RADIO
*ALL INDIA RADIO AIZAWL*
*REGIONAL NEWS UNIT*
REGIONAL NEWS BULLETIN
HEADLINES (EVENING) - 11.5.2021
1. Serchhip Assembly bial bye-election a thlan tlin, Pu Lalduhoma chu vawiin khan MLA atan a lak luh a ni.
2. Speaker Pu Lalrinliana Sailo chuan Pu Lalduhoma lakluh hun sawn anih chhan chu COVID19 inkhuahkhirhna siam anih vang a ni a ti.
3. Darkar 24 kalta chhungin COVID-19 hri vei enkawl dam nuai 3 sing 5 leh sang ruk chuang an awm
4. Tukin khan Jammu and Kashmir-ah sipaiten firfiak pathum an kaphlum.
<><><>
MLA SWORN IN
Serchhip Assembly bial bye-election a thlan tlin, Pu Lalduhoma chu vawiin khan Assembly Speaker Pu Lalrinliana Sailo chuan rinawmna thu tiam tirin MLA atan a la lut.
Lakluh inkhawm hi Assembly Conference Hall, Assembly Annexe Building-ah neih niin, Assembly Secy Pu H. Lalrinawman a kaihruai a, he hunah hian Home Minister Pu Lalchamliana, School Education Minister Pu Lalchhandama Ralte bakah MLA-te Dr. ZR Thiamsanga, Pu Zodintluanga Ralte, Pu KT Rokhaw, Pu Lalrindika Ralte, Dr. BD Chakma, Pu Vanlalhlana, Dr. Vanlalthlana leh Pu Lalchhuanthanga te an tel a ni.
Pu Lalduhoma lakluh a nih takah hian Mizoram Legislative Assembly-ah rorel lai MNF Party in MLA 27 a nei a, Congress Party in MLA 5, BJP in MLA 1, ZPM in MLA 1 an nei a, Independent MLA 6 an awm a ni.
Pu Lalduhoma hian kan corr zawhna chhangin Independent MLA te nena an thawho dan tur chu an hruaitute nen kan la sawiho dawn tih a sawi a, Legislature party chu duh duh zawm theihin, a thawhho theih a, la sawiho leh tur a ni ang a ti.
(Audio)
Pu Lalduhoma chuan, bye-election awm chhan leh, inpuhmawhna zawng zawngte theihnghilh vek tawh ni se a tih thu a sawi a, tawngkam inbah sual palh emaw sawisual palh emaw avanga rilru na an awm a nih pawhin inngaidam a, intheihnghilh sak turin mi tinte a ngen tih a sawi a, lungrual tak leh inngeih tlang taka mipui rawng bawlho turin inbuatsaih theuh turin mi tinte a chah a ni.
(Audio)
Vawiin khan ZPM party hruaitute leh ZPM Legislature Party member-te te chu thukhawm nghalin, Pu Lalduhoma MLA-a lakluh a nih leh tak avangin, ZPM Legislature Party-ah awmho leh dan tur an sawiho nghal niin an party thuchhuah chuan a sawi a ni.
(CORR)
<><><>
ASSEMBLY SPEAKER PRESS CONF
Mizoram Legislative Assembly Speaker Pu Lalrinliana Sailo chuan Pu Lalduhoma lakluh hun sawn chungchanga thudik tawklo thehdarh ani chu pawi atih thu a sawi a, Pu Lalduhoma chu thlantlin anih hnu khan a rang thei ang bera MLA atana lakluh turin ruahmanna siam a ni a ti.
Pu Lalduhoma lakluh anih hma khan Speaker Pu Lalrinliana Sailo chuan Assembly House Annexe ah thuthar thehdarhtute kawmin, Serchhip Constituency MLA atana thlantlin tak, ZPM candidate Pu Lalduhoma lakluh mai anih loh chungchang a sawifiah a, Speaker chuan May ni 3 khan Pu Lalduhoma nena an inbiak thu sawiin, May ni 5 a lakluh tum ani a, amaherawhchu, Covid hripui hluarzel avanga Sorkar in inkhuahkhirhna a siam chu zahawm an tih avangin Pu Lalduhoma lakluh hun sawn hlat a ni a ti.
Pu Lalrinliana chuan hetia lakluh hun sawnhlat anih lai hian, social media lama, Pu Lalduhoma nena inngamtlak taka an inbiakna thu chu a nilo zawnga thehdarh a ni chu pawi a tih thu a sawi a. Speaker chuan nikum November ni 27 a Mizoram Legislative Assembly atanga ban anih pawh khan Chief Minister Pu Zoramthanga'n MLA candidate ni leh thei ngei tura sawm tura a chah thu a sawi bawk.
Speaker Pu Lalrinliana chuan kumin March ni 15, Mizoram Assembly Budget Session neih zawha, House pawna Law Minister Pu TJ Lalnuntluanga leh MLA Pu C. Ngunlianchunga te inkara inhmuh thiamlohna thlen chungchanga CCTV footage nawhreh ani tih anga thang chu thu diklo ani tih sawiin, chanchinthar thehdarhtute kalkhawm hnenah pawh March ni 15 tlaia thilthleng chu a entir a ni. Speaker chuan social media lama chanchin dik tawklo thehdarh anih thin chu pawi a tih thu a sawi bawk.
(CORR)
<><><>
ASF
Vawk pul hri African Swine Fever chu a hluar chho zel a,
Vawiin khan Champhai DC hnen atanga thu dawn danin Vawk lian tawh tak tak 14 an thi a, Champhai District Rapid Response Team on ASF, A.H& Vety Department, Champhai District chuan report an dawn bawhzuiin Zokhawthar khuaa Vawk thite an endik a. Rapid Antigen Test hmangin endik a nih hnuah African Swine Fever a ni tih an hmuchhuak a.
Chhinchhiah danin Ni 3 kalta chhung khan Zokhawthar khuaah hian Vawk 25 an thi tling tawh a. Vawk thite hi sawngbawl dan tura inkaihhruaina siam anga phum bo nghal vek an ni.
AH& Vety Dept atanga thudawn danin vawiin khan Aizawl, Lunglei, Serchhip, Mamit, Khawzawl, Hnahthial leh Lawngtlai district-ah te ASF vangin vawk 86 an thi a. Heti hian Mizoram puma ASF vanga vawk thi chhinchhiah zat chu 2942 an tling tawh a ni.
Hetihlai hian vawiin khan Aizawl, Lunglei, Champhai, Serchhip, Khawzawl, Saitual, Kolasib, Mamit, Hnahthial leh Lawngtlaiah te vawk an thih chhan finfiah theihlo 67 thi an awm a ni.
Vawk natna hri, African Swine Fever darh zel venna turin Mizoram Sorkar chuan Aizawl district chhunga veng 11, Lunglei district a veng 6, Serchhip district a veng 5, Mamit district chhunga Zawlnuam khua, Hnahthial leh Khawzawl khuate chu ASF Infected zone ah a puan belh an ni.
(Champhai PTC Lalhlupuia/CORR)
<><><>
LUNGLEI
PHE Deptt Lunglei ten Lunglei Town area bâkah Vanhne leh Thuampui Tuikhur tui an enfiah naah hrik awmna tuikhur engemawzah an hmu a, hênga bacteria awm hi bacteria hlauhawm a nih leh nih loh hriat a ni lo nain hêng tuikhur tuite hi chhuan so hnua hman tlâk vek an ni an ti.
Tuikhur test zat hi a vaiin 103 niin Bacteria awmna tuikhur 27 an hmu a ni.
Hetihlai hian PHE Deptt lam chuan internet kaltlanga tui Bill pek uar turin mipui te an ngen a, Tui bill counter pawh an khar rih a ni.
(Lunglei PTC Thanghmingliana)
<><><>
COVID19
Serchhip-ah vawiin khan COVID19 hri kai 18 hmuhchhuah a ni a,
Vawiin tlai dar 5:00 thleng report a lan danin Serchhip chanmari vengah ringawt covid 19 postive hi mi 18 an tling a, RagT test a la kal mek zel a ni a, Chanmari venga hetia a pun hluai chhan hi hriat a ni lova, a kai veng thler khat, Volleyball court chhak a mi te an ni hlawm niin kan corr chuan a sawi.
Heti hian Serchhip Dist positive hriat theih chin chu 150 an tling a ni.
(PTC Serchhip Lalhminghlua)
<><><>
COVID ADVISORY
Ramchhung hmun hrang hrangah COVID-19 hri kai thar an awm belh zel avangin chanchinthar lo ngaithlatute hri laka lo fimkhur turin kan ngen che u a. Vaccine lak theih hunah kum 18 chunglamte chuang hreh lovin lo la vek ula. Hei bakah hian hmai tuamna vuah, midang nena inhlata awm leh kut silfaite lo ngai pawimawh zel turin kan nge a che u.
<><><>
COVID-19:
Darkar 24 kalta chhungin COVID-19 hri vei enkawl dam nuai 3 sing 5 leh sang ruk chuang an awm a. Union Health Minsitry chuan tunhnaia nikhata enkawl dam zat nuai thum chuang a nih chhoh tak char char avangin hri vei enkawl dam chak dan pawh sang chho hretin zaa 82.75-ah a kai a ti a. Ti hian hri vei enkawl dam tawh zawng zawng hi vaibelchhe khat leh nuai 80 chuang an awm tawh a. Hri vei mek nuai 37 sing khat leh sang nga vel awmin hei hi za zela chhutin 16.15 a ni.
Hetihlai hian darkar 24 kalta chhungin hri kai nuai thum sing hnih leh sang kaw chuang hmuhchhuah a ni a. Hri vei sang thum 876 in an thihpui leh a. Ti hian hri avanga thi hi mi nuai 2 sing li leh sang 9 an tling tawh a
(Newsonair)
<><><>
COVID VACCINE
Ramchhungah COVID-19 vaccine dose vaibelchhe 17 leh nuai 27 chaung pek a ni tawh. Union Health Ministry sawidanin darkar 24 kalta chhungin dose nuai 25 chaung pek hman a ni a. Vaccine pek thawh thumna kalpui mekah vaccine la duh mi tam tak an awm a. Kum 18-44 inkarah ringawt vaccine dawng tawh hi nuai 25 sing 5 leh sang 9 an awm tawh a. Heng zinga nuai 5 sing 2 leh sang 4 vel hian darkar 4 kalta khan vaccine hi an la a ni. Hetihlai hian kum 45 chunglam vaccine la tawh hi vaibelchhe 13 leh nuai 31 chuang an awm tawh a ni.
(Newsonair)
<><><>
TERRORIST KILLED
Tukin khan Jammu and Kashmir-ah sipaiten firfiak pathum an kaphlum. Thudawn danin Kashmir chhim lam, Anantnag district huamchhunga awm Kokernag biala Vailoo khuaah firfiakte leh sipaite hi an inkap a. Helai hmunah hian firfiak an awm tih thu an dawn bawhzuiin police leh sipai tangkawpte chuan firfiak dapchhuah beihpui an thlak a. Firfiakte awmna an va thlen hian an inkap zui ta a ni. Sipaite hian firfiak pathum an kaphlum a. Tute nge an nih erawh la tihchian loh a ni.
(Newsonair)
<><><>