#Экономика

Со Шин: “Ўзбекистон инвестиция киритиш учун қулай давлатга айланиб бормоқда”

Қорақалпоғистон Республикаси энг кўп қизилмия ўсимлиги етиштириладиган ҳудуд ҳисобланади. Ушбу ўсимликдан тайёрланаётган маҳсулотларнинг 70 фоизи хорижга, айниқса, Хитойга экспорт қилинмоқда ва жаҳон бозорида ҳам унга бўлган талаб кун сайин ортиб бормоқда. Хусусан, дунёдаги озиқ-овқат, фармацевтика ва косметология маҳсулотларини ишлаб чиқарадиган йирик компаниялар қизилмиянинг асосий талабгорлари саналади.

Қорақалпоғистон Республикасида бизнес юритиш учун хитойлик инвесторлар ҳам катта қизиқиш билдиришмоқда. “Фубо Нукус” хусусий корхонаси раҳбари Со Шин хонимнинг айтишича, Ўзбекистон инвестиция киритиш учун қулай давлатга айланиб бормоқда.

— Мақсадим йилига 300-400 тоннага яқин қизилмия экстрактини ишлаб чиқаришга мўлжалланган корхона фаолиятини йўлга қўйишдир, — дейди у. — Келажакда тайёр маҳсулотларни Хитойга экспорт қиламиз. Хитойда қизилмия ўсимлигини етиштириш жуда мушкул. Қорақалпоғистон эса бунинг акси. Бунинг учун Ўзбекистонда барча шароитлар яратиб берилмоқда.