Сирдарё вилоятида каннабис етиштириш учун 3 минг 842 гектар ер ажратилди
@kunuzsirdaryo
Ўзбекистонда “Industrial Innovation Group” (IIG) компанияси (БАА) техник каннабис етиштириш бўйича йирик лойиҳани бошлади. Бу ҳақда Ўзбекистон Миллий ахборот агентлиги хабар берди.
Каннабис етиштириш агросаноат секторида энг тез ривожланаётган йўналишлардан бўлиб, бугунги кунда 50 га яқин мамлакатда ўстирилади.
Сирдарё вилоятида ушбу ўсимликни етиштириш учун 3 минг 842 гектар ер ажратилди. Бу майдонларни келгусида 25 минг гектарга етказиш режалаштирилган.
Вазирлар Маҳкамаси қарори билан таркибида тетрагидроканнабинол 0,2 фоиздан кам бўлган техник каннабис етиштиришга рухсат берилди. Xoвос туманида экилган каннабис навида тетрагидроканнабинол миқдори – 0,00008 фоиз. Бу қонунда белгиланган меъёрдан 2,5 минг баравар кам дегани.
Каннабис фойдаланишга яроқсиз майдонларга экилади. Ховос туманидаги техник каннабис экиш учун ажратилган ер 30 йилдан бери фойдаланилмасдан келган. Бундан ташқари, aжратилган майдоннинг тахминан 50 фоизи кучли шўрлангани аниқланган.
Каннабис ўсимлиги озиқ-овқат, косметика, тўқимачилик, енгил саноат, қоғоз, қурилиш, aвиация, ҳарбий соҳа ва ёнилғи ишлаб чиқариш соҳалари учун энг машҳур ва мақбул хомашёдир. Бугунги кунда техник каннабис хомашёсидан 50 мингдан ортиқ турдаги экологик тоза маҳсулот ва буюмлар ишлаб чиқарилмоқда. Бу юз минглаб тонна заҳарли чиқиндилар ажраладиган синтетик ишлаб чиқаришдан кўра анча афзалдир.
Texник каннабис қоғоз-целлюлоза саноатига мос экологик хомашёдир. Уни етиштириш Ўзбекистонда импорт қилинадиган қоғоз маҳсулотлари ўрнини қоплашда самарали ечим ҳисобланади. Зеро, бугунги кунда Ўзбекистон қоғоз ишлаб чиқариш саноатининг 10-12 фоизи маҳаллий хомашё эвазига қопланади, қолган қисми импорт ҳисобланади.
Xaлқаро экспертларнинг фикрича, каннабис келгусида асосий экинлардан бирига айланади. Тахминан ўн йилдан кейин пластмасса саноатининг 40 фоизгача хомашёси ўсимликлардан олинади. Техник каннабис бу борада муҳим аҳамият касб этишини алоҳида таъкидлаш жоиз.