Йўлинг равон бўлса, манзилинг яқин бўлади

Давлатимиз раҳбарининг 2022 йил 25 октябрдаги “2022-2023 йилларда маҳаллалар инфратузилмасини янада яхшилаш бўйича қўшимча чора-тадбирлар тўғрисида”ги қарори жойларда зарур инфратузилмани барпо этиш, маҳалла аҳолиси учун зарур шарт-шароитни яратишда муҳим дастур бўлмоқда. Жумладан, вилоятда йўл тармоғини тартибга солиш, бу борада аҳолининг талаб ва мурожаатларидан келиб чиқиб таъмирга муҳтож маҳалла ва қишлоқ йўлларини равон қилишда юқоридаги қарор долзарб аҳамият касб этмоқда.

Кейинги йилларда ички йўлларга цемент-бетон қоришмаси ётқизишга эътибор ошди. Мутахассислар фикрича, цемент-бетон қопламали йўл чидамли ва сифатли бўлиб, асфалт бостириш моддий қийматига нисбатан камхарж ҳисобланади. Ҳам цемент-бетон йўл хизмат кўрсатиш муддати кўп йиллик ҳисобланади. Шу боис, маҳаллий хом ашёлардан фойдаланилаётганлиги сабабли, таннархи анча арзон бўлган цемент-бетон йўл қуриш тажрибаси вилоятда оммалаштирилмоқда.

Буни яқинда Ромитан тумани “Миришкор” МФЙ ички йўлларининг 2,4 километр қисмига цемент-бетон қоплама ётқизилгани мисолида кўриш мумкин. “Ромитан Сарбон йўл қурилиш” МЧЖ уста қурувчилари томонидан махсус техника ва механизмлар ёрдамида Қуйи Пайшанбе қишлоғи ички йўлининг 2 километрдан ортиқ қисмига цемент-бетон қоплама ётқизилгани ҳолда 3,1 километр йўл асфальтлаштирилгани аҳолини хурсанд қилди. Кўркам қиёфага кирган кўчага тунги ёритиш тармоғи барпо қилиниб, электр энергияси таъминотини яхшилаш мақсадида қўшимча трансформатор ҳам ўрнатилгани айни муддао бўлди.   

Ҳозирда вилоят марказидан бошлаб барча туманларда ишчи гуруҳлари ўрганишлари натижаси ўлароқ, чекка қишлоқ йўлларигача таъмирлаш, цемент-бетон қоришмасини ётқизиш ёки асфальтлаштириш юзасидан манзилли дастурлар ишлаб чиқилган. Жумладан, Бухоро тумани “Истиқбол” МФЙ даги Сангисабз, Қушхона, Бўламахўрон, Талигандум, Хитоён қишлоқлари ички йўллари ҳам кўп йилдирки, таъмирталаб аҳволдалиги боис аҳоли эътирозларига сабаб бўлиб келаётганди. Ниҳоят, ҳудуддаги ўрганишлардан сўнг 5 километрдан зиёд ички йўлни рисоладагидек кўринишга келтириш, йўл асосини тайёрлашдан тортиб, цемент-бетон ётқизиш ва асфальтлаштиришгача бўлган жараён ишлаб чиқилди. Ишда пудратчи туман йўллардан фойдаланиш унитар корхонаси ҳамда “POMEGRANATE BUILDING” масъулияти чекланган жамияти томонидан кенг кўламли саъй-ҳаракат олиб борилиб, ҳудудда белгиланган йўл қуриш лойиҳаси деярли тўла-тўкис уддаланмоқда.  

Худди шундай, Жондор тумани “Ромиш” МФЙ нинг Оқработ ва Ромиш қишлоқларида 1,7 километр ички йўл, шунингдек, “Кўлиён” МФЙ даги қишлоқлар оралаб 4,3 километр  ички йўлни асфальтлаштириш ва бир қисмига цемент-бетон ётқизиш ишлари жадаллаштирилди. Бунда туман йўллардан фойдаланиш унитар корхонасининг элликдан ортиқ ишчи-мутахассиси ва зарур техника ва механизмлар кучидан фойдаланилмоқда.

Бундан ташқари, шу кунларда Жондор тумани “Ойдин” МФЙ дан ўтувчи “4Р-72” русумли, “Далмун-Қизбиби-Чортут” йўналишидаги автомобил йўлининг 2 километр қисмида ҳам асфальтлаштириш ишлари олиб борилмоқда. Бу лойиҳада пудратчи сиқатида Ромитан тумани йўллардан фойдаланиш унитар корхонаси жамоаси жонбозлик кўрсатмоқда. Айни пайтда махсус техника, асфальт ётқизиш агрегати, пресслаш катоги, яна ўнга яқин самосвалга эга йигирма чоғли ишчи-мутахассис манзилдаги ишларни якунига етказишмоқда.

Вилоят ҳокимлиги матбуот хизмати