Президентнинг Олмазор туманига ташрифи кутилмоқда

Ўзбекистон Республикаси Президенти Шавкат Мирзиёев яқин кунларда Тошкент шаҳрининг Олмазор туманига ташриф буюриши кутилмоқда. Бу ҳақда “Qalampir.uz” интернет нашрининг ишончи манбаси хабар берган.

Ҳозирда туманнинг Чуқурсой даҳаси, одамлар тилида “Татарский поворот” ҳудудида ободонлаштириш ишлари олиб борилмоқда.

Давлат раҳбарининг ташрифи арафасида Чуқурсой атрофидаги йўлларга асфальт ётқизилаётгани тасвирланган суратлар таҳририятимизга етиб келган. Ушбу ҳудуддаги пана-пасқам уйлар, иморатлар бузилиб янги бинолар қад ростламоқда.

Бугун туман ҳокими Бахтиёр Раҳмонов бир неча кунлик анъанага кўра, кунлик ишини ушбу ҳудудни кўздан кечиришшдан бошлаган. Ҳудудга туманнинг барча расмийлари, жумладан, ИИБ, Солиқ инспектори, Прокуратура, ДСЭНМ ходимлари жалб этилган.

Ёшлар иттифоқи фаоллари қурилиш ва ободонлаштириш ишларида тер тўкяпти. Qalampir.uz манбаси етказган маълумотга қараганда, узоқ йиллар эътиборда четда қолган ва Олмазор туманининг энг кўримсиз нуқтаси бўлган ушбу ҳудуд “Обод маҳалла” дастури доирасида Президент ташрифига тайёрланмоқда.

Бизга етиб келган видеоматериалда ҳоким Бахтиёр Раҳмонов бу ерда фаолият олиб бораётган ходимларга бугун кечгача муҳлат бериб, ҳудудни қурилиш материал ва чиқиндилардан буткул тозалашни буюргани акс этган.

Президентнинг Олмазор туманига ташрифи қайси кунга белгилангани ҳозирча номаълум. Маълумот учун, Шавкат Мирзиёев Олмазор туманига сўнгги марта баҳор ойларида ташриф буюрганди.