Futbol

Буффонга қизил карточка кўрсатган ҳакамга таҳдид қилинди

Чемпионлар лигаси чорак финали доирасида «Реал» ва «Ювентус» ўйинини бошқарган англиялик ҳакам Майкл Оливерга у ўша ўйиннинг охирги дақиқасида туринликлар жамоаси дарвозабони Жанлуижи Буффонга қизил карточка кўрсатиб, пенальти белгилагани учун таҳдидлар бўлмоқда. Бу ҳақда Би-би-си хабар тарқатган.

Ўша ўйиннинг қўшимча дақиқалари якунланаётган вақтда, ҳисоб 0:3 кўринишида эканида меҳмонлар ҳимоячиси Меҳди Бенатия Васкесга жарима майдончаси ичида қўполлик ишлатган деб топилди ва белгиланган пенальтини Криштиану Роналду аниқ амалга ошириб, жамоасини кейинги босқичга олиб чиқди.

Ўз фаолиятида илк марта майдондан четлатилган Буффон ўйиндан кейин берган интервьюсида Оливерни «юраксиз, юраги ўрнида чиқинди идиши жойлашган киши» сифатида баҳолади. Бундан ташқари, ушбу ҳолатдан қаттиқ норози бўлган «Ювентус» президенти Андреа Аньелли УЕФА бош арбитри Пьерлуиджи Коллина истеъфога чиқишини талаб қилди.

Британия телеканали хабарига кўра, Оливернинг рафиқаси ҳакамнинг телефон рақамини ижтимоий тармоқда ошкор этиб қўйгач, таҳдидлар бошланган.

Телефонда ва твиттердаги ҳақоратлардан ташқари, нотаниш кишилар ҳакамнинг уйини аниқлаб, эшигини сўкинган ҳолда тақиллатиб кетишмоқда. Унга шунингдек, почта орқали таҳдидли мактублар йўлланмоқда.

Айни вақтда ҳуқуқ тартибот органлари ходимлари бу вазиятни ўрганишмоқда.