RADIO

*ALL INDIA RADIO AIZAWL*

*REGIONAL NEWS UNIT*

REGIONAL NEWS BULLETIN

HEADLINES (EVENING) - 26.2.201

1. Chief Minister Pu Zoramthanga’n hnam martar leh rammute tan ‘Special Scheme’ siam tum a ni a, a ngaihtuah turin Rehabilitation & Resettlesment Board din a ni a ti.

2. Thla thar March ni 1atangin college leh zirna in sang zawk te sorkarin hawn a rel.

3. Election Commission chuan vawiin khan state pangaa Assembly inthlan neih hun tur a puang

4. Prime Minister Narendra Modi-a chuan COVID-19 hripui len laia damdawi lam thiamte hnathawh chu fakawm atih thu a sawi.

<><><>

ASSEMBLY SESSION 4TH DAY QS

Assembly Budget Session kal mek ni 4-na vawiinah General Administration Deptt. changtu Chief Minister Pu Zoramthanga’n hnam martar leh rammute tan ‘Special Scheme’ siam tumna a awm thu leh a ngaihtuah turin Rehabilitation & Resettlement Board din a nih thu House a hrilh.

Zawhna leh chhan hunah zawhna hrang hrang chhangin Chief Minister chuan MNF Election Manifesto 2018-a hnam pasaltha leh martar chhungte tan special scheme siam tum a nih thu tarlan angin hma lak mek a ni, a ti a. Special cheme chu tum hnih - Special scheme for peace accord MNF returnees leh Special package for recruitment of peace accord MNF returnees (PAMRA members/family, 2018) te siam a ni tawh a; Spcecial scheme for peace accord MNF returnees chu kalpui a ni tawh a, sorkar hnaah mi engemawzat dah luh an ni tawh a, Special package for recruitment of peace accord MNF returnees (PAMRA members/family, 2018) hnuaiah mi 13 sorkar hnaa dah luh an ni tawh a ti a.

Kum 1986-a MNF lo kirte kha hmaih awm lovin Maumual-ah in hmun pek vek an ni tawh a. Chhawmdawlna chu Pu Laldenga atanga sipai naupang ber thlenga inang khat veka an dawn thu Chief Minister Pu Zoramthanga chuan a sawi a ni.

Vawiin Assembly Session-ah hian zawhna leh chhanna hun hman hn uah Pu Lawmawma Tochhawng Private Resolution – “Thalaite mamawh infiamna (sports) lama sorkarin nasa taka hma a lak mekna hi a lawmawm kan ti a, chak taka hmalak chhunzawm zel ni se, kan ti” tih chu member ten an sawiho hnuah an pawm a ni.

(Corr)

<><><>

ASSEMBLY - STATEMENT

Vawiin Assembly Budget Session-ah Forest Minister Pu TJ Lalnuntluanga’n Kepran khuaa Kohhran Upa Zamawia kum 87, kangmei thelhna lama nunna chan ta chungchang sawiin hun a hmang a.

Minister sawi dan chuan - Upa Zamawia hi East Phaileng leh Kepran khaw inkara Kepran YMA park bula a huana a awm laiin nimin tlai lam dar 3:30 vel khan an huan chuanhnuai lama kangmei chhuak thelhtute zawmin a pui ve a, Kangmei an thelh mih hnu tlai dar 4 velah Upa Zamawia ruang hi an hmu a ni.

Kangmei chhuak a thelhna lama nunna chan ta Upa Zamawia chhungte hnenah Darlawn Forest div. atangin ralna Rs. 5,000 pek nghal a nih thu Forest minister chuan a sawi a. Upa Zamawia chhungte hnena zangnadawmna pek theih dan tur pawh Mizoram state fire prevention committee-in a ngaihtuah tur thu a sawi.

Forest minister Pu TJ Lalnuntluanga chuan Upa Zamawia chu vawiin chawhma dar 11 khan Kepran Presbyterian Kohhran Biak In-ah vui a nih thu leh Forest deptt-a fronline staff te pawhin uniform nen an thlahliam thu a sawi bawk.

(Corr)

<><><>

LS MP

Vawiin khan Lok Sabha Speaker Pu Om Birla hova mipui rorelna leh Panchayati Raj kalphung chungchang sawihona, State Convention Centre, Shillong-a neih ah Mizoram Lok Sabha MP Pu C.Lalrosanga a tel a, District Council te leh tualchhung pawl hrang hrangte thuneihna sang zawk leh sum tam zawka thuam an tul thu a sawi a. Hemi atana Lok Sabha Speaker hma lak dan chu lawmawm a tih thu a sawi.

Pu Lalrosanga hian nimin khan Shillong a Food Corporation of India (FCI) Regional Office tlawhin FCI hotute nen Mizoram sawrkar laka Hill State Transport Subsidy la pek lohte pek theih dan tur an sawi hova.

Pu Lalrosanga hian nimin piah khan Assam Rifles DG, Lt.General Sukhdeep Sangwan pawh tlawhin Myanmar ramri leh Aizawl khawpui atanga AR insawnchhuah chungchang te a sawipui a. Aizawl atanga Assam Rifles sawn chhuah chungchangah Assam Rifles DG chuan hemi atan hian hma thar lak mek a ni a. Hna la zawh loh leh enfel ngai thenkhat enfel mek a ni tih MP chu a lo hrilh a. Ramri hrula Assam Rifles hnathawh dan leh Myanmar atanga bungraw tawlhluh ruk chungchang te an sawi dun a. Assam Rifles DG chuan danin a phut angin AR sipaite chuan ramri atanga Km 16 bial chhungah bungraw tawlhluh rukte an dap thin a, ralthuam pawh thahnem tak an man tawh a ni a ti.

Pu Lalrosanga hian Central Govt Health Scheme hmarchhak bial hotute kawmin Mizoram leh hmarchhak bial state danga CGHS hnuaia private hospital hman theih, empanel dan turte an sawi ho va. Hmarchhak bialtu CGHS Addl. Director Dr.Bora leh senior Doctor te chuan central sawrkar hnuaia hnathawk mekte leh pension tawhte hriselna enkawlna kawng tha leh awlsam zawk siamna tura hmalak dan tur MP chu an lo sawipui a ni.

(DIPR)

<><><>

COLLEGES TO START

Thla thar March ni 1atangin college leh zirna in sang zawk te sorkarin hawn a rel.

Vawiin khan Health & Family Welfare Minister Dr. R. Lalthangliana, Higher & Technical Education changtu ni bawk hovin Assembly Annexe Committee Room ah college hawn chungchang meeting neih a ni a,

Health Minister Dr. R. Lalthangliana chuan College leh zirna in sang zawk te hawng leh tura ruahman hi a taka kalpui a nih dawn avangin hemi changchanga inkaihhruiana dan SOP te uluk leh fimkhur taka inthlahdah miah lova zawm a pawimawhin a tul hle dawn a ni, a ti a.

Meeting chuan Mizoram pumah college leh zirna in sang zawk hrang hrang – University te, NIT, College of Veterinary Sciences leh adangte chu March ni 1 Thawhtan ni atangin hawn leh nise tiin an rel a. Meeting chuan heng zirna inah canteen leh hmun danga punkhawmna ang chi te chu uluk leh fimkhur taka enzui turin zirna inah thuneitute chu an chah bawk a. Heng zirna inah te hian college thuneituten thermal screening an kalpui a tul dawn a, ruahmana hi Health Department te nen inbe rawn a an siam a ngai dawn a ni.

(DIPR)

<><><>

KOLASIB – KAWNPUI TO HORTOKI ROAD

Kawnpui Sub-Division PWD ten Action Plan (2020-2021) atanga Cheng Nuai 34 an hmuh hmanga an thawh Kawnpui leh Hortoki inkar kawng km 1.590 chu tun kar Nilaini khan zawh fel a ni a,

National Highway Division-V Sr. EE, Pu Lalthan Zuala chuan sorkarin Hortoki leh a chhehvel khua a ngaih pawimawh thu sawiin, Meidum leh Hortoki inkar kawng laih mek a ni, a ti a. Dept. chhunga hna peng hrang thawktute chu an hnathawh te inhriatpui leh a hmunhmate an inhmuhpui hian hmasawnna a thlen thin, tiin kawngpui siam hna thawhna hmun thenkhatah lirthei tlan ten harsatna a thlen thin avangin lirthei tlan vel harsatna su kiang turin VC leh YMA te thawhpui thiam a pawimawh a ni, a ti bawk.

Kawnpui leh Hortoki inkar kawng hi KM 18-a thui a ni a; Kawnpui atanga KM 12 chin chu Railways enkawl tura dah a ni a, a bak KM 6 chu Kawnpui Sub-Division PWD-in an enkawl a; PWD hian a chhe zual lai an siam zo thawkhat tawh a, Railways enkawl chinah erawh kawng chhe lai a tam hle tih Kolasib-a kan corr. chuan a sawi.

(Kolasib PTC Andrew Vanlalauva)

<><><>

SERCHHIP – YMA VISITS MAT BRIDGE

Thenzawl leh Serchhip inkara Mat Lei dawh mek chu Serchhip Sub-Hqrs YMA hruaitute’n vawiin khan an tlawh a, hnathawh dan an enfiah.

Serchhip Sub-Hqrs YMA-in thuchhuah siama an tarlan dan chuan Vigilance Comt.-in Mat lei an tlawh hi Sub Hqrs Office Bearer-ten hovin, lei dawhna hmunah company lam chu an lei dawh mek chungchang zawtfiahin that akin an titiho a. Vigilance Committee hian lei dawhtu Tantia Company chu Serchhip leh Thenzawl inkara kawngpui tihnawk thei khawpa lei tla awm nual chu an ngaimawh thu hrilihin thianfai turin an ngen a, fur ruahtui tlak hma ngeia kawngpui sir tuihawk luankawr hai fai turin an ngen bawk.

Thenzawl leh Serchhip inkara Lei dawh mek hi meter 63 a sei, meter 7 leh a chanvea zau, lirthei 2 inpelh theihna tur a ni a. Steel structure hman a ni a, a Lei chhuat hi RCC, 220mm-a chhaha chhun tur a ni a, kumin April thlaah zawh hman tum a ni a. Tantia company hian an siam zawh hnuah kum 1 chhung an vil zui ang.

He lei dawh nan hian Asian Development Bank atangin Cheng vaibelchhe 14 leh Nuai 92 ruahman a ni a. A dawhtu engineer-te chuan an lei dawh hi Mizorama Lei khawng tha ber a nih thu an sawi.

(Serchhip PTC C. Lalhminghlua)

<><><>

PM MANN KI BAAT

Prime Minister Narendra Modi-a chuan tun Pathianni chawhma dar 11 khian AIR-ah Mann Ki Baat programme kaltlangin mipuite hnenah thu a sawi leh dawn a. Mizo tawnga lehlinin a chhunzawm ang a.Zan dar 8 ah tihchhuah nawn leh a ni ang. Tun tum hi Mann Ki Baat tihchhuah vawi 74-na tur a ni ang.

(Newsonair)

<><><>

ELECTION

Election Commission chuan vawiin khan state pangaa Assembly inthlan neih hun tur a puang. Inthlang tur state zingah Assam chu thawh thuma neih tur niiin March ni 27, April ni 1 leh ni 6-ah neih a ni ang a. Tamil Nadu, Kerala leh Puducherry UT te chu thawh khatah zawh vek tur niin April ni 6 ah inthlan a ni ang a.Hemi ni vek hian tamil Nadu-a Kanyakumari Lok Sabha leh Kerala-a Malappuram Lok Sabha by-election neih a ni ang.

West Bengal-ah chuan inthlan hi thawh riatin neih a ni ang a, March ni 27 atanga April ni 29 chhungin inthlanna neih a ni ang. Heng inthlana vote tla te hi May ni 2 ah chhiar a ni ang. Heng inthlanna tur state-ah te hian vote vaibelchhe 18 leh nuai 68 chuang a awm a. Polling station nuai 2 leh sing sarih awmin Assembly seat 824 a awm a ni.

(Newsonair)

<><><>

PM

Prime Minister Narendra Modi-a chuan COVID-19 hripui len laia damdawi lam thiamte hnathawh chu fakawm atih thu a sawi. Vawiina Tamil Nadu-a Dr. MGR Medical University Convocation vawi 33-na a hmanpuinaah he thu hi sawiin Pu Modi-a chuan India rama hriselna lama inenkawlna chu dinhmun sang tak, zahawm leh rintlak tak a chuang kai a ti a. Tuna medical graduate tharte pawh he beiseina ang hi nunpui pha turin a chah a. Khawvelin vawiina zirlai chhuak tharteah beiseina sang tak a nei a, he mawhphurhna hi an koah an lak thiam a ngai a ni a ti bawk.

Pu Modi-a chuan COVID-19 chu thil beisei loh lutuk anih thu sawiin he natna hrik hi engtia lo hmachhawn tur nge tih rinlawkna pawh a awm lo a ti a. Hetiang karah hian India chuan kawng thar siamin midang pawh chu kawngah chuan a hruai a ni a ti a. Ramchhunga hripui avanga thi zat chu khawvelah a hniam ber pawl anih thu leh enkawl dam pawh a tam ber pawl a ni a ti a. Hei bakah hian khawvel tan COVID damdawi a siamchhuak bawk a ni a ti.

Governor leh University Chancellor Banwarilal Purohit leh Vice Chancellor Sudha Seshaiyyan te pawh he hunah hian an tel a.

(Newsonair)

<><><>