Кано́н

Пе́снь 1

Ирмос: Мо́ря чермну́ю пучи́ну, невла́жными стопа́ми, дре́вний пешеше́ствовав Изра́иль, крестообра́зными Моисе́овыма рука́ма, Амали́кову си́лу в пусты́ни победи́л е́сть.

Сла́ва Тебе́, Бо́же наш, сла́ва Тебе́.

Ве́лия я́же па́че ума́ Влады́ко, Боже́ственнаго Твоего́ воплоще́ния, благодея́ния сия́ют на́м, да́рове же и благода́ти, и Боже́ственныя све́тлости, благопода́тно истека́ющыя.

Сла́ва Тебе́, Бо́же наш, сла́ва Тебе́.

Прише́л еси́ Христе́, све́тлости Божества́ испуща́я, пра́здника посреде́ явле́нно: пра́здник бо ра́достный спаса́емых еси́, и спасе́ния на́шего хода́тай.

Святая мученица Ирино, моли Бога о нас.

Вене́ц сый страстоно́сицы, сея́, Христе́, моли́твами мир ми́ру/ и сла́ву неувяда́ему пою́щим Тя да́руй.

Святая мученица Ирино, моли Бога о нас.

Заре́ю сия́ющи де́вства, укра́шена добро́тою твоего́ муче́ния,/ Ири́но великоимени́тая, твоему́ Жениху́ предстои́ши.

Сла́ва Отцу́ и Сы́ну и Свято́му Ду́ху.

Три́ собезнача́льны сла́влю и сопресто́льны, Отца́ безнача́льна Бо́га, и Сы́на собезнача́льна, и ду́ха соприсносу́щна Сы́ну, еди́но триипоста́сное Существо́: еди́но нача́ло пребезнача́льное пою́, безнача́льнаго Божества́ и Существа́ чту́.

И ны́не и при́сно и во ве́ки веко́в. Ами́нь.

Еди́на вмести́ла еси́ Зижди́теля Твоего́ Богороди́тельнице во чре́ве, и пло́тию родила́ еси́ неизрече́нно, и Де́ва пребыла́ еси́, ничто́же де́вству оскверни́вшуся. Сего́ Чи́стая, я́ко Сы́на Твоего́ и Бо́га непреста́нно моли́ о ста́де Твое́м при́сно.

Катава́сия:Воскресе́ния день, просвети́мся, лю́дие. Па́сха, Госпо́дня Па́сха, от сме́рти бо к жи́зни, и от земли́ к небеси́, Христо́с Бог нас преведе́, побе́дную пою́щия.

Песнь 3

Ирмос: Весели́тся о Тебе́ Це́рковь Твоя́ Христе́, зову́щи: Ты́ моя́ кре́пость Го́споди, и прибе́жище и утвержде́ние.

Сла́ва Тебе́, Бо́же наш, сла́ва Тебе́.

Во́д животво́рных исто́чники отве́рзл еси́ Це́ркви, а́ще кто́ жа́ждет, усе́рдно да прихо́дит и пие́т, вопия́ Бла́же.

Сла́ва Тебе́, Бо́же наш, сла́ва Тебе́.

От земли́ у́бо на не́бо вознести́ся, проявле́нно глаго́лал еси́: с небесе́ же Ду́ха посла́ти обеща́л еси́ Свята́го.

Святая мученица Ирино, моли Бога о нас.

Ми́ра излия́вшагося чу́вствующи и вселе́нную облагоуха́вшаго благода́тию прии́мши,/ воспери́ся к жела́нию сего́, сла́вная.

Святая мученица Ирино, моли Бога о нас.

Име́ла еси́ Бо́га помо́щника во твои́х по́двизех и защища́юща, всему́драя,/ сего́ ра́ди венча́вшися, мучи́теля победи́ла еси́.

Сла́ва Отцу́ и Сы́ну и Свято́му Ду́ху.

Тебе́ покланя́емся О́тче, безнача́льный Cущество́м, пое́м безнача́льнаго Сы́на Твоего́, и Ду́ха благоче́стно Всесвята́го, я́ко еди́наго три́, естество́м Бо́га.

И ны́не и при́сно и во ве́ки веко́в. Ами́нь.

Еди́н от Тро́ицы сы́й бы́в, пло́ть ви́делся еси́, не прело́жь Го́споди существа́, ниже́ опали́в Ро́ждшия нетле́нное чре́во, Бо́г сы́й ве́сь и о́гнь.

Катава́сия: Лук си́льных изнемо́же,/ и немощству́ющии препоя́сашася си́лою,/ сего́ ра́ди утверди́ся в Го́споде се́рдце мое́.

Го́споди, поми́луй. (Трижды.)

Конда́к, глас 4. Де́вства добро́тами преиспещре́нна, де́во,/ страда́льчеством была́ еси́ красне́йшая, Ири́но,/ кровьми́ твои́ми исте́кшими обагре́на,/ пре́лесть же низложи́вшая безбо́жия./ Сего́ ра́ди и прия́ла еси́ по́чести побе́ды руко́ю Созда́теля твоего́.

Седа́лен, глас 8. Мир тебе́ мног прибы́сть, му́ченице,/ разре́шшися пло́ти по боле́знех мно́гих:/ ра́дуяся бо, Жени́х на Небесе́х тя горе́ прия́т, всепросвеще́ну, и страда́нием облиста́ющу,/ и в черто́г Боже́ственный введе́ ра́дующуся.

Слава и ны́не: Прему́дрости во́ду и жи́зни, источа́я ми́рови, все́х Спа́се призыва́еши почерпсти́ спасе́ния во́ды: Боже́ственный бо зако́н Тво́й прии́м челове́к, в себе́ угаша́ет пре́лести у́глие, отону́дуже во ве́ки не вжа́ждет, ни преста́нет насыще́ния Твоего́ Влады́ко Царю́ Пренебе́сный. Сего́ ра́ди сла́вим держа́ву Твою́ Христе́ Бо́же, прегреше́ний оставле́ние прося́ще низпосла́ти бога́тно рабо́м Твои́м.

Песнь 4

Ирмо́с: Вознесе́на Тя́ ви́девши Це́рковь на Кресте́, со́лнце пра́ведное, ста́ в чи́не свое́м, досто́йно взыва́ющи: сла́ва си́ле Твое́й Го́споди.

Сла́ва Тебе́, Бо́же наш, сла́ва Тебе́.

Растерза́в сме́рти врата́ си́лою Твое́ю, пути́ жи́зни сказа́л еси́, безсме́ртия же две́ри отве́рзл еси́, ве́рою зову́щым: сла́ва си́ле Твое́й Го́споди.

Сла́ва Тебе́, Бо́же наш, сла́ва Тебе́.

Преполове́ние все́х и коне́ц име́яй, и нача́лая́ко безнача́лен обдержа́й, ста́л еси́ посреде́ вопия́: Боже́ственных Богому́дрии прииди́тедаро́в наслади́теся.

Святая мученица Ирино, моли Бога о нас.

И́же мир тебе́ подава́яй, мироимени́тая, ми́ра ра́ди посо́бствующу тя ви́дя,/ мужеподо́бным ра́зумом, му́ченице, и кре́постию испо́лни.

Святая мученица Ирино, моли Бога о нас.

Кре́пким усе́рдием превозше́дши же́нскую не́мощь, преблаже́нная,/ тве́рдо изобличи́ла еси́, му́ченице, ле́сти служа́щия.

Сла́ва Отцу́ и Сы́ну и Свято́му Ду́ху.

Тро́ице неразде́льная Еди́нице, безнача́льне О́тче, Сы́не и Ду́ше Святы́й, во Еди́нице Тро́ица равноче́стная, сопресто́льная, животворя́щая, несозда́нный Бо́же, спаса́й воспева́ющыя Тя́, и изба́ви от бе́д и скорбе́й.

И ны́не и при́сно и во ве́ки веко́в. Ами́нь.

Во чре́ве Твое́м, Бо́га неопи́санно вмести́вшая, Богоневе́сто Де́во Ма́ти Чи́стая, не преста́й моля́щи о на́с, я́ко да Тобо́ю изба́вимся от обстоя́ний, к Тебе́ бо при́сно прибега́ем.

Катава́сия: На Боже́ственней стра́жи богоглаго́ливый Авваку́м да ста́нет с на́ми и пока́жет светоно́сна А́нгела я́сно глаго́люща: днесь спасе́ние ми́ру, я́ко воскре́се Христо́с, я́ко всеси́лен.

Песнь 5

Ирмос: Ты́ Го́споди мо́й, све́т в ми́р прише́л еси́, све́т святы́й, обраща́яй из мра́чна неве́дения, ве́рою воспева́ющыя Тя́.

Сла́ва Тебе́, Бо́же наш, сла́ва Тебе́.

Боже́ственных пра́здников преполове́ния дости́гше, соверше́нною боже́ственною доброде́телию обучи́тися потщи́мся Богому́дрии.

Сла́ва Тебе́, Бо́же наш, сла́ва Тебе́.

Я́ко вои́стинну свяще́нное настоя́щее торжество́ преполове́ние: превели́ких бо пра́здников ко́рень, и све́тится обою́ду.

Святая мученица Ирино, моли Бога о нас.

Му́жеским, сла́вная, ра́зумом Христа́, Бо́га всех я́сно испове́дала еси́,/ сло́вом же тве́рдым сопротивоборца́, страстоте́рпице, посрами́ла еси́.

Святая мученица Ирино, моли Бога о нас

После́довати возжеле́ла еси́ стра́сти Христо́ве/ и подо́бием те́пле после́довала еси́,/ подви́жно стра́ждущи по Влады́це, пребога́тая.

Сла́ва Отцу́ и Сы́ну и Свято́му Ду́ху.

Сла́ва Тебе́, О́тче Святы́й, Бо́же нерожде́нне: сла́ва Тебе́, Сло́ве безле́тне единоро́дне: сла́ва Тебе́, Ду́ше Боже́ственне и сопресто́льне, и единосу́щне Отцу́ и Сы́ну.

И ны́не и при́сно и во ве́ки веко́в. Ами́нь.

Бы́сть чре́во Твое́ свята́я трапе́за, иму́щая небе́сный хле́б: от него́же вся́к яды́й не умира́ет, я́коже рече́ все́х Богороди́тельнице Пита́тель.

Катава́сия:У́тренюем у́треннюю глубоку́, и вме́сто ми́ра песнь принесе́м Влады́це, и Христа́ у́зрим пра́вды Со́лнце, всем жизнь возсия́юща.

Песнь 6

Ирмос: Пожру́ Ти со гла́сом хвале́ния Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Сла́ва Тебе́, Бо́же наш, сла́ва Тебе́.

Преполове́ние Пятдеся́тницы наста́ дне́сь, отсю́ду Боже́ственныя у́бо Па́схи, Боже́ственнейшею све́тлостию озари́вшееся, отону́дуже Уте́шителевою благода́тию сия́ющее.

Сла́ва Тебе́, Бо́же наш, сла́ва Тебе́.

Глаго́лал еси́ в Хра́ме Христе́ предстоя́, иуде́йским собо́ром Свою́ сла́ву открыва́я, и предъявля́я сро́дство к Роди́телю.

Святая мученица Ирино, моли Бога о нас.

Испра́вила еси́ прама́тере Е́вы паде́ние, страстоте́рпице,/ врага́ низложи́вши си́лу/ и победи́вши о́наго шата́ние Боже́ственною благода́тию.

Святая мученица Ирино, моли Бога о нас.

Кре́пость стяжа́вши, Ири́но, ра́зума,/ мучи́телем супроти́вилася еси́ души до́блестию/ и венце́м побе́дным от Христа́ Бо́га венча́лася еси́.

Сла́ва Отцу́ и Сы́ну и Свято́му Ду́ху.

Еди́но в Тро́ице Божество́, Существо́ триипоста́сное, несозда́нное, неразде́льное вси́ сла́вим, Отца́, и Сы́на, и Свята́го Ду́ха, я́ко три́ су́щее, и еди́но.

И ны́не и при́сно и во ве́ки веко́в. Ами́нь.

Де́ву по рождестве́ пое́м Тя́, Де́ву и Ма́терь сла́вим Тебе́ еди́ну, Чи́стая Богоневе́сто Отрокови́це, из Тебе́ бо вои́стинну Бо́г воплоти́ся, обнови́в на́с.

Катава́сия: Возопи́, прообразу́я погребе́ние тридне́вное,/ проро́к Ио́на, в ки́те моля́ся:/ от тли изба́ви мя, Иису́се, Царю́ сил.

Го́споди, поми́луй. (Три́жды). Сла́ва, и ны́не:

Кондак, глас 4: Пра́зднику зако́нному преполовля́ющуся, все́х Тво́рче Влады́ко, к предстоя́щым глаго́лал еси́ Христе́ Бо́же: прииди́те и почерпи́те во́ду безсме́ртия. Те́мже Тебе́ припа́даем, и ве́рно вопие́м: щедро́ты Твоя́ да́руй на́м, Ты́ бо еси́ исто́чник жи́зни на́шея.

И́кос: Олядене́вшую мою́ ду́шу прегреше́ний беззако́ньми тече́ньми Твои́х крове́й напо́й, и покажи́ плодоно́сну доброде́тельми: Ты́ бо ре́кл еси́ все́м, е́же приходи́ти к Тебе́, Сло́ве Бо́жий Всесвяты́й, и во́ду нетле́ния почерпа́ти, живу́ю же и очища́ющую грехи́, пою́щих сла́вное и Боже́ственное Твое́ воста́ние, подая́ Благи́й с высоты́ сше́дшую вои́стинну ученико́м Твои́м Ду́ха кре́пость, Тебе́ Бо́га ве́дущым: Ты́ бо еси́ исто́чник жи́зни на́шея.

Песнь 7

Ирмос: В пещи́ Авраа́мстии о́троцы Перси́дстей, любо́вию благоче́стия па́че, не́жели пла́менем опаля́еми взыва́ху: благослове́н еси́ в хра́ме сла́вы Твоея́ Го́споди.

Сла́ва Тебе́, Бо́же наш, сла́ва Тебе́.

Кре́постию Спа́се сме́ртную разо́рь си́лу, стезю́ жи́зни показа́л еси́ челове́ком, благода́рно Тебе́ зову́щым благослове́н еси́ в хра́ме сла́вы Твоея́ Го́споди.

Сла́ва Тебе́, Бо́же наш, сла́ва Тебе́.

Пло́ть нося́ща ви́дяще, не разуме́ша собо́ри евре́йстии Сло́ве Тя́ Бо́жии: но мы́ Тебе́ воспева́ем: благослове́н еси́ в хра́ме сла́вы Твоея́ Го́споди.

Святая мученица Ирино, моли Бога о нас.

Венцено́сно, му́ченице, предстоя́щи престо́лу твоего́ Влады́ки,/ соблюди́ ве́рою зову́щия:/ оте́ц на́ших Бо́же, благослове́н еси́.

Святая мученица Ирино, моли Бога о нас.

В Небе́сных селе́ниих ликова́ти, му́ченице, сподо́билася еси́,/ досточу́дная Ири́но, зову́щи:/ оте́ц на́ших Бо́же, благослове́н еси́.

Сла́ва Отцу́ и Сы́ну и Свято́му Ду́ху.

Покланя́емся Твоему́ Го́споди Пречи́стому Отцу́, и благода́ти Ду́ха, ю́же Твои́м апо́столом Бо́г сы́й разда́вый, посыла́я и́х на про́поведь.

И ны́не и при́сно и во ве́ки веко́в. Ами́нь.

Во чре́ве Твое́м вмести́ла еси́ невмести́маго Сло́ва, от Твои́х сосе́ц дои́ла еси́ ми́ру Пита́теля, на объя́тии носи́ла еси́ Содержи́теля на́шего, Богороди́тельнице Чи́стая.

Катава́сия: О́троки от пе́щи изба́вивый, быв Челове́к, стра́ждет я́ко сме́ртен, и стра́стию сме́ртное, в нетле́ния облачи́т благоле́пие,Еди́н благослове́н отце́в Бог и препросла́влен.

Песнь 8

Ирмос: Руце́ распросте́р Дании́л, льво́в зия́ния в ро́ве затче́: о́гненную же си́лу угаси́ша, доброде́телию препоя́савшеся, благоче́стия рачи́тели о́троцы взыва́юще: благослови́те вся́ дела́ Госпо́дня Го́спода.

Сла́ва Тебе́, Бо́же наш, сла́ва Тебе́.

Красе́н из гро́ба воста́в, Божества́ сла́вою укра́шен, апо́столом Твои́м Го́споди яви́лся еси́, Ду́ха обеща́яся те́м посла́ти де́йство, вопию́щым: благослови́те вся́ дела́ Госпо́дня Го́спода.

Сла́ва Тебе́, Бо́же наш, сла́ва Тебе́.

Умертви́в а́да я́ко Бо́г живонача́льнейший, все́м источи́л еси́ живо́т ве́чный, его́же ны́не вообража́ют я́вственнее, светоно́сных дне́й си́х ра́дости, вопию́щым: благослови́те вся́ дела́ Госпо́дня Го́спода.

Святая мученица Ирино, моли Бога о нас.

Пострада́ла еси́, Ири́но блаже́нная, до́бле и мучи́теля низложи́ла еси́,/ иму́щи посо́бие непобеди́мое, Влады́ки твоего́ си́лу, соде́йствующую тебе́,/ и, Го́спода по́йте, – вопия́ла еси́, – и превозноси́те Его́ во ве́ки.

Святая мученица Ирино, моли Бога о нас.

Ю́ношескою любо́вию уя́звена, во след твоего́ Жениха́ после́довала еси́,/ Сего́ страда́ния, му́ченице, и ра́ны на те́ле твое́м нося́щи и вопию́щи:/ Го́спода по́йте, дела́, и превозноси́те Его́ во ве́ки.

Благослови́м Отца́, и Сы́на, и Свята́го Ду́ха, Го́спода.

Еди́н Бо́г у́бо Тро́ица, Отцу́ не преступи́вшу в сыновство́, ниже́ Сы́ну прело́жшуся во исхожде́ние: но сво́йтвенная и обоя́, Све́т Бо́га, три́ прославля́ю во ве́к.

И ны́не и при́сно и во ве́ки веко́в. Ами́нь.

Ка́ко родила́ еси́, рцы́, от Отца́ безле́тно просия́вшаго, и со Святы́м Ду́хом воспева́емаго? Или́ я́ко ве́сть еди́н благоволи́вый из Тебе́ роди́тися, Богоро́дице.

Хва́лим, благослови́м, покланя́емся Го́сподеви, пою́ще и превознося́ще во вся ве́ки.

Катава́сия: О́троки благочести́выя в пещи́/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Честнейшую поем.

Величит душа Моя Господа, и возрадовася дух Мой о Бозе Спасе Моем.

Припев: Честнейшую Херувим и славнейшую без сравнения Серафим, без истления Бога Слова рождшую, сущую Богородицу, Тя величаем.

Яко призре на смирение рабы Своея, се бо отныне ублажат Мя вси роди.

Яко сотвори Мне величие Сильный, и свято имя Его, и милость Его в роды родов боящимся Его.

Сотвори державу мышцею Своею, расточи гордыя мыслию сердца их.

Низложи сильныя со престол, и вознесе смиренныя; алчущия исполни благ, и богатящияся отпусти тщи.

Восприят Израиля отрока Своего, помянути милости, якоже глагола ко отцем нашим, Аврааму и семени его даже до века.

Песнь 9

Ирмо́с: Ка́мень нерукосе́чный от несеко́мыя горы́ Тебе́ Де́во, краеуго́льный отсече́ся Христо́с, совокупи́вый разстоя́щаяся естества́ те́м веселя́щеся, Тя́ Богоро́дице велича́ем.

Сла́ва Тебе́, Бо́же наш, сла́ва Тебе́.

Но́вому и чи́стому жи́тельству, от Христа́ научи́вшеся, сие́ да́же до конца́ сохрани́ти поле́зно вси́ потщи́мся я́ко да Свята́го Ду́ха прише́ствие восприи́мем.

Сла́ва Тебе́, Бо́же наш, сла́ва Тебе́.

Ты́ мое́ сме́ртное Жизнода́вче, обложе́нием безсме́ртия, и нетле́ния благода́тию обле́к Спа́се, совоскреси́л еси́, и Отцу́ приве́л еси́, вре́менную мою́ разруши́в бра́нь.

Святая мученица Ирино, моли Бога о нас.

О́крест твоего́ Рачи́теля лику́ющи в вы́шних, до́брая де́во,/ испроси́ ми́ру мир, Ири́но, и согреше́ний оставле́ние/ ве́рою творя́щим па́мять твою́ светоно́сну ю и свяще́нную.

Святая мученица Ирино, моли Бога о нас.

Внутрь тя черто́га Христо́с я́ко му́ченицу и де́ву всели́,/ иде́же с де́вами ра́дуешися и с му́ченическими во́инствы,/ Ири́но венцено́сные всехва́льная,/ те́мже тя вси ублажа́ем.

Сла́ва Отцу́ и Сы́ну и Свято́му Ду́ху.

Чу́жде е́сть беззако́нным сла́вити безнача́льную Тро́ицу, Отца́, и Сы́на же, и Свята́го Ду́ха, несозда́нное вседержа́ние, И́мже ве́сь ми́р созда́ся держа́вою кре́пости Ея́.

И ны́не и при́сно и во ве́ки веко́в. Ами́нь.

Вмести́ла еси́ во чре́ве Твое́м Де́во Ма́ти, еди́наго от Тро́ицы Христа́ Жизнода́вца, Его́же пое́т вся́ тва́рь, и трепе́щут го́рнии престо́ли: Того́ моли́ Всеблаже́нная, спасти́ ду́шы на́шя.

Катава́сия: Е́ва у́бо неду́гом преслуша́ния кля́тву всели́ла есть;/ Ты же, Де́во Богоро́дице,/ прозябе́нием чревоноше́ния/ ми́рови благослове́ние процвела́ еси́./ Тем Тя вси вели́чаем.

Ангел вопияше Благодатней: / чистая Дево, радуйся! / И паки реку: радуйся! / Твой Сын воскресе / тридневен от гроба / и мертвыя воздвигнувый, / людие, веселитеся.

Светися, светися, / Новый Иерусалиме, / слава бо Господня / на тебе возсия. / Ликуй ныне / и веселися Сионе, / Ты же, Чистая, красуйся, Богородице, / о восстании Рождества Твоего

Го́споди, поми́луй. (Трижды.)

Ча́шу име́яй неистощи́мых даро́в, да́ждь ми́ почерпсти́ во́ду во оставле́ние грехо́в, я́ко содержи́мь е́смь жа́ждею, Благоутро́бне еди́не Ще́дре.

Сла́ва, и ны́не: Ча́шу име́яй неистощи́мых даро́в, да́ждь ми́ почерпсти́ во́ду во оставле́ние грехо́в, я́ко содержи́мь е́смь жа́ждею, Благоутро́бне еди́не Ще́дре.

Хвали́тны

Вся́кое дыха́ние да хва́лит Го́спода. Хвали́те Го́спода с небе́с, хвали́те Его́ в вы́шних. Тебе́ подоба́ет песнь Бо́гу. Хвали́те Его́, вси А́нгели Его́, хвали́те Его́, вся Си́лы Его́. Тебе́ подоба́ет песнь Бо́гу. Хвали́те Его́, со́лнце и луна́, хвали́те Его́, вся зве́зды и свет. Хвали́те Его́ Небеса́ небе́с и вода́, я́же превы́ше небе́с. Да восхва́лят и́мя Госпо́дне: я́ко Той рече́, и бы́ша, Той повеле́, и созда́шася. Поста́ви я́ в век и в век ве́ка, повеле́ние положи́, и не ми́мо и́дет. Хвали́те Го́спода от земли́, зми́еве и вся бе́здны: огнь, град, снег, го́лоть, дух бу́рен, творя́щая сло́во Его́, го́ры и вси хо́лми, древа́ плодоно́сна и вси ке́дри, зве́рие и вси ско́ти, га́ди и пти́цы перна́ты. Ца́рие зе́мстии и вси лю́дие, кня́зи и вси судии́ зе́мстии, ю́ноши и де́вы, ста́рцы с ю́нотами да восхва́лят и́мя Госпо́дне, я́ко вознесе́ся и́мя Того́ Еди́наго, испове́дание Его́ на земли́ и на небеси́. И вознесе́т рог люде́й Свои́х, песнь всем преподо́бным Его́, сыново́м Изра́илевым, лю́дем, приближа́ющымся Ему́.

Воспойте Господеви песнь нову, хваление Его в церкви преподобных. Да возвеселится Израиль о сотворшем Его, и сынове Сиони возрадуются о Царе своем. Да восхвалят имя Его в лице, в тимпане и псалтири да поют Ему. Яко благоволит Господь в людех Своих, и вознесет кроткия во спасение. Восхвалятся преподобнии во славе и возрадуются на ложах своих. Возношения Божия в гортани их, и мечи обоюду остри в руках их: сотворити отмщение во языцех, обличения в людех, связати цари их путы, и славныя их ручными оковы железными, cотворити в них суд написан. Слава сия будет всем преподобным Его.

Стихиры на хвалитех, глас 4:

Хвали́те Его́ во гла́се тру́бнем, хвали́те Его́ во псалти́ри и гу́слех.

Кре́ст претерпе́вый и сме́рть, и воскресы́й из ме́ртвых Всеси́льне Го́споди, сла́вим Твое́ Воскресе́ние.

Хвали́те Его́ в тимпа́не и ли́це, хвали́те Его́ во стру́нах и орга́не.

Овча́ е́смь слове́снаго Твоего́ ста́да, и к Тебе́ прибега́ю Па́стырю до́брому, взыщи́ мене́ заблу́ждшаго Бо́же, и поми́луй мя́.

Хвали́те Его́ в кимва́лех доброгла́сных, хвали́те Его́ в кимва́лех восклица́ния. Вся́кое дыха́ние да хва́лит Го́спода.

Му́ченичен: Кто́ не ужаса́ется зря́ святи́и му́ченицы, по́двиг до́брый, и́мже подвиза́стеся? Ка́ко в те́ле су́ще безпло́тнаго врага́ победи́сте, Христа́ испове́давше, и кресто́м вооружи́вшеся. Те́мже досто́йно яви́стеся бесо́м прогони́телие, и ва́рваром победи́телие: непреста́нно моли́теся, спасти́ся душа́м на́шым.

Сла́ва, и ны́не: глас 8: Преполови́вшуся пра́зднику Па́схи, в хра́м вше́л еси́ святи́лищный, Спа́се на́ш, и ста́в посреде́ наро́да учи́л еси́ те́х с дерзнове́нием, и глаго́лал еси́: А́з е́смь све́т ми́ра, в сле́д Мене́ иды́й, не и́мать ходи́ти во тме́, но име́ти бу́дет све́т безсме́ртныя жи́зни.

Слава Тебе, показавшему нам свет.

Слава в вышних Богу, и на земли мир, в человецех благоволение. Хвалим Тя, благословим Тя, кланяем Ти ся, славословим Тя, благодарим Тя великия ради славы Твоея. Господи Царю Небесный, Боже Отче Вседержителю, Господи Сыне Единородный Иисусе Христе, и Святый Душе. Господи Боже, Агнче Божий, Сыне Отечь, вземляй грех мiра, помилуй нас: вземляй грехи мiра, приими молитву нашу: Седяй одесную Отца, помилуй нас. Яко Ты еси Един Свят, Ты еси Един Господь, Иисус Христос, во славу Бога Отца, аминь.

На всяк день благословлю Тя, и восхвалю Имя Твое во веки, и в век века.

Господи, прибежище был еси нам в род и род. Аз рех: Господи, помилуй мя, исцели душу мою, яко согреших Тебе. Господи, к Тебе прибегох, научи мя творити волю Твою, яко Ты еси Бог мой: яко у Тебе источник живота, во свете Твоем узрим свет. Пробави милость Твою ведущым Тя.

Таже: Сподоби Господи, в день сей без греха сохранитися нам. Благословен еси Господи Боже отец наших, и хвально и прославлено Имя Твое во веки, аминь.

Буди Господи, милость Твоя на нас, якоже уповахом на Тя. Благословен еси Господи, научи мя оправданием Твоим. благословен еси Владыко, вразуми мя оправданием Твоим. Благословен еси Святый, просвети мя оправдании Твоими.

Господи, милость Твоя во век, дел руку Твоею не презри: Тебе подобает хвала, Тебе подобает пение, Тебе слава подобает, Отцу, и Сыну, и Святому Духу, ныне и присно, и во веки веков, аминь.

Господи помилуй. (12 раз).

На стихо́вне стихи́ры пра́здника, глас 2.

Прекло́нь небеса́, сше́л еси́ Спа́се мо́й, и пло́ть от Де́вы кроме́ преложе́ния прия́л еси́, источа́я мне́ оставле́ние.

Сти́х: Бо́г же Ца́рь на́ш пре́жде ве́ка, содела спасение посреди земли.

Ве́сь в Бо́зе Сло́ве Ты́ еси́, погиба́юща мя́ хотя́ изъя́ти от прегреше́ний, соединя́ешися мне́, Человеколю́бче.

Сти́х: Помяни́ со́нм Тво́й, его́же стяжа́л еси́ испе́рва, избавил еси жезлом достояния Твоего, гора Сион сия, в нейже вселился еси.

Ты́ прише́л еси́ Царю́, прему́дросте вели́кая, И́мже Оте́ц ми́р сотвори́ прему́дро, со Святы́м Ду́хом.

Сла́ва, и ны́не: гла́с 8:

Очи́стим помышле́ний сокро́вища, и душе́вная сия́ния просвети́м, и Жи́знь у́зрим Христа́, во святи́лище прише́дша, премно́жеством бла́гости, да врага́ победи́т, и спасе́т ро́д на́ш, стра́стию Креста́ и Воскре́сния. К Нему́ же возопии́м: непостижи́ме Го́споди, сла́ва Тебе́.

Го́споди, поми́луй. (12 раз)

Благо есть исповедатися Господеви, и пети имени Твоему, Вышний: возвещати заутра милость Твою и истину Твою на всяку нощь.

Трисвятое по Отче наш. Сла́ва, и ны́не:

Тропа́ри:

А́гница Твоя́, Иису́се, Ири́на,/ зове́т ве́лиим гла́сом:/ Тебе́, Женише́ мой, люблю́,/ и, Тебе́ и́щущи, страда́льчествую,/ и сраспина́юся, и спогреба́юся Креще́нию Твоему́,/ и стражду́ Тебе́ ра́ди,/ я́ко да ца́рствую в Тебе́, и умира́ю за Тя,/ да и живу́ с Тобо́ю,/ но я́ко же́ртву непоро́чную приими́ мя, с любо́вию поже́ршуюся Тебе́./ Тоя́ моли́твами,/ я́ко Ми́лостив, спаси́ ду́ши на́ша.

Слава и ныне: Преполови́вшуся пра́зднику, жа́ждущую ду́шу мою́ благоче́стия напо́й вода́ми, я́ко все́м Спа́се возопи́л еси́: жа́ждай да гряде́т ко Мне́ и да пие́т, исто́чниче жи́зни на́шея Христе́ Бо́же, сла́ва Тебе́.

Утверди́, Бо́же, святу́ю правосла́вную ве́ру, правосла́вных христиа́н во ве́к ве́ка.

Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Сла́ва, и ны́не: Го́споди, поми́луй.Трижды.Благослови́.

Отпу́ст

Воскресы́й из ме́ртвых, Христе́, и́стинный Бо́же наш, моли́твами Пречи́стыя Твоея́ Ма́тере, святой и сла́вной му́ченицы Ири́ны, ея же память, святы́х и пра́ведных богооте́ц Иоаки́ма и А́нны, и всех святы́х, поми́луй и спаси́ нас, я́ко Благ и Человеколю́бец.

Вели́каго господи́на и отца́ на́шего Кири́лла, Святе́йшаго Патриа́рха Моско́вскаго и всея́ Руси́, и господи́на на́шего высокопреосвяще́ннейшаго Викентия, митрополи́та Ташкентского и Узбекистанского, главу Среднеазиатского митрополичьего округа, настоя́теля, бра́тию и прихо́жан свята́го хра́ма на́шего, домоча́дцы на́ша и вся правосла́вныя христиа́ны, Го́споди, сохрани́ их на мно́гая ле́та.

Кано́н

Report Page