NEWS

Украина ташқи ишлар вазири Дмитрий Кулеба Ироқнинг Москва билан музокараларда воситачилик қилиш таклифини рад этди.

Бағдодга ташрифи чоғида у Россия бутун Украина ҳудудидан қўшинларини олиб чиқмагунча, Киев тинчлик музокараларида қатнашиш ниятида эмаслигини яна бир бор таъкидлади.

Кулебанинг таъкидлашича, Украина «Ироққа кўприк қура оладиган давлат сифатида қараса-да, (...) Россия ҳужум қилмоқда (...) ва айнан шу тинчликка энг катта тўсиқ».

Ироқ ташқи ишлар вазири Фуад Ҳусайннинг сўзларига кўра, Бағдод «ўртасида кескинлик ҳукм сураётган давлатлар билан муомала қилиш тажрибасига эга» ва «тинчлик хизматида бўлишга тайёр».

«Урушнинг давом этиши нафақат икки давлат, балки бутун дунё учун хавфли бўлади», - дея унинг Дмитрий Кулеба билан қўшма матбуот анжуманидаги сўзларини келтиради AP.

Бразилия президенти Луиз Инасио Лула да Силва Хитой ва Бирлашган Араб Амирликлари (БАА) билан Россиянинг Украинага қарши агрессив урушида тинчликка воситачилик қилишни истайди. Лула да Силва ушбу ташаббусни Хитой ва БАА раҳбарияти билан муҳокама қилганини айтди. Бразилия раҳбари 16 апрель куни инаугурациядан кейинги илк ташрифини Абу-Дабига амалга оширди.

Луланинг таъкидлашича, у Хитой раҳбари Си Жинпинг ва БАА президенти Шайх Муҳаммад бин Зоид Ол Наҳаён билан воситачилик гуруҳини тузиш ҳақида гаплашган. Уни G20'га ўхшатиш орқали шакллантириш мумкин, деб ҳисоблайди Бразилия етакчиси.

«G-20 инқирозга учраган глобал иқтисодиётни сақлаб қолиш учун яратилган», - дея эслатди у. Энди «ушбу урушни тугатиш ва тинчликни таъминлаш учун бошқа турдаги G20»ни яратиш муҳим», деди Лула да Силва.

Унинг сўзларига кўра, ташаббусни аллақачон АҚШ президенти Жо Байден, Германия канцлери Олаф Шольц, Франция президенти Эммануэл Макрон ва Жанубий Американинг бир қанча давлат раҳбарлари билан муҳокама қилган.