuah zat positivity rate chu zaa 6.62 a ni a. Ni 8 chhung a zawnin zaa 10 hnuaiah a awm tawh a ni.

Hri vei enkawl dam pawh nitin an pung zel a, a zawna ni 19 chhung chu hri vei hmuhchhuah aiin enkawl dam an tam zawk a. Darkar 24 kalta chhungin hri kai nuai 2 sing 5 leh sang 5 enkawl dam an awm a. Hri vei enkawl dam hi zaa 92.09 a kai tawh a ni.

Union Health Ministry chuan hri vei vaibelchhe 2 leh nuai 59 chuang enkawl dam an awm tawh a ti a. Darkar 24 kalta chhungin COVID-19 avanga thi 2798 an awm a. Ti hian hri avanga thi hi nuai 3 sing 3 sang 1 leh 895 an awm tawh a ni.

(Newsonair)

<><><>

RAJNATH SINGH SPEAKS TO HIS AUSTRALIAN COUNTERPART PETER DUTTON

Defence Minister Rajnath Singh-a chuan vawiin khan Australian Defence Minister Peter Dutton nen telephone hmangin an inbia a. Hruaitu pahnih hian COVID-19 hrileng an do dana hmalakna awm thei te an sawi dun a. Pu Singh-a chuan India leh Australia-te chuan inzawmna tha tak an neih thu a sawi a. Tuna India-in COVID-19 a dona kawnga Australia sipaite puihnaah lawmthu a sawi a. Pu Singha chuan Australia nen thawhdunna mumal tak an neih mek chu nghet takin ala zawm zel a ni a ti a. Ram pahnihte hian a hma thei ang berin Ministerial 22 Dialogue an buatsaih thuai tur thu a sawi bawk a ni.

(Newsonair)

<><><>

HELPLINE

Sorkar laipui chuan COVID-19 hrileng mekah mipuiten harsatna leh puih an ngaih huna engtik lai pawha biak theihna tur helpline a siama. National Helpline-ah hian a duh apiang tan heng number- 011- 23978046 emaw 1075-ah te hian a biak theih a. Mizoram chhung bikah chuan 102 a biak theih a ni.

(Newsonair)

<><><>