Пиротехника- инсон ҳаётига хавфдир!

Янги йил байрамини нишонлаш арафасида Мамлакатимизнинг турли жойларида тақиқланган пиротехника воситаларидан ноқонуний фойдаланиш ҳолатлари ҳамон давом этаётгани кузатилмоқда. Айниқса, ўта қизиқувчан бўлган ёшларимиз турли даражадаги жарохат олаётганларини кўришимиз мумкин. Жумладан, Тошкент вилоятида 18 ёшли йигит пиротехника портлаши оқибатида жиддий жароҳат олгани, у Тошкент шаҳрига олиб келиниб, қўли жарроҳлик амалиётидан ўтказилгани, унинг қўли операция қилингани ҳақида маълумот берилди.

Шунингдек, пиротехника воситаси портлаши натижасида юз ва қўллари учинчи даражали куйиш жароҳати олган 10 ёшли, сирдарёлик Комилжон ётқизилганлиги тўғрисида хабар берилган эди.

Россиянинг Подмосковя вилояти Клинск шаҳар округида яшовчи эркак петарда портлаши оқибатида ҳалок бўлди. Бу ҳақда «Москва» агентлиги хабар берган.

Жиззах вилояти божхона бошқармаси томонидан олиб борилган тезкор тадбир натижасида пиротехника воситаларини сотиш билан шуғулланган шахс қўлга олинган ва унинг автоуловидан ҳеч қандай ҳужжатлари бўлмаган жами 20 400 дона пиротехника воситалари борлиги аниқланган.

Сурхондарё вилояти божхона бошқармаси томонидан ўтказилган тезкор тадбирда пиротехника воситаларини яширинча сотмоқчи бўлган фуқаро қўлга олиниб, унда 15 119 дона пиротехника воситалари мавжудлиги аниқланган. Ўтказилган тезкор тадбир давомида жами 26 626 дона пиротехника воситалари ашёвий далил сифатида олинган.

P.S. Мазкур ҳолатлар фақат икки вилоятдагина аниқланган ҳолат ҳисобланади. Қанчадан қанча ноқонуний йўллар билан кириб келаётган пиротехника воситалари фарзандларимиз соғлигига зарар еткизмаслиги учун хушёр бўлайлик ва ҳар қандай ҳолатларни олдини олишга муросасиз бўлайлик!