Тадбиркорлик субъектларининг истиқболли лойиҳалари тақдимоти бўлиб ўтди

20 январь куни Бухоро тумани ҳокимлигида ўз ғоя ва ташаббусларини амалга оширмоқчи бўлган тадбиркор-сармоядорлар лойиҳаларининг тақдимоти ўтказилди. Ўзбекистон Республикаси Президентининг 2018 йил 11 сентябрдаги “Ҳудудларда тадбиркорлик ташаббуслари ва лойиҳаларини жадал амалга оширишни ташкил этиш чора-тадбирлари тўғрисида”ги қарори ижросини таъминлаш мақсадида ташкил этилган мазкур тадбирда 6 та лойиҳа намойиш этилди.

Тумандаги “Хумин” фермер хўжалиги негизида пахтачилик кластерини ташкил этиш лойиҳаси тақдимотни бошлаб берди. Бу лойиҳа икки босқичдан иборат бўлиб, биринчи босқичда 70 та янги иш ўрни яратилиши кўзда тутилган. Бир кунда 20 тонна пахта толасини, 12 тонна пахта уруғи, яъни чигитини қайта ишлаш йўлга қўйилади. Лойиҳанинг иккинчи босқичида енгил саноат корхонасида фаолияти йўлга қўйиладиган ип-калава ишлаб чиқариш ва 50 фоиз ярим тайёр маҳсулотнинг экспорт қилиниши эвазига 30 та янги иш ўрни яратилиши белгиланган. “Агробанк” АТБ Галаосиё филиалининг масъуллари эса уни моддий қўллаб-қувватлашга тайёрлигини билдиришди.

“Гулшанобод” МФЙ “Хўжаработ” қишлоғида тадбиркор Раҳима Шаропова  томонидан замонавий типдаги нодавлат мактабгача таълим муассасасини ташкил этиш лойиҳаси тайёрланган.  

-Ҳудудда болалар боғчасига бўлган эҳтиёждан келиб чиқиб шу ишга қўл урдик,-дейди Р.Шаропова.-Ота-оналар ўз фарзандларини иложсизликдан  Бухоро шаҳридаги мактабгача таълим муассасаларига элтиб келтиришмоқда. Лойиҳамиз мутасаддилар томонидан қўллаб-қувватланса, шу йилнинг ўзида ҳудудимиздаги 75 нафар болани қамраб оладиган муассасани ишга туширардик.  Бунинг натижасида 15 та янги ишчи ўрни ҳам яратилади.

Тақдимотда тадбиркор ташаббускор И.Бобоевнинг “Янги турмуш” МФЙ Кичикбой қишлоғида чорвачиликни ривожлантиришга доир, “Export Bukhara” унитар корхонасининг экспортбоп маҳсулотлар ишлаб чиқариш ва чет элга сотиш, “Қумработ” фермер хўжалигининг “Боғикалон” МФЙнинг чорвачилик кластерини ташкил этиш ҳамда “Эльбрус цемент” МЧЖнинг балиқчилик ва ерости иншоотлари қурилиши, инфраструктураси ва экологик муҳитини яхшилаш каби лойиҳаларнинг тақдимоти батафсил кўриб чиқилди.

Тақдимот қилинган лойиҳаларнинг умумий қиймати 43,5 миллиард сўм бўлиб, унинг 20,9 миллиард сўми банк кредити, қолгани ташаббускорларнинг ўз маблағлари ҳисобидан молиялаштирилади. Лойиҳалар тўла қувваат билан ишга тушса, 206 та янги иш ўринлари яратилади.

Ҳар жиҳатдан манфаатдорлик, бандлик ва ташаббускорлик нуқтаи назаридан баҳоланган мазкур лойиҳалар туман ҳокими Қаҳрамон Дўстов томонидан қўллаб-қувватланиб, тегишли тижорат банклари билан ҳамкорлик истиқболлари белгиланди. Шунинг баробарида чекка ҳудудларда худди шундай ишлаб чиқаришни ривожлантириш билан боғлиқ лойиҳаларни пухта тайёрлаш ва амалиётга тадбиқ этишга доир зарур тавсиялар ишлаб чиқилди.

Вилоят ҳокимлиги ахборот хизмати