Fin

ФИНЛАНДИЯ - ТАЪЛИМДА ФАНЛАРНИ БУТУНЛАЙ ОЛИБ ТАШЛАГАН ИЛК ДАВЛАТ.

Финландия таълим соҳаси дунёдаги энг яхши ва энг самарали таълим тизимларидан бири ҳисобланади. Шу билан бирга, финландияликларнинг таълим тизими дунёдаги бошқа таълим тизимларидан ўзига хослиги билан ажралиб туради.

Финландияликлар дунёдаги интизомга, рамкаларга асосланган таълим тизимларини инсоннинг эркинликларини чеклайди ва уларни форматлаб, ўз имкониятларини юзага чиқаришга халақит беради деб ҳисоблайдилар. Шунинг учун улар қатъий дарс соатлари, давомат, танаффус, форма ва ҳоказо деган нарсаларнинг ўрнига ўқувчиларнинг қизиқишларига қараб эркин суҳбатлар, қизиқарли тажрибалар, ўйинлар шаклида таълим берадилар. Бундан ташқари улар фанларни она тили, математика, тарих, география, биология каби соҳаларга ажратишдан кўра уларни умумлаштиришни маъқул кўрадилар. Масалан бир мавзу бир вақтнинг ўзида ҳам физикага, ҳам химияга, ҳам математика ва географияга тегишли бўлиши мумкин. Шундай пайтда ўқитувчилар дарс, яъни суҳбат-муҳокамалар давомида мавзуга оид барча қирраларни биргаликда таҳлил қиладилар.

Эндиликда, финландияликлар ўқувчилар барча фанларни билишлари шарт эмас, фақатгина ўзларига ёққан фанларни ўргансалар етади деган хулосага келибдилар ва дунёда таълим тизимидан барча фанларни олиб ташлаган илк давлатга айланибдилар. Дунёнинг бошқа давлатларида ўқувчиларга билим даражаси ва имкониятларидан қатъий назар барча фанлар ўтилади, лекин натижа бўлиш ёки бўлмаслиги кафолатланмаган.

Финландиялик ўқитувчилар ҳам бир вақтнинг ўзида бир неча соҳаларга оид билимларни бера олишлари учун янги тизимга мослаб малака оширибдилар.