Yoshlar kuni munosib nishonlandi
https://t.me/tuychiyev_uzSirdaryoda Yoshlar kuni shu qadar ko`tarinki kayfiyatda o`tkazildiki, yoshlar bir kunga bo`lsa-da karantin qoidalariga rioya qilgan holda koronavirusni unutishdi. Agar tojdor virus bo`lmaganida edi, o`tgan yilgidek ming-minglab yoshlar qamrab olinardi deyishga shoshilmang. Chunki, o`tkazilgan onlayn tanlovlarga o`tgan yilgidek ko`plab yoshlar qamrab olingan bo`lsa, bugun “Hokim va yoshlar” uchrashuvida 70ga yaqin yoshlar ishtirok etdi.
Boyovut tumanining “Istiqlol” mahallasi mezbonlik qilgan uchrashuvda yoshlar 20ga yaqin o`z taklif va tashabbuslari bilan o`rtoqlashdi. Ayniqsa, tadbirkor Maminov Muslimbekning kredit olish bo`yicha taklifi shu joyning o‘zida o‘rganilib, Markaziy Bank xodimlari bilan kelishib olindi. Tadbirkor parrandalik bilan shug‘ullanish uchun 150 million kredit olishini ma’lum qildi.
Shundan so‘ng, eng faol bo‘lgan yoshlar taqdirlandi. Xususan, joriy yilgi imtiyoz g‘olibi Yorqinjon Hayitboyev maxsus tavsiyanoma hamda Sirdaryo viloyati hokimining sovg`asi bilan taqdirlandi. U o`z nutqida “Kelajakda Guliston davlat universitetiga rektor bo`laman”, deya kelgusi maqsadlari bilan o`rtoqlashdi. Viloyat faxriylari uning maqsadlari amalga oshishi uchun oq fotiha berishdi.
“Yil yetakchisi” deya Guliston tumani 15-umumta’lim maktabi boshlang‘ich tashkilot yetakchisi O‘g‘iloy Hidirova taqdirlangan bo`lsa, Guliston davlat universiteti talabasi, yosh rassom Abdulaziz Abdullayev viloyat hokimining faxriy yorlig`i bilan rag`batlantirildi. Uchrashuvda ishtirok etgan barcha yoshlar maxsus kitoblar bilan taqdirlandi.
Uchrashuvni yana bir qiziqarli jihati shuki, O‘zLiDeP Sirdaryo viloyati Kengashi raisi, O‘zbekiston Respublikasi Oliy Majlisi Senati a’zosi Ulug‘bek Sotiboldiyev tomonidan “Yoshlar kuni”ning ramziy ko`rinishi sifatida 200 kishilik tort tayyorlanib, yoshlarga, aholiga va imkoniyati cheklangan yoshlarga ulashildi.
Shu kunning o`zida imkoniyati cheklangan, uyda yakka ta'lim oluvchi yoshlar holidan xabar olinib, ularga maxsus sovg`alar ulashildi va yoshlar kuni bilan muborakbod etildi.
Yoshlar kuni bir so`z bilan aytilganda yuqori kayfiyat bilan tashkil etildi.
Anvar TUYCHIYEV
O‘zbekiston yoshlar ittifoqi Sirdaryo viloyati Kengashi raisining matbuot kotibi, Axborot siyosati masalalari bo‘yicha maslahatchisi.